مەملەكەت باسشىسى جازعى وليمپيادا ويىندارىنىڭ جۇلدەگەرلەرىمەن كەزدەستى
استانا. KAZINFORM - پرەزيدەنت قاسىم-جومارت توقايەۆ سالتاناتتى جيىنعا قاتىسۋشى سپورتشىلار مەن باپكەرلەردى پاريج وليمپياداسىنداعى جەتىستىكتەرىمەن قۇتتىقتاپ، ءاربىر جەڭىس زور ەرىك- جىگەر مەن قاجىرلى ەڭبەكتىڭ جەمىسى ەكەنىنە نازار اۋداردى، دەپ حابارلايدى اقوردانىڭ باسپا ءسوز قىزمەتى.
مەملەكەت باسشىسى، ەڭ الدىمەن، وليمپيادا چەمپيونى ەلدوس سمەتوۆتىڭ جەڭىسىنە ەرەكشە توقتالدى.
- ول بايراقتى باسەكەنىڭ العاشقى كۇندەرى جاقسىلىق ۇشكەمپىروۆتىڭ داڭقتى جولىن جالعادى. ەل تاريحىندا تۇڭعىش رەت دزيۋدودان وليمپيادانىڭ التىن مەدالىن الدى. ەلدوس باۋىرىم، سەن وليمپياداعا اتتانار الدىندا ماعان جانە بارلىق سپورت جانكۇيەرلەرىنە بار كۇش- جىگەرىمدى جەڭىسكە جەتۋ ءۇشىن جۇمسايمىن دەپ ۋادە بەردىڭ. سوزىڭدە تۇردىڭ. ناعىز جىگىتسىڭ! ءبىز ءبارىمىز سەنى ماقتان تۇتامىز. شىن مانىندە، قاتارىنان ءۇش رەت وليمپيادا جۇلدەگەرى اتانۋ - ناعىز چەمپيوننىڭ قولىنان كەلەتىن ەرلىك. سەنىڭ جەڭىستى جولىڭ سپورتشىلارىمىزعا جىگەر بەردى، بارشا حالقىمىزدى قۋانىشقا بولەدى، - دەدى پرەزيدەنت.
قاسىم- جومارت توقايەۆ ءتورتجىلدىقتىڭ دوداسىنان جۇلدەمەن ورالعان وزگە سپورتشىلارعا، باپكەرلەر مەن اتلەتتەردى دايىنداۋعا ۇلەس قوسقان ازاماتتارعا العىس ايتتى.
- ناريمان قۇربانوۆتىڭ كۇمىس جۇلدەسىن تاريحي جەتىستىك دەۋگە بولادى. گيمناستيكا شەبەرلەرى تۇڭعىش رەت وليمپيادا بيىگىن باعىندىرىپ وتىر. دەمەۋ جادىرايەۆ پەن نۇربەك ورالباي تاماشا ونەر كورسەتتى. مەرگەندەرىمىز الەكساندرا لە مەن يسلام ساتبايەۆ نىسانا كوزدەۋدەن قولا مەدال الدى. بۇل - 28 جىلدان بەرى ەلىمىزدىڭ وسى سپورت تۇرىنەن العان العاشقى جۇلدەسى.
بالۋان عۇسمان قىرعىزبايەۆ پەن بوكسشى نازىم قىزايباي جۇلدەگەرلەر قاتارىنا قوسىلدى. جالپى بارلىق مەملەكەت وليمپياداعا ەڭ مىقتى سپورتشىلارىن جىبەرەدى. شىن مانىندە، جۇزدەن جۇيرىك، مىڭنان تۇلپار شىعىپ، الەمدىك باسەكەدە جەڭىسكە جەتۋ وڭاي ەمەس. مۇنداي جاھاندىق دودادا ەل قورجىنىنا تۇسكەن ءار مەدالدىڭ ورنى ايرىقشا. سوندىقتان بۇگىن مەن وليمپيادا جۇلدەسىنە يە بولعان بارشا سپورتشىلارىمىزعا شىنايى ريزاشىلىعىمدى بىلدىرەمىن. جەڭىس جولىندا سپورتشى عانا ەمەس، سول سالانىڭ كوپتەگەن ماماندارى دا تەر توگەدى. مەن باپكەرلەرگە، سپورتشىلاردى دايىنداۋعا ۇلەس قوسقان باسقا دا كاسىپ يەلەرىنە العىس ايتامىن. ۇلتتىق وليمپيادا كوميتەتىنىڭ باسشىلارى جۇمىسقا جاڭا سەرپىن بەرىپ، حالىقارالىق ىنتىماقتاستىقتى دامىتۋ ءۇشىن ماڭىزدى قادام جاسادى. جاۋاپتى ساتتەردە سپورتشىلارىمىزدىڭ قاسىندا بولىپ، قولداۋ كورسەتتى. ۇلتتىق وليمپيادا كوميتەتى باستاعان ءىستى جالعاستىرىپ، الداعى ۋاقىتتا ناقتى ناتيجەگە جەتەدى دەپ ويلايمىن، - دەدى مەملەكەت باسشىسى.
پرەزيدەنتتىڭ ايتۋىنشا، پاريجدەگى باسەكە وليمپيادالىق سپورت تۇرلەرىن ودان ءارى قولداۋ ماڭىزدى ەكەنىن كورسەتتى. ويتكەنى كەيبىر سپورتشىلارىمىز جەڭىس تۇعىرىنا قولسوزىم جەردەن توقتادى، ۇزدىك وندىقتان كورىندى. بۇل ولاردىڭ شەبەرلىگىن ءارى جەڭىسكە دەگەن ەرىك- جىگەرىن بايقاتادى. ايتسە دە، مەملەكەت باسشىسىنىڭ پىكىرىنشە، كاسىبي سپورتتا شەشىمىن كۇتكەن تۇيتكىلدى ماسەلەلەر دە بارشىلىق.
- مەملەكەت ەڭ جوعارى دەڭگەيدەگى سپورتشىلاردى دايىنداۋعا جەتكىلىكتى مولشەردە قارجى بولەدى. سوندىقتان جۇرتشىلىقتىڭ حالىقارالىق جارىستاردا كەيبىر سپورت تۇرلەرىنەن جۇلدە كۇتۋى - زاڭدىلىق. سالالىق ۆەدومستۆو سپورتتىڭ وليمپيادالىق تۇرلەرىن دامىتۋ ىسىندە كەتكەن جۇيەلى قاتەلىكتەردى ەگجەي- تەگجەيلى تالداۋعا ءتيىس. كەشەندى رەفورما جاسايتىن ۋاقىت كەلدى. ال ونى جۇزەگە اسىرۋ ءۇشىن قۇزىرەتتى مينيسترلىك، ۇلتتىق وليمپيادا كوميتەتى جانە سپورت فەدەراتسيالارى ۇيلەسىمدى ارەكەت ەتۋى كەرەك. سپورتتا ءادىل باسەكەلەستىك رۋحى سالتانات قۇرۋى قاجەت. جەمقورلىقپەن تاباندى تۇردە كۇرەسىپ، جوعارى ناتيجەگە قول جەتكىزۋگە كەدەرگى كەلتىرەتىن پروتەكسيونيزم سەكىلدى فاكتورلاردان ىرگەنى اۋلاق سالعان ءجون، - دەدى قاسىم-جومارت توقايەۆ.
مەملەكەت باسشىسى بۇقارالىق، سونداي-اق بالالار مەن جاسوسپىرىمدەر سپورتىنا باسا ءمان بەرۋ قاجەت ەكەنىن ايتتى.
- بۇل - وتە ماڭىزدى مىندەت. سەبەبى بۇقارالىق سپورتتى دامىتۋ ارقىلى ءبىز كاسىبي سپورتقا جول اشامىز جانە ەڭ باستىسى، ۇلت ساۋلىعىن جاقسارتامىز. سوندىقتان مەملەكەت سپورت ينفراقۇرىلىمىن دامىتۋ ءۇشىن ءتيىستى قاراجات بولۋدە، ياعني بالالاردىڭ جاستايىنان الاڭسىز سپورتپەن شۇعىلدانۋىنا قاجەتتى جاعدايدى جاساپ جاتىر. ەلىمىزدىڭ ايماقتارىندا 20 مىڭنان استام سپورت الاڭدارى جۇمىس ىستەپ تۇر، 16 مىڭنان اسا ارنايى كەشەندەر مەن زالدار بار. وسى نىسانداردىڭ بارلىعى تولىققاندى قىزمەت ەتۋگە ءتيىس جانە سپورتپەن اينالىسامىن دەگەن ءاربىر ادامعا قولجەتىمدى بولۋى كەرەك.
بارلىق وبلىس ورتالىعىندا جانە اۋدانداردا فۋتبول، بوكس، كۇرەس، باسكەتبول، ۆولەيبول، ساداق اتۋ، ۇستەل تەننيسى، شاحمات جانە تاعى دا باسقا تانىمال سپورت تۇرلەرىنىڭ سەكسياسى بولۋعا ءتيىس. بۇل - اكىمدەردىڭ مىندەتى. ال ۇكىمەت سپورت نىساندارىنىڭ جۇمىس تيىمدىلىگىنە ساراپتاما جۇرگىزىپ، وسى ماسەلە بويىنشا ءتيىستى شارالار قابىلداعانى دۇرىس، - دەدى پرەزيدەنت.