مەملەكەت باسشىسى «ۇلى وتان سوعىسىنداعى جەڭىسكە 80 جىل» مەدالى تۋرالى جارلىققا قول قويدى

استانا. KAZINFORM - بۇل تۋرالى بۇگىن اقوردانىڭ باسپا ءسوز قىزمەتى حابارلادى.

«ۇلى وتان سوعىسىنداعى جەڭىسكە 80 جىل» ءبىرىڭعاي مەرەكەلىك مەدالى تۋرالى

2025-جىلعى 26-ناۋرىز

1941-1945-جىلدارداعى ۇلى وتان سوعىسىنداعى جەڭىس كۇنىنىڭ 80 جىلدىعى قۇرمەتىنە، سوعىس ارداگەرلەرى مەن تىل ەڭبەككەرلەرىنىڭ ەرلىگىنە، قاھارماندىعى مەن قايسارلىعىنا تەرەڭ قۇرمەت كورسەتە وتىرىپ، قاۋلى ەتەمىن:

1. «ۇلى وتان سوعىسىنداعى جەڭىسكە 80 جىل» ءبىرىڭعاي مەرەكەلىك مەدالى تاعايىندالسىن.

2. مىنالار:

1) «ۇلى وتان سوعىسىنداعى جەڭىسكە 80 جىل» ءبىرىڭعاي مەرەكەلىك مەدالىمەن ناگرادتاۋ قاعيدالارى (بۇدان ءارى - قاعيدالار)؛

2) «ۇلى وتان سوعىسىنداعى جەڭىسكە 80 جىل» ءبىرىڭعاي مەرەكەلىك مەدالىنىڭ سيپاتتاماسى بەكىتىلسىن.

3. قاعيدالارعا سايكەس ۇلى وتان سوعىسىنىڭ ارداگەرلەرى، تىل ەڭبەككەرلەرى جانە وزگە دە ادامدار «ۇلى وتان سوعىسىنداعى جەڭىسكە 80 جىل» ءبىرىڭعاي مەرەكەلىك مەدالىمەن ناگرادتالسىن.

4. وسى جارلىق رەسمي جاريالانعان كۇنىنەن باستاپ قولدانىسقا ەنگىزىلەدى.

قازاقستان رەسپۋبليكاسىنىڭ

پرەزيدەنتى ق. توقايەۆ

استانا، اقوردا، 2025-جىلعى 26-ناۋرىز

825

«ۇلى وتان سوعىسىنداعى جەڭىسكە 80 جىل» ءبىرىڭعاي مەرەكەلىك مەدالى تۋرالى» قازاقستان رەسپۋبليكاسى پرەزيدەنتىنىڭ 2025-جىلعى 26-ناۋرىزداعى 825-جارلىعىنا

تۇسىندىرمە

1. «1941-1945-جىلدارداعى ۇلى وتان سوعىسىنداعى جەڭىسكە 80 جىل» ءبىرىڭعاي مەرەكەلىك مەدالىن تاعايىنداۋ تۋرالى» تاۋەلسىز مەملەكەتتەر دوستاستىعىنىڭ مەملەكەت باسشىلارى كەڭەسىنىڭ 2024-جىلعى 10-ماۋسىمداعى شەشىمى «ۇلى وتان سوعىسىنداعى جەڭىسكە 80 جىل» ءبىرىڭعاي مەرەكەلىك مەدالى تۋرالى» قازاقستان رەسپۋبليكاسىنىڭ پرەزيدەنتى جارلىعىنىڭ جوباسىن (بۇدان ءارى - جارلىق جوباسى) ازىرلەۋ ءۇشىن نەگىز بولىپ تابىلادى.

2. مەرەكەلىك مەدالمەن:

1) ۇلى وتان سوعىسىنا قاتىسۋشىلار، اتاپ ايتقاندا، ۇلى وتان سوعىسى كەزەڭىندە، مايدانداعى ارميا مەن فلوتتىڭ قۇرامىنا كىرگەن اسكەري بولىمدەردە، شتابتار مەن مەكەمەلەردە قىزمەت وتكەرگەن اسكەري قىزمەتشىلەر، ۇلى وتان سوعىسىنىڭ پارتيزاندارى مەن استىرتىن ارەكەت ەتۋشىلەرى؛

2) ۇلى وتان سوعىسى كەزەڭىندە جارالانۋى، كونتۋزيا الۋى، مەرتىگۋى نەمەسە اۋرۋعا شالدىعۋى سالدارىنان بولعان مۇگەدەكتىگى بار ادامدار، اتاپ ايتقاندا، ۇلى وتان سوعىسى كەزەڭىندە مايداندا، ۇرىس قيمىلدارى اۋدانىندا، مايدان ماڭىنداعى تەمىرجول ۋچاسكەلەرىندە، قورعانىس شەپتەرىنىڭ، اسكەري- تەڭىز بازالارى مەن اۋەايلاقتاردىڭ قۇرىلىسجايلارىندا جارالانۋى، كونتۋزيا الۋى، مەرتىگۋى نەمەسە اۋرۋعا شالدىعۋى سالدارىنان مۇگەدەكتىك بەلگىلەنگەن مايدانداعى ارميا مەن فلوتتىڭ اسكەري قىزمەتشىلەرى، ۇلى وتان سوعىسىنىڭ پارتيزاندارى مەن استىرتىن ارەكەت ەتۋشىلەرى، سونداي-اق جۇمىسشىلار مەن قىزمەتشىلەر؛

3) مايدانداعى ارميا بولىمدەرىنىڭ اسكەري قىزمەتشىلەرىنە قالالاردىڭ قورعانىسىنا قاتىسقانى ءۇشىن بەلگىلەنگەن جەڭىلدىكتى شارتتارمەن زەينەتاقى تاعايىنداۋ ءۇشىن 1998-جىلعى 1-قاڭتارعا دەيىن ەڭبەك سىڭىرگەن جىلدارىنا ەسەپتەلىپ جازىلعان، سول قالالاردا ۇلى وتان سوعىسى كەزەڭىندە قىزمەت وتكەرگەن اسكەري قىزمەتشىلەر، سونداي-اق بۇرىنعى ك س ر وداعى ىشكى ىستەر جانە مەملەكەتتىك قاۋىپسىزدىك ورگاندارىنىڭ باسشى جانە قاتارداعى قۇرامىنىڭ ادامدارى؛

4) ۇلى وتان سوعىسى كەزەڭىندە مايدانداعى ارميا قۇرامىنا كىرگەن اسكەري بولىمدەردە، شتابتاردا، مەكەمەلەردە شتاتتىق لاۋازىمدار اتقارعان نە سول كەزەڭدەردە مايدانداعى ارميا بولىمدەرىنىڭ اسكەري قىزمەتشىلەرىنە قالالاردىڭ قورعانىسىنا قاتىسقانى ءۇشىن بەلگىلەنگەن جەڭىلدىكتى شارتتارمەن زەينەتاقى تاعايىنداۋ ءۇشىن 1998-جىلعى 1-قاڭتارعا دەيىن ەڭبەك سىڭىرگەن جىلدارىنا ەسەپتەلىپ جازىلعان، سول قالالاردا بولعان كەڭەس ارمياسىنىڭ، اسكەري-تەڭىز فلوتىنىڭ، بۇرىنعى ك س ر وداعىنىڭ ىشكى ىستەر جانە مەملەكەتتىك قاۋىپسىزدىك اسكەرلەرى مەن ورگاندارىنىڭ ەرىكتى جالدامالى قۇرامىنىڭ ادامدارى؛

5) ەكىنشى دۇنيەجۇزىلىك سوعىس جىلدارىندا شەت ەلدەردىڭ اۋماعىندا پارتيزاندىق جاساقتار، استىرتىن توپتار جانە باسقا دا فاشيزمگە قارسى قۇرالىمدار قۇرامىندا فاشيستىك گەرمانياعا جانە ونىڭ وداقتاستارىنا قارسى ۇرىس قيمىلدارىنا قاتىسقان ادامدار؛

6) لەنينگراد قالاسىنداعى قورشاۋ كەزەڭىندە قالانىڭ كاسىپورىندارىندا، مەكەمەلەرى مەن ۇيىمدارىندا جۇمىس ىستەگەن جانە «لەنينگرادتى قورعاعانى ءۇشىن» مەدالىمەن نەمەسە «قورشاۋداعى لەنينگراد تۇرعىنى» بەلگىسىمەن ناگرادتالعان ازاماتتار؛

7) ەكىنشى دۇنيەجۇزىلىك سوعىس كەزەڭىندە فاشيستەر مەن ولاردىڭ وداقتاستارى قۇرعان كونتسلاگەرلەردەگى، گەتتولارداعى جانە باسقا دا ماجبۇرلەپ ۇستاۋ ورىندارىنداعى كامەلەتكە تولماعان تۇتقىندار؛

8) قىزمەتتىك مىندەتتەرىن اتقارۋ كەزىندە جارالانۋى، كونتۋزيا الۋى، مەرتىگۋى سالدارىنان نە مايداندا بولۋىنا نەمەسە ۇرىس قيمىلدارى جۇرگىزىلگەن مەملەكەتتەردە قىزمەتتىك مىندەتتەرىن ورىنداۋىنا بايلانىستى اۋرۋعا شالدىعۋى سالدارىنان مۇگەدەكتىك بەلگىلەنگەن، بۇرىنعى ك س ر وداعىنىڭ مەملەكەتتىك قاۋىپسىزدىك ورگاندارىنىڭ جانە ىشكى ىستەر ورگاندارىنىڭ باسشى جانە قاتارداعى قۇرامىنىڭ ادامدارى؛

9) ۇلى وتان سوعىسى جىلدارىندا تىلداعى قاجىرلى ەڭبەگى مەن ءمىنسىز اسكەري قىزمەتى ءۇشىن بۇرىنعى ك س ر وداعىنىڭ وردەندەرىمەن جانە مەدالدارىمەن ناگرادتالعان ادامدار؛

10) 1941-جىلعى 22-ماۋسىمنان باستاپ 1945-جىلعى 9-مامىر ارالىعىنداعى كەزەڭدە كەمىندە التى اي جۇمىس ىستەگەن (قىزمەت وتكەرگەن) جانە ۇلى وتان سوعىسى جىلدارىندا تىلداعى قاجىرلى ەڭبەگى مەن مىنسىز اسكەري قىزمەتى ءۇشىن بۇرىنعى ك س ر وداعىنىڭ وردەندەرىمەن جانە مەدالدارىمەن ناگرادتالماعان ادامدار؛

11) ۇلى وتان سوعىسى كەزەڭىندە جارالانۋى، كونتۋزيا الۋى، مەرتىگۋى نەمەسە اۋرۋعا شالدىعۋى سالدارىنان مۇگەدەكتىگى بار قايتىس بولعان ادامنىڭ ەكىنشى رەت نەكەگە تۇرماعان زايىبى (جۇبايى)، سونداي-اق جالپى اۋرۋعا شالدىعۋى، جۇمىستا مەرتىگۋى جانە باسقا دا سەبەپتەر (قۇقىققا قارسى كەلەتىندەردى قوسپاعاندا) سالدارىنان بولعان مۇگەدەكتىگى بار ادام دەپ تانىلعان، قايتىس بولعان ۇلى وتان سوعىسى قاتىسۋشىسىنىڭ، پارتيزاننىڭ، استىرتىن ارەكەت ەتۋشىنىڭ، «لەنينگرادتى قورعاعانى ءۇشىن» مەدالىمەن نەمەسە «قورشاۋداعى لەنينگراد تۇرعىنى» بەلگىسىمەن ناگرادتالعان ازاماتتىڭ ەكىنشى رەت نەكەگە تۇرماعان زايىبى (جۇبايى)

12) ۇلى وتان سوعىسىندا قازا تاپقان (قايتىس بولعان، حابار-وشارسىز كەتكەن) جاۋىنگەرلەردىڭ ەكىنشى رەت نەكەگە تۇرماعان جەسىرلەرى ناگرادتالادى.

3. مەرەكەلىك مەدالمەن ناگرادتالاتىن ادامداردىڭ تىزىمدەرىن (بۇدان ءارى - تىزىمدەر) جاساۋ جانە بەكىتۋ مىناداي تارتىپپەن جۇرگىزىلەدى:

1) تىزىمدەردى وبلىستاردىڭ، رەسپۋبليكالىق ماڭىزى بار قالالاردىڭ، استانانىڭ جەرگىلىكتى اسكەري باسقارۋ ورگاندارى جاسايدى؛

2) تىزىمدەردى جاساۋعا جاۋاپتى لاۋازىمدى ادامدار ولارعا قول قويادى جانە ولاردى وبلىستار، رەسپۋبليكالىق ماڭىزى بار قالالار، استانا جەرگىلىكتى اسكەري باسقارۋ ورگاندارىنىڭ باسشىلارى 2025-جىلعى 15-ساۋىرگە دەيىنگى مەرزىمدە بەكىتەدى.

3) بەكىتىلگەن تىزىمدەر 2025-جىلعى 20-ساۋىرگە دەيىنگى مەرزىمدە قازاقستان رەسپۋبليكاسىنىڭ جەرگىلىكتى اتقارۋشى ورگاندارىنا بەرىلەدى.

4. مەرەكەلىك مەدالدى قازاقستان رەسپۋبليكاسىنىڭ پرەزيدەنتى اتىنان جانە ونىڭ تاپسىرماسى بويىنشا تىزىمدەر بەكىتىلگەن كۇننەن باستاپ التى ايدان كەشىكتىرىلمەيتىن مەرزىمدە قازاقستان رەسپۋبليكاسىنىڭ جەرگىلىكتى اتقارۋشى ورگاندارى تابىس ەتەدى. مەرەكەلىك مەدال ناگرادتالاتىن ادامداردىڭ تىزىمگە ەنگىزىلگەن جەرى بويىنشا تابىس ەتىلەدى.

ناگرادتالاتىن ادامعا مەرەكەلىك مەدالمەن بىرگە مەدالدىڭ كۋالىگى تابىس ەتىلەدى.