مەملەكەت باسشىسى عىلىم سالاسىندا جەمقورلىق فاكتىلەرىنىڭ كوبەيىپ كەتكەنىن ايتتى

استانا. KAZINFORM - پرەزيدەنت قاسىم-جومارت توقايەۆ ەل عالىمدارىمەن باس قوسۋدا تاۋەلسىزدىكتىڭ العاشقى جىلدارىندا عىلىمعا باسا ءمان بەرىلمەگەنىن ەسكە سالدى.

سونىڭ سالدارىنان كوپتەگەن عالىم باسقا سالاعا اۋىسىپ كەتتى. قازاقستانداعى عىلىمي قىزمەتكەرلەردىڭ سانى ءۇش ەسە ازايىپ، بۇل احۋال ۇلتتىڭ زياتكەرلىك الەۋەتىنە وراسان زور كەسىرىن تيگىزگەن.

بۇدان بولەك، مەملەكەت باسشىسى عىلىم سالاسىندا جەمقورلىق فاكتىلەرىنىڭ كوبەيىپ كەتكەنىن دە تىلگە تيەك ەتتى. ماسەلەن، «پاراسات» حولدينگىن باسقارعان بەلگىلى اكادەميك ونى ابدەن توناپ، كەيىن بالالارىمەن بىرگە ا ق ش- تىڭ ازاماتتىعىن الىپ، مۇحيتتىڭ ار جاعىنا قاشىپ كەتكەن. دەگەنمەن بۇگىندە جاعداي وڭالىپ، عىلىم قايتادان تورگە شىققانىن اتاپ ءوتتى. بۇل - مەملەكەتتىڭ ناعىز، ادال عالىمدارعا سەنىمى دەگەن ءسوز.

- مەملەكەت عىلىمدى دامىتۋ ءۇشىن ناقتى شارالار قابىلداپ جاتىر. مەن وسىدان ءۇش جىل بۇرىن عىلىم اكادەمياسىن جاڭعىرتۋ تۋرالى تاپسىرما بەردىم. سودان بەرى اۋقىمدى جۇمىس جاسالۋدا. اكادەمياعا جوعارى عىلىمي ۇيىم مارتەبەسى بەرىلدى. ينفراقۇرىلىم جۇيەسى جاڭارتىلىپ جاتىر. كادر دايارلاۋ ءىسى جولعا قويىلدى. بىلتىر قابىلدانعان «عىلىم جانە تەحنولوگيالىق ساياسات تۋرالى» زاڭ وسى ۇردىستەرگە تىڭ سەرپىن بەردى. قۇجاتتا عىلىمدى باسقارۋ تاسىلدەرى ناقتىلاندى. عالىمداردى الەۋمەتتىك قولداۋ شارالارى ايقىندالدى. ءبىر سوزبەن ايتساق، زاڭدا عىلىم جولىندا ەڭبەك ەتىپ جۇرگەن ازاماتتاردىڭ مۇددەسى بارىنشا ەسكەرىلدى، - دەدى قاسىم-جومارت توقايەۆ.

عىلىم - ستراتەگيالىق ماڭىزى بار سالا بولعاندىقتان سوڭعى جىلدارى بۇل باعىتقا بولىنەتىن قارجى 3,5 ەسە ارتتى، جاس زەرتتەۋشىلەرگە قولداۋ كۇشەيدى. مەملەكەت باسشىسىنىڭ پىكىرىنشە، وسىنداي قادامدار ەلىمىزدىڭ عىلىمي الەۋەتىن ارتتىرا تۇسەدى. قازىر قازاقستاندا 25 مىڭنان استام عالىم بولسا، ولاردىڭ جارتىسى - 40 جاسقا تولماعان ماماندار. بۇل ەلىمىزدە عالىمداردىڭ جاڭا بۋىنى قالىپتاسىپ كەلە جاتقانىن كورسەتەدى.

ايتا كەتەيىك، بۇعان دەيىن پرەزيدەنت قازىرگى الەمدىك احۋالعا توقتالدى.