مەملەكەت باسشىسى ۇلتتىق قاۋىپسىزدىك كوميتەتىنىڭ باسشىلىق قۇرامىمەن جيىن وتكىزدى
استانا. KAZINFORM - پرەزيدەنت قاسىم-جومارت توقايەۆ ۇلتتىق قاۋىپسىزدىك كوميتەتىنە بارىپ، جەدەل-تەحنيكالىق بولىمشەلەردىڭ جۇمىسىمەن تانىستى، دەپ حابارلايدى اقوردانىڭ باسپا ءسوز قىزمەتى.
مەملەكەت باسشىسىنا كيبەرقاۋىپسىزدىكتى قامتاماسىز ەتۋ، جاساندى ينتەللەكت تەحنولوگيالارىن پايدالانۋ مۇمكىندىكتەرى، ۇكىمەتتىك جانە قىزمەتتىك بايلانىستى دامىتۋ جوبالارى كورسەتىلدى.
قاسىم-جومارت توقايەۆ باياندامالاردى تىڭداپ، اقپاراتتىق قاۋىپسىزدىككە تونەتىن قاتەردى تويتارۋ جانە ەلىمىزدىڭ ماڭىزدى ينفراقۇرىلىمىنىڭ تۇراقتى جۇمىس ىستەۋىنە جاعداي جاساۋدىڭ ماڭىزىن اتاپ ءوتتى.
جيىن سوڭىندا پرەزيدەنت اتالعان باعىتتاعى ءىس- قيمىلدى جەتىلدىرۋ بويىنشا ءبىرقاتار ناقتى تاپسىرما بەردى.
وسىعان دەيىن اسكەري وقۋ ورىندارىنىڭ 14 تۇلەگى توقايەۆتىڭ قولىنان وفيتسەرلىك شەن العانى تۋرالى جازدىق.