مەملەكەت باسشىسى حرومتاۋداعى «بولاشاق» شاحتاسىنىڭ جۇمىسىمەن تانىستى

شاحتانىڭ قۋاتتىلىعى جىلىنا 7,5 ميلليون توننا حروم رۋداسىن وندىرۋگە جەتەدى.

مەملەكەت باسشىسىنا جاڭا نىساندا 1800 جۇمىس ورنى قۇرىلاتىنى جونىندە مالىمەت بەرىلدى. تارتىلاتىن ينۆەستيتسيا كولەمى 1 تريلليون تەڭگەدەن اسادى.

Eurasian Resources Group ديرەكتورلار كەڭەسىنىڭ ءتوراعاسى شۋحرات يبراگيموۆ «بولاشاق» شاحتاسى ERG كومپانيالار توبىنىڭ ءىرى ينۆەستيتسيالىق جوبالارىنىڭ ءبىرى سانالاتىنىن اتاپ ءوتتى.

كاسىپورىن «ميلليوننوە» جانە «الماس- جەمچۋجينا» كەن ورىندارىن يگەرۋمەن اينالىسادى. كەن قازۋ ىسىنە اۆتوماتتى رەجيمدە بۇرعىلايتىن ينتەللەكتۋالدى بۇرعىلاۋ قوندىرعىسى، قاشىقتان جەر ۇستىندە باسقارۋ جۇيەسى، سونداي-اق تولىقتاي اۆتوماتتاندىرىلعان جۇك كوتەرۋ ماشينالارى سەكىلدى وزىق تەحنولوگيالار مەن زاماناۋي قۇرال-جابدىقتار قولدانىلادى.

كومپانيا باسشىسىنىڭ ايتۋىنشا، ءدوڭ تاۋ-كەن بايىتۋ كومبيناتىنا قاراستى «بولاشاق» شاحتاسىن ىسكە قوسۋ ەلىمىزدىڭ تاۋ- كەن ونەركاسىبىندەگى تاريحي وقيعا بولماق.