مەملەكەت باسشىسى ماجارستاننىڭ سىرتقى ىستەر ءمينيسترى پەتەر سيارتونى قابىلدادى
استانا. KAZINFORM - قاسىم-جومارت توقايەۆ استاناعا رەسمي ساپارمەن كەلگەن ماجارستاننىڭ سىرتقى ەكونوميكالىق بايلانىستار جانە سىرتقى ىستەر ءمينيسترى پەتەر سيارتومەن كەزدەستى. بۇل تۋرالى اقوردانىڭ باسپا ءسوز قىزمەتى حابارلادى.
مەملەكەت باسشىسى ديپلوماتقا ءىلتيپات ءبىلدىرىپ، قازاقستان مەن ماجارستان اراسىنداعى ستراتەگيالىق سەرىكتەستىكتىڭ دەڭگەيى جوعارى ەكەنىن اتاپ ءوتتى. سونداي-اق جوعارى دەڭگەيدەگى ساياسي ديالوگتىڭ دايەكتى دامىپ، ۇكىمەتارالىق ىقپالداستىقتىڭ بەلسەندى وركەندەپ كەلە جاتقانىنا نازار اۋداردى.
پرەزيدەنت بىلتىر بۋداپەشت قالاسىنا جاساعان مەملەكەتتىك ساپارى اياسىندا قول قويىلعان كەلىسىمدەردىڭ ءوز دەڭگەيىندە ىسكە اسىرىلىپ جاتقانىنا كوڭىلى تولاتىنىن جەتكىزدى.
قاسىم-جومارت توقايەۆتىڭ ايتۋىنشا، بۇل ۋاعدالاستىقتاردى جۇزەگە اسىرۋ جان-جاقتى سەرىكتەستىكتى ودان ءارى تەرەڭدەتۋگە ىقپال ەتەدى. مەملەكەت باسشىسى ماجارستان پرەمەر-ءمينيسترى ۆيكتور وربانعا ىستىق ىقىلاسىن جولدادى.
پەتەر سيارتو قاسىم-جومارت توقايەۆقا ماجارستان پرەمەر-ءمينيسترىنىڭ سالەمىن جەتكىزدى. ماجارستاننىڭ سىرتقى ىستەر ءمينيسترى استاناعا ساپارى كەزىندە بۇعان دەيىن جوعارى دەڭگەيدە قول جەتكىزىلگەن ۋاعدالاستىقتاردىڭ ءتۇرلى اسپەكتىلەرىن ىسكە اسىرۋ جاعدايىن سالالىق مينيسترلىكتەرمەن جانە ۆەدومستۆولارمەن تالقىلايتىنىن ايتتى.
كەزدەسۋدە ەكىجاقتى كۇن ءتارتىبىنىڭ ءبىرقاتار وزەكتى ماسەلەلەرى قاراستىرىلدى. سونداي-اق ساۋدا-ەكونوميكالىق جانە ينۆەستيتسيالىق سالالارداعى، ەنەرگەتيكا جانە بانك سەكتورلارىنداعى ءوزارا ءتيىمدى بايلانىستى كەڭەيتۋگە ەرەكشە ءمان بەرىلدى.
بۇدان بولەك، قاسىم-جومارت توقايەۆ پەن پەتەر سييارتو حالىقارالىق ماڭىزدى ماسەلەلەر بويىنشا پىكىر الماستى.
كەزدەسۋ سوڭىندا پرەزيدەنت قاسىم-جومارت توقايەۆ قازاق-ماجار قارىم-قاتىناسىن دامىتۋعا قوسقان ۇلەسى ءۇشىن پەتەر سيارتونى Ⅱ دارەجەلى «دوستىق» وردەنىمەن ماراپاتتادى.
ماجارستان پرەزيدەنتى قازاقستانعا رەسمي ساپارمەن كەلەتىنىن جازعان بولاتىنبىز.