مەملەكەت باسشىسى G42 كومپانياسىنىڭ باسقارما ءتوراعاسى پەنگ سياونى قابىلدادى
استانا. KAZINFORM - مەملەكەت باسشىسى G42 كومپانياسىنىڭ باسقارما ءتوراعاسى پەنگ سياونى قابىلدادى، دەپ حابارلايدى اقوردانىڭ باسپا ءسوز قىزمەتى.
باسپا ءسوز قىزمەتىنىڭ مالىمەتتەرىنە قاراعاندا، قاسىم-جومارت توقايەۆقا قازاقستاندا جاساندى ينتەللەكت تەحنولوگيالارىن دامىتۋ بويىنشا بۇعان دەيىنگى كەزدەسۋلەردە قول جەتكىزىلگەن ۋاعدالاستىقتاردى جۇزەگە اسىرۋ بارىسى جونىندە مالىمەت بەرىلدى.
سونىمەن قاتار Smart City جۇيەسىن ەنگىزۋ باعىتىندا ىنتىماقتاستىقتىڭ پەرسپەكتيۆاسى تالقىلاندى. جوبا زاماناۋي تەحنولوگيالىق شەشىمدەردىڭ كومەگىمەن قالا تۇرعىندارىنىڭ ءومىر ءسۇرۋ ساپاسىن جاقسارتۋعا باعىتتالعان.
كەزدەسۋدە يننوۆاتسيالىق تەحنولوگيا جانە «اقىلدى» ينفراقۇرىلىم سالالارىندا قازاقستان مەن G42 كومپانياسى اراسىنداعى ىقپالداستىقتى كەڭەيتۋدىڭ تىڭ مۇمكىندىكتەرى قاراستىرىلدى.
وسىعان دەيىن قازاقستان مەن كانادا ەنەرگەتيكاداعى تەحنولوگيا بويىنشا ىنتىماقتاستىقتى نىعايتقالى جاتقانى تۋرالى جازدىق.