مەملەكەت باسشىسى شاحماتتان الەم چەمپيونى قازىبەك نوگەربەكتى قۇتتىقتادى

استانا. KAZINFORM - پرەزيدەنت قاسىم-جومارت توقايەۆ ءۇندىستاننىڭ گانديناگار قالاسىندا وتكەن حالىقارالىق جارىستا الەم چەمپيونى اتانعان قازىبەك نوگەربەككە قۇتتىقتاۋ جەدەلحاتىن جولدادى.

- ەل نامىسىن قورعاپ، ۇزدىك شاحماتشى رەتىندە گروسسمەيستەر دارەجەسىن يەلەنىپ، جەڭىمپاز اتانۋ - زور جەتىستىك. ۇلتىمىزدىڭ ابىرويىن اسقاقتاتاتىن ءوزىڭ سياقتى العىر دا اقىلدى ۇرپاقتىڭ ءوسىپ كەلە جاتقانى قۋانتادى. الداعى ۋاقىتتا دا جارقىن جەڭىستەرگە جانە ارمان-ماقساتتارىڭا جەتە بەرۋىڭە تىلەكتەسپىن، - دەلىنگەن جەدەلحاتتا.

ەسكە سالا كەتەيىك، كەشە قازىبەك نوگەربەك 20 جاسقا دەيىنگىلەر اراسىندا الەم چەمپيونى اتانعان بولاتىن.

ءدۇبىرلى دودا 2-13-ماۋسىم ارالىعىندا ءۇندىستاننىڭ گانديناگار قالاسىندا ءوتتى.

بۇگىنگە دەيىن مۇنداي جەتىستىككە ەلىمىزدەن ءۇش شاحماتشى قول جەتكىزگەن.

اتاپ ايتقاندا، دارمەن ءسادۋاقاسوۆ – 1998، دينارا ءسادۋاقاسوۆا – 2016، جانسايا ابدىمالىك - 2017 -جىلى جەڭىس تۇعىرىنان كورىنگەن.