مەملەكەت باسشىسى استاناداعى جاڭا ءورت ءسوندىرۋ بولىمىنە باردى
استانا. KAZINFORM - قاسىم-جومارت توقايەۆ ەلوردادا قىسقا مەرزىمدە بوي كوتەرگەن ءورت ءسوندىرۋ ءبولىمىنىڭ جۇمىسىمەن تانىستى. مۇنداعى ءورت سوندىرۋشىلەر 96 مىڭنان استام تۇرعىنى بار الماتى اۋدانىنا قىزمەت كورسەتەدى.
ءبولىمنىڭ ءورت قاۋىپسىزدىگىن قامتاماسىز ەتۋ اۋماعىنا «وڭتۇستىك-شىعىس» تۇرعىن الابى، سونداي-اق بەيبىتشىلىك جانە كەلىسىم سارايى، تاۋەلسىزدىك سارايى، ازىرەت سۇلتان مەشىتى جانە «نۇرلى جول» ۆوكزالى سياقتى ماڭىزدى نىساندار كىرەدى. ءورت سوندىرۋشىلەر جۇمىسىن باستاعان ەكى اي ىشىندە 200-گە جۋىق دابىلعا جەدەل شىعىپ ۇلگەرگەن.
ساپالى ءارى تەز قۇراستىرىلاتىن مودۋلدى ماتەريالداردان سالىنعان ءورت ءسوندىرۋ دەپوسى فۋنكسيونالدىق تۇرعىدان وتە قولايلى. عيماراتتا جۇمىس، ديسپەتچەرلىك، دەمالىس بولمەلەرى، وقۋ سىنىبى جانە اس ءۇي قاراستىرىلعان. جابىق تۇراققا التى ارنايى تەحنيكا سىيادى.
پرەزيدەنتكە ءورت ءسوندىرۋ جانە قۇتقارۋ وپەراتسيالارىنا ارنالعان زاماناۋي جابدىقتار كورسەتىلدى. سونىمەن قاتار بيىك عيماراتتارداعى ءورتتى وشىرۋگە پايدالانىلاتىن درونداردىڭ جۇمىسى تانىستىرىلدى.
مەملەكەت باسشىسى ءورت ءسوندىرۋ ءبولىمىنىڭ قىزمەتكەرلەرىمەن سويلەسىپ، وسىنداي زاماناۋي مودۋلدى ءورت ءسوندىرۋ دەپولارى ەلىمىزدىڭ بارلىق وڭىرىنە قاجەت ەكەنىن جانە اتالعان جوبانىڭ اياسى كەڭەيتىلەتىنىن جەتكىزدى. پرەزيدەنتتىڭ ايتۋىنشا، ءورت سوندىرۋشىلەر مەن قۇتقارۋشىلاردىڭ الەۋمەتتىك ماسەلەلەرىن شەشۋ جانە باسپانامەن قامتۋ جۇمىستارى جالعاسادى.
قاسىم-جومارت توقايەۆ جاڭادان سالىنعان ەكى قاباتتى جاتاقحانانى ارالاپ كوردى. سونداي-اق جاتاقحاناعا قونىستانعان ءورت سوندىرۋشىلەردىڭ وتباسىلارىن قۇتتىقتادى.
بۇدان كەيىن №23 جاڭا ءورت ءسوندىرۋ بولىمىنە سپورت جابدىقتارىن سىيعا تارتتى.