مەملەكەت باسشىسى اۋىل شارۋاشىلىعى ءمينيسترى ايداربەك ساپاروۆتى قابىلدادى

استانا. KAZINFORM - پرەزيدەنتكە اگرارلىق سالانى دامىتۋدىڭ بيىلعى 9 ايداعى قورىتىندىسى باياندالدى. ءمينيستردىڭ ايتۋىنشا، بۇگىندە ەگىننىڭ 98 پايىزى جينالىپ، 25,2 ميلليون توننا استىق باستىرىلعان.

ورتاشا ونىمدىلىك ءار گەكتاردان 15,5 تسەنتنەردى قۇرايدى. ديقاندار 1,2 ميلليون توننا قانت قىزىلشاسىن جيناماق. بۇل - رەكوردتىق كورسەتكىش. سونىمەن قاتار جەم-ءشوپ تۇرلەرىن دە كوپتەپ جيناۋ جوسپارلانىپ وتىر.

مەملەكەت باسشىسىنىڭ تاپسىرماسىنا سايكەس، ەگىن ەگۋ جانە جيناۋ ناۋقانىن قارجىلاندىرۋ كولەمىن ۇلعايتۋ شارالارى قولعا الىندى. بيىل وسى ماقساتقا العاش رەت 5 پايىز مولشەرلەمەمەن 580 ميلليارد تەڭگە ءبولىندى. قارجى شارۋالارعا سۋبسيدياسىز، تىكەلەي بەرىلەدى. بۇل وتكەن جىلمەن سالىستىرعاندا ءۇش ەسە كوپ. ايداربەك ساپاروۆتىڭ ايتۋىنشا، 2025-جىلى اتالعان باعىتتاعى قارجىلاندىرۋ كولەمىن 900 ميلليارد تەڭگەگە دەيىن ۇلعايتۋ كوزدەلىپ وتىر. ونىڭ ىشىندە جەڭىلدەتىلگەن ليزينگ ارقىلى اۋىل شارۋاشىلىعى تەحنيكاسىن الۋعا 200 ميلليارد تەڭگە بولىنەدى. تومەن پايىزبەن بەرىلەتىن نەسيەنى ءتيىمدى پايدالانىپ، سىبايلاس جەمقورلىق تاۋەكەلدەرىن ازايتۋ ءۇشىن مەملەكەتتىك قولداۋ تەتىكتەرىنە وزگەرىس ەنگىزىلدى.

قاسىم-جومارت توقايەۆقا بيىلعى 9 ايدا 796 مىڭ توننادان استام ەت وندىرىلگەنى جونىندە مالىمەت بەرىلدى. بۇل وتكەن جىلدىڭ وسى كەزەڭىمەن سالىستىرعاندا 4,5 پايىزعا ارتىق. ءسۇت ءوندىرۋ كولەمى 4,2 پايىزعا ءوسىپ، 2,8 ميلليون توننانى قۇراعان.

اۋىل شارۋاشىلىعى ونىمدەرىن قايتا وڭدەۋدى دامىتۋدىڭ 2028-جىلعا دەيىنگى كەشەندى جوسپارى اياسىندا كاسىپورىنداردىڭ جۇكتەمەسىن ۇلعايتۋ جانە وتاندىق ءونىمدى وتكىزۋ نارىقتارىن كەڭەيتۋ ءۇشىن ءتيىستى شارالار قابىلدانىپ جاتىر. ءسۇت، ەت، كۇنباعىس، كۇرىش، جۇگەرى جانە قاراقۇمىق وڭدەۋدى 70 پايىزعا دەيىن جەتكىزۋ كوزدەلگەن.

بۇدان بولەك، مەملەكەت باسشىسىنا ۆەدومستۆونىڭ كەلەسى جىلعا ارنالعان جوسپارى تانىستىرىلدى. مينيستر ەگىستىكتەردى جەدەل ءارتاراپتاندىرۋ جۇمىستارى جالعاساتىنىن ايتتى. ول ءۇشىن سۋدى كوپ شىعىندايتىن جانە ءبىر عانا داقىل ءتۇرى ەگىلەتىن القاپتاردى ازايتىپ، كوبىرەك پايدا اكەلەتىن ءونىم تۇرلەرىن وسىرۋگە باسىمدىق بەرىلەدى.

كەزدەسۋ سوڭىندا قاسىم-جومارت توقايەۆ اۋىل شارۋاشىلىعى مينيسترىنە اگروونەركاسىپ كەشەنىن ودان ءارى دامىتۋ جانە ازىق-تۇلىك قاۋىپسىزدىگىن قامتاماسىز ەتۋ بويىنشا ءبىرقاتار تاپسىرما بەردى.