مەملەكەت باسشىسى فرانسيا پرەزيدەنتىمەن كەڭەيتىلگەن قۇرامدا كەلىسسوز جۇرگىزدى

پاريج. KAZINFORM - قاسىم-جومارت توقايەۆ فرانسيا تاراپىنىڭ قازاق دەلەگاتسياسىن ىستىق ىقىلاسپەن قارسى العانىن اتاپ ءوتىپ، ەممانيۋەل ماكرونعا العىس ايتتى. بۇل تۋرالى اقوردانىڭ باسپا ءسوز قىزمەتى حابارلادى.

- وسى ساپارىما ايرىقشا ءمان بەرەمىن. بۇل قازاقستان مەن فرانسيا اراسىنداعى ستراتەگيالىق سەرىكتەستىكتىڭ جاڭا بەلەسى بولماق. بۇگىنگى كەلىسسوزدەر جانە قابىلداناتىن بىرلەسكەن دەكلاراتسيا ارىپتەستىگىمىزدى كۇشەيتىلگەن ستراتەگيالىق دەڭگەيگە كوتەرۋگە ىقپال ەتەدى. وسى ورايلى ساتتە ءسىزدى پاريجدە وتكەن وتىز ءۇشىنشى وليمپيادا جانە پاراليمپيادا ويىندارىنىڭ تابىستى وتۋىمەن شىن جۇرەكتەن قۇتتىقتايمىن. بۇل جاھاندىق سپورتتاعى اسا اۋقىمدى ءارى ايتۋلى وقيعا ەكەنى انىق. الەم جۇرتشىلىعى جوعارى دەڭگەيدە وتكەن دوداعا كۋا بولدى. ءسىزدىڭ ەلىڭىز 2030 -جىلى فرانسۋز الپىلەرىندە جيىرما التىنشى قىسقى وليمپيادا ويىندارىن دا تاماشا دەڭگەيدە ۇيىمداستىراتىنىنا سەنىمدىمىن، - دەدى مەملەكەت باسشىسى.

قاسىم-جومارت توقايەۆ فرانسيا پرەزيدەنتىنىڭ بىلتىر استاناعا جاساعان ساپارى بارىسىندا قول جەتكىزىلگەن ۋاعدالاستىقتار مەن كەلىسىمدەر قازاق-فرانسۋز بايلانىسىن جان-جاقتى تەرەڭدەتۋگە زور سەرپىن بەرگەنىن ايتتى.

- قازىرگى تاڭدا مەملەكەتتەرىمىز اراسىندا بەلسەندى جانە سەنىمدى ساياسي ديالوگ بار. قازاقستان مەن فرانسيا حالىقارالىق ساحنادا تىعىز بايلانىس ورناتىپ، كوپجاقتى قۇرىلىمدار اياسىندا بەيبىتشىلىك پەن ورنىقتى دامۋ قاعيداتتارىن ىلگەرىلەتۋدە. فرانسيا - ءبىزدىڭ اسا ءىرى ساۋدا سەرىكتەستەرىمىزدىڭ ءبىرى. ءسىزدىڭ ەلىڭىز قازاقستان ەكونوميكاسىنا مول ينۆەستيتسيا سالىپ وتىرعان جەتەكشى ەلدەردىڭ قاتارىندا. بۇگىندە قازاقستاندا فرانسۋز كاپيتالى بار 200-دەن استام كومپانيا مەن بىرلەسكەن كاسىپورىن جۇمىس ىستەپ جاتىر. قازاقستاندا بەلسەندى جۇمىس ىستەۋگە ىنتالى فرانسۋز بيزنەس وكىلدەرىنە شىنايى ريزاشىلىعىمدى بىلدىرەمىن، - دەدى قاسىم-جومارت توقايەۆ.

قازاقستان پرەزيدەنتى مادەني- گۋمانيتارلىق بايلانىستار، سونىڭ ىشىندە ءبىلىم بەرۋ، عىلىم، مەديسينا جانە تاريح سالالارىنداعى ىنتىماقتاستىق قارقىندى دامىپ كەلە جاتقانىنا نازار اۋداردى. سونداي-اق الەمگە ايگىلى گيمە مۇراجايىندا اشىلعان قازاقستانىڭ ۇلتتىق ونەرىنە ارنالعان كورمەنى ايرىقشا ريزاشىلىقپەن اتاپ ءوتتى.

ءسوز سوڭىندا قاسىم-جومارت توقايەۆ بۇگىنگى ساپاردىڭ قورىتىندىلارى قوس حالىقتىڭ وركەندەۋىنە يگى ىقپال ەتەتىنىنە سەنىم ءبىلدىردى. فرانسيا پرەزيدەنتى قازاق-فرانسۋز ىنتىماقتاستىعىنىڭ دامۋىنا تىڭ سەرپىن بەرەتىن كەلىسسوزدەردىڭ ماڭىزىنا توقتالدى.

- ءسىزدىڭ ارقاڭىزدا سوڭعى جىلدارى ەكى ەل اراسىنداعى سەرىكتەستىك ايتارلىقتاي نىعايدى، - دەدى ەممانيۋەل ماكرون.

كەلىسسوزدەر بارىسىندا مەملەكەتتەر باسشىلارى ماشينا جاساۋ، كولىك-لوگيستيكا، اۋىل شارۋاشىلىعى، ەنەرگەتيكا، ونەركاسىپتىك كووپەراتسيا، كليمات، سيفرلىق دامۋ جانە دەنساۋلىق ساقتاۋ سالالارىنداعى ىنتىماقتاستىقتىڭ قازىرگى جاي-كۇيى مەن پەرسپەكتيۆاسىن ەگجەي-تەگجەيلى تالقىلادى. بۇدان بولەك، مادەني-گۋمانيتارلىق بايلانىستاردى نىعايتۋعا ءمان بەرىلدى.

پرەزيدەنتتەر وڭىرلىك جانە حالىقارالىق كۇن تارتىبىندەگى ءبىرقاتار وزەكتى ماسەلە جونىندە پىكىر الماستى.

ايتا كەتەيىك، بۇعان دەيىن پرەزيدەنتتىڭ فرانسيا رەسپۋبليكاسىنا مەملەكەتتىك ساپارمەن بارعانىن جازعانبىز.