مەملەكەت باسشىسى شىعىس وڭىرىندەگى ەليتالىق تۇقىم شارۋاشىلىعىنىڭ قىزمەتىمەن تانىستى
استانا. KAZINFORM - قاسىم-جومارت توقايەۆ «مايلى داقىلداردىڭ تاجىريبەلىك شارۋاشىلىعى» ج ش س- ىنە باردى، دەپ حابارلايدى اقوردانىڭ باسپا ءسوز قىزمەتى.
پرەزيدەنتكە كوپ جىلدىق پراكتيكالىق جانە عىلىمي-زەرتتەۋ جۇمىستارىنىڭ ناتيجەسىندە سۇرىپتالعان كۇنباعىستىڭ جاڭا بۋداندارى، سونداي-اق سويا مەن بيداي سورتتارى تانىستىرىلدى. كاسىپورىن دايىندايتىن تۇقىمدار وتاندىق شارۋالاردىڭ اراسىندا جوعارى سۇرانىسقا يە ءارى رەسەي فەدەراتسياسىنىڭ 7 ولكەسىنە ەكسپورتتالادى.
قاسىم-جومارت توقايەۆ ەلىمىزدە مايلى داقىلداردىڭ ەگىستىك الاڭىن كوبەيتۋدىڭ پەرسپەكتيۆاسى جونىندە سۇرادى. مەكەمە باسشىسى فاريد ابىتايەۆتىڭ ايتۋىنشا، سوڭعى كەزدە مايلى داقىلداردى ەگۋ كولەمى جىل سايىن 12-15 پايىزعا ارتىپ كەلەدى، سايكەسىنشە، نارىقتاعى سۇرانىس تا جوعارى.
بۇعان قوسا، مول جەم-ءشوپ قورى مەن سەلەكتسيالىق جۇمىستى ساۋاتتى جۇرگىزۋدىڭ ارقاسىندا اگروونەركاسىپ كەشەنى ءسۇت ونىمدەرى باعىتىنداعى جەتەكشى مال شارۋاشىلىعىنىڭ قاتارىنا كىردى.
بۇگىندە سەرىكتەستىكتىڭ تاۋارلى ءسۇت فەرمالارىندا 3 مىڭعا جۋىق ءىرى قارا بار. ولاردىڭ كوبى - گولشتەين-فريز تۇقىمىنا جاتاتىن سيىرلار. فەرمادا تاۋلىگىنە 40 توننا ءسۇت ءوندىرىلىپ، ەلىمىزدەگى ءتورت ءسۇت وڭدەۋ زاۋىتىنا جونەلتىلەدى.
مەملەكەت باسشىسى كاسىپورىننىڭ اۋىل شارۋاشىلىعى عىلىمىنداعى تابىسىن وڭ باعالاپ، مۇنداي تاجىريبەنى ەلىمىزدىڭ باسقا وڭىرلەرىنە تاراتۋ قاجەت ەكەنىن ايتتى.
پرەزيدەنتكە د. سەرىكبايەۆ اتىنداعى شىعىس قازاقستان تەحنيكالىق ۋنيۆەرسيتەتىمەن بىرلەسىپ اشىلعان وقۋ كابينەتى تانىستىرىلدى. مۇندا جۇمىسشىلار وندىرىستەن قول ۇزبەي، اگرومەنەدجمەنتتىڭ قىر-cىرىن مەڭگەرەدى. كاسىپورىن وسىمدىكتەردى قورعايتىن زاتتار ءوندىرۋ ءىسى بويىنشا ۇزدىكتەردىڭ ءبىرى سانالاتىن شۆەيتساريالىق Syngenta كومپانياسىمەن جانە اۋىل شارۋاشىلىعى تەحنيكاسىن شىعارۋشى امەريكالىق John Deere كومپانياسىمەن دە وسىنداي ىنتىماقتاستىقتى جولعا قويىپ جاتىر.