مەملەكەت باسشىسى: مەديتسيناعا بولىنگەن 3,3 تريلليون تەڭگەنىڭ ناتيجەسى كورىنىپ جاتقان جوق
استانا. KAZINFORM - مەملەكەت باسشىسى قاسىم-جومارت توقايەۆ «ادىلەتتى قازاقستان: زاڭ مەن ءتارتىپ، ەكونوميكالىق ءوسىم، قوعامدىق وپتيميزم» اتتى جولداۋىندا مىندەتتى الەۋمەتتىك مەديتسينالىق ساقتاندىرۋ قورۋ تۋرالى پىكىر ءبىلدىردى.
«ۇلت ساۋلىعىن نىعايتۋ ءۇشىن كەشەندى شارالاردى قولعا الىپ، حالىقتى الەۋمەتتىك قولداۋ جۇيەسىن جاڭعىرتۋ كەرەك.
مىندەتتى الەۋمەتتىك مەديتسينالىق ساقتاندىرۋ جۇيەسىنىڭ ەنگىزىلۋى دەنساۋلىق ساقتاۋ سالاسىنا قوسىمشا رەسۋرستار اكەلىپ، جەكە مەنشىك مەديتسيناعا زور پايداسىن تيگىزدى.
بيىل دەنساۋلىق ساقتاۋ سالاسىنا بيۋدجەتتەن 3,3 تريلليون تەڭگە قارجى ءبولىندى. ءبىراق، ونىڭ ناتيجەسى ءالى كورىنىپ جاتقان جوق. مەديتسينالىق ساقتاندىرۋ جۇيەسىنە قاتىسۋشىلار اراسىندا مىندەتتەردىڭ دۇرىس بولىنبەۋى بۇرمالانعان اقپاراتتىڭ كوبەيۋىنە اكەپ سوقتىردى. ناۋقاستارعا مەملەكەت كەپىلدىك بەرگەن قىزمەتتەردى اقىلى نەگىزدە الۋدى نەمەسە بىرنەشە اي بويى كەزەك كۇتۋدى ۇسىنۋ جايتتارى از ەمەس. بۇعان جول بەرۋگە بولمايدى»، - دەدى پرەزيدەنت.
مەملەكەت باسشىسى مەملەكەت كەپىلدىك بەرەتىن مەديتسينالىق كومەكتىڭ ءبىرىڭعاي بازالىق توپتاماسىن جاساۋدى تاپسىردى.
«ال ودان اسىپ كەتكەن شىعىننىڭ ءبارى ساقتاندىرۋ جۇيەسى ارقىلى تولەنۋگە ءتيىس. سيفرلاندىرۋ بولماسا، مۇنداي اۋقىمدى وزگەرىستەردى ءساتتى جۇزەگە اسىرۋ مۇمكىن ەمەس.
ءبىر- بىرىنە بايلانىسى جوق ونداعان باعدارلاما مەن اقپاراتتار بازاسىنىڭ ورنىنا ءبىرىڭعاي مەملەكەتتىك مەديتسينالىق اقپارات جۇيەسىن جاساۋ كەرەك. جاڭا جۇيە، مەنشىك تۇرىنە قاراماستان، مەملەكەتتىك تاپسىرىس الاتىن مەديتسينا مەكەمەلەرىنىڭ بارىنە تولىق باقىلاۋ جاسالۋىن جانە مالىمەتتەردىڭ شىنايى بولۋىن قامتاماسىز ەتۋى قاجەت. ۇكىمەت وسى ماڭىزدى ماسەلەنى شەشۋگە دەرەۋ كىرىسىپ، بۇل باعىتتاعى جۇمىستىڭ بارىسى جونىندە ماعان جانە دەپۋتاتتىق كورپۋسقا ەسەپ بەرىپ وتىرۋعا ءتيىس»، - دەدى قاسىم-جومارت توقايەۆ.
اۆتور
ەسىمجان ناقتىباي