جاساندى ينتەللەكت سالاسىندا ماماندار دايارلاۋ ءۇشىن ستيپەنديا ءبولۋ جوسپارلانىپ وتىر

استانا. KAZINFORM - مەملەكەت باسشىسى عىلىم جانە جوعارى ءبىلىم ءمينيسترى ساياسات نۇربەكتى قابىلدادى. بۇل تۋرالى اقوردانىڭ باسپا ءسوز قىزمەتى ءمالىم ەتتى.

ساياسات نۇربەك:

جوعارى ءبىلىم جانە عىلىم جۇيەسىن دامىتۋعا باعىتتالعان ءبىرقاتار باستاما مەن جوبالاردى تانىستىردى؛

ەلىمىزدە وسى ۋاقىتقا دەيىن شەتەلدىك جوعارى وقۋ ورىندارىنىڭ 25 فيليالى اشىلعانىن ايتتى:

- شەتەلدىك سەرىكتەستەرمەن ايماقتارداعى مەملەكەتتىك ۋنيۆەرسيتەتتەردى حالىقارالىق ءبىلىم بەرۋ ستاندارتتارى بار زەرتتەۋ ۋنيۆەرسيتەتتەرىنە اينالدىرۋ تۋرالى كەلىسىمدەرگە قول جەتكىزىلگەن؛

- بيىل ستۋدەنتتەرگە قارجىلاي قولداۋ كورسەتۋدىڭ جاڭا تەتىكتەرى ەنگىزىلە باستادى. ولاردىڭ قاتارىنا «كەلەشەك» ءبىرىڭعاي ەرىكتى جيناقتاۋ جۇيەسىن، «ۇلتتىق قور - بالالارعا» باعدارلاماسىن، جەڭىلدەتىلگەن ءبىلىم بەرۋ نەسيەسى مەن ديففەرەنتسيالانعان گرانتتاردى جاتقىزۋعا بولادى. اتالعان شارالار حالىقتىڭ بارلىق ساناتىنا جوعارى ءبىلىمنىڭ قولجەتىمدى بولۋىن قامتاماسىز ەتۋگە باعىتتالعان.

جاساندى ينتەللەكتىنى دامىتۋ جونىندەگى پرەزيدەنت تاپسىرمالارىنىڭ ورىندالۋى تۋرالى ەسەپ بەردى:

- قازىر 8 جوعارى وقۋ ورنىندا 15 ءبىلىم بەرۋ باعدارلاماسى بويىنشا 2000 نان استام ستۋدەنت جاساندى ينتەللەكت سالاسىن وقىپ جاتىر؛

- سيفرلىق ەكونوميكاعا بەيىمدەلگەن كادرلاردىڭ الەۋەتىن دامىتۋ ءۇشىن Google، Nvidia, Coursera, 01 Edu System جانە Huawei سياقتى ترانسۇلتتىق كومپانيالارمەن ىنتىماقتاستىق ورناتىلعان؛

- جاساندى ينتەللەكت سالاسىندا ماماندار دايارلاۋ ءۇشىن «بولاشاق» باعدارلاماسى ارقىلى جىل سايىن 100 ستيپەنديا ءبولۋ جوسپارلانىپ وتىر.

كەزدەسۋ سوڭىندا مەملەكەت باسشىسى جاتاقحانالار سالۋ، جوعارى ءبىلىم مەن عىلىم ينفراقۇرىلىمىن ودان ءارى دامىتۋ جونىندە ءبىرقاتار تاپسىرما بەردى.