مەملەكەت باسشىسى جاڭا سالىق كودەكسىن قابىلدادى

استانا. KAZINFORM - مەملەكەت باسشىسى جاڭا سالىق كودەكسىنە جانە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە سالىق سالۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا قول قويدى، دەپ حابارلايدى اقوردانىڭ باسپا ءسوز قىزمەتى.

سالىق كودەكسى سالىقتىق اكىمشىلەندىرۋدى جاپپاي جەڭىلدەتۋدى كوزدەيدى. اتاپ ايتقاندا، سالىق ەسەپتىلىگىنىڭ كولەمى 30 پايىزعا قىسقارادى، سالىقتاردىڭ سانى 20 پايىزعا ازايادى، جەڭىلدىكتەر مەن الىمدار وڭتايلاندىرىلادى. ەلەۋلى وزگەرىستەر كورپوراتيۆتىك جانە جەكە تابىس سالىقتارىنان باستاپ ينۆەستيتسيالاردى ىنتالاندىرۋ جانە سالىق جۇكتەمەسىن قايتا ءبولۋ سەكىلدى بارلىق نەگىزگى باعىتتى قامتيدى.

قوسىلعان قۇن سالىعىنىڭ (ق ق س) جاڭا بازالىق مولشەرلەمەسى 16 پايىز بولىپ بەكىتىلدى. ءدارى-دارمەك پەن مەديتسينالىق قىزمەتتەرگە تومەندەتىلگەن ق ق س مولشەرلەمەسى بەلگىلەندى: 2026-جىلدان - 5 پايىز، 2027-جىلدان - 10 پايىز. بۇل رەتتە تەگىن مەديتسينالىق كومەكتىڭ كەپىلدىك بەرىلگەن كولەمى (ت م ك ك ك) مەن مىندەتتى الەۋمەتتىك مەديتسينالىق ساقتاندىرۋ اياسىنداعى قىزمەتتەر، ۇكىمەت ايقىندايتىن تىزبە بويىنشا ورفاندىق جانە الەۋمەتتىك ءمانى بار اۋرۋلاردى ەمدەۋ، سونداي-اق باسپا تۇرىندەگى كىتاپ شىعارۋ، ارحەولوگيالىق جۇمىس جۇرگىزۋ قىزمەتتەرى ق ق س- تان بوساتىلادى. مەرزىمدى باسپا باسىلىمداردى وتكىزۋ بويىنشا 10 پايىز دەڭگەيىندە تومەندەتىلگەن ق ق س مولشەرلەمەسى بەلگىلەنەدى.

ق ق س بويىنشا مىندەتتى ەسەپكە قويۋ ءۇشىن اينالىمنىڭ تومەنگى شەگى 10 مىڭ ايلىق ەسەپتىك كورسەتكىشكە (40 ميلليون تەڭگە) دەيىن تومەندەتىلەدى. ءبىرىڭعاي زەينەتاقى جيناقتاۋشى قورىنان (ب ز ج ق) تولەنەتىن زەينەتاقى تولەمدەرى جەكە تابىس سالىعىنان (ج ت س) بوساتىلادى. پايدالانىلۋ مەرزىمى 10 جىلدان جوعارى اۆتوموبيلدەر ءۇشىن كولىك قۇرالى سالىعى تومەندەتىلدى.

مۇگەدەكتىگى بار ادامدارعا الەۋمەتتىك سالىقتىق شەگەرىمدەر 882 دەن 5000 ا ە ك- كە دەيىن ۇلعايتىلدى.

سالىقتاردىڭ سانى ازايدى: ءبىرىڭعاي جەر سالىعى قىسقارتىلدى، جەكە تولەماقىلار بويىنشا مولشەرلەمەلەر مەن الىمداردىڭ سانى كەمىتىلدى. ارناۋلى سالىق رەجيمدەرى وڭتايلاندىرىلدى. ەندى ولار ءۇش جاعدايدا قولدانىلادى: ءوزىن-ءوزى جۇمىسپەن قامتىعاندار ءۇشىن، وڭايلاتىلعان دەكلاراتسيا نەگىزىندە جانە شارۋا قوجالىقتارى ءۇشىن. ءوزىن-ءوزى جۇمىسپەن قامتىعاندار تولەمدەردى موبيلدىك قوسىمشا ارقىلى ەسەپتەپ، تولەي الادى.

كورپوراتيۆتىك تابىس سالىعى (ك ت س) 20 پايىز دەڭگەيىندە ساقتالادى. الايدا سارالانعان سالىقتىق مولشەرلەمە ەنگىزىلەدى. اتاپ ايتقاندا، بانكتەر (بيزنەس سۋبەكتىلەرىن كرەديتتەۋدى قوسپاعاندا) مەن ويىن بيزنەسى ءۇشىن - 25 پايىز. الەۋمەتتىك سالا ۇيىمدارى ءۇشىن 2026-جىلى 5 پايىز مولشەرىندە بەلگىلەنىپ، 2027-جىلى 10 پايىزعا دەيىن ۇلعايادى.

اۋىل شارۋاشىلىعى تاۋارىن وندىرۋشىلەرگە 3 پايىز جەڭىلدەتىلگەن مولشەرلەمە قالادى. قور نارىعىن ىنتالاندىرۋ ءۇشىن بيرجالىق قۇندى قاعازدارعا تولەنەتىن ديۆيدەنتتەرگە سالىق جەڭىلدىكتەرى سول كۇيى ساقتالادى.

«بايتەرەك» حولدينگى شىعارعان قۇندى قاعازداردان تۇسەتىن كىرىس 2031-جىلعا دەيىن ك ت س- تەن بوساتىلادى.

پايدالى قازبالاردى وڭدەۋ مەن گەولوگيالىق بارلاۋ سالاسى ءۇشىن قوسىمشا پرەفەرەنتسيالار قاراستىرىلعان. اتاپ ايتقاندا، تيىمدىلىگى تومەن جاڭا ۋچاسكەلەر 5 جىلعا پايدالى قازبالاردى ءوندىرۋ سالىعىنان بوساتىلادى.

جەكە تابىس سالىعىنىڭ (ج ت س) پروگرەسسيۆتى مولشەرلەمەسى ەنگىزىلەدى. جىلدىق جالپى تابىسى 8500 ايلىق ەسەپتىك كورسەتكىشتەن اساتىن ازاماتتارعا 15 پايىز سالىق مولشەرلەمەسى قولدانىلادى. سول سياقتى ديۆيدەنتتەرى مەن تابىس كولەمى جىلىنا 230 مىڭ ا ە ك- تەن اساتىن كاسىپكەرلەر وسىنداي مولشەردە سالىق تولەيدى. ال فەرمەرلەردىڭ وسى مەجەدەن اساتىن تابىسىنا بۇرىننان ساقتالعان 70 پايىز جەڭىلدىكتى ەسەپكە الا وتىرىپ، 4,5 پايىز سالىق سالىنادى.

جەكە تۇلعالار ءۇشىن قىمبات ونىمدەرگە، اتاپ ايتقاندا قۇنى 75 ميلليون تەڭگەدەن اساتىن اۆتوكولىكتەرگە، قۇنى 100 ميلليون تەڭگەدەن اساتىن كەمەلەرگە، ءار ءليترىنىڭ قۇنى 500 مىڭ تەڭگەدەن اساتىن الكوگولگە، ءار داناسىنىڭ قۇنى 10 مىڭ تەڭگەدەن اساتىن تەمەكى ونىمدەرىنە 10 پايىز اكتسيز تۇرىندە سالىق سالىنادى.

سونىمەن قاتار جالپى قۇنى 450 ميلليون تەڭگەدەن اساتىن جىلجىمايتىن مۇلىك نىساندارىنا مۇلىك سالىعى جوعارىلايدى.

سالىقتىق اكىمشىلەندىرۋ تاسىلدەرى ايتارلىقتاي وزگەرەدى. كامەرالدىق باقىلاۋ ەسكەرتۋ سيپاتىندا بولادى. سالىقتىق بەرەشەكتى ءوندىرىپ الۋ، تولەمدى كەيىنگە قالدىرۋ جانە ءبولىپ تولەۋ مۇمكىندىگىن بەرۋ پروتسەدۋرالارى جەڭىلدەتىلەدى. سالىق بەرەشەگى از بولسا، بيزنەستىڭ ەسەپشوتتارى بۇعاتتالمايدى. قارىز سوماسىنا قاراي ەسكەرتۋ جانە باسقا دا شارالار كەزەڭ- كەزەڭىمەن قولدانىلادى.

ايتا كەتەيىك، كودەكس 2026-جىلعى 1-قاڭتاردان باستاپ كۇشىنە ەنەدى. كودەكستىڭ ءماتىنى باسپا سوزدە جاريالانادى.

بۇعان دەيىن پرەزيدەنت ق ر ۇ ق ك سىبايلاس جەمقورلىققا قارسى ءىس-قيمىل قىزمەتى تۋرالى ەرەجەنى بەكىتكەنىن جازعانبىز.