مەملەكەت باسشىسى الماتى قالاسىنىڭ اكىمى ەربولات دوسايەۆتى قابىلدادى

استانا. KAZINFORM - پرەزيدەنت قاسىم-جومارت توقايەۆ الماتى قالاسىنىڭ اكىمى ەربولات دوسايەۆتى قابىلدادى. بۇل تۋرالى اقوردانىڭ باسپا ءسوز قىزمەتى ءمالىم ەتتى.

الماتى قالاسىنىڭ اكىمى ەربولات دوسايەۆ پرەزيدەنتكە بيىلعى ءبىرىنشى جارتىجىلدىقتاعى الماتى قالاسىنىڭ الەۋمەتتىك- ەكونوميكالىق دامۋىنىڭ الدىن الا قورىتىندىسى تۋرالى باياندادى. ونىڭ ايتۋىنشا، اتالعان كەزەڭدە الماتىدا ينۆەستيتسيالىق وركەندەۋدىڭ جوعارى قارقىنى بايقالادى.

«نەگىزگى كاپيتالعا سالىنعان ينۆەستيتسيا كولەمى 15,8 پايىزعا ءوسىپ، 714,8 ميلليارد تەڭگەگە جەتتى. جەكە ينۆەستيتسيانىڭ كولەمى 21,1 پايىزعا ۇلعايدى، ونىڭ ىشىندە IT- سەكتوردا، سونداي-اق تۋريزم، وڭدەۋ ونەركاسىبى، دەنساۋلىق ساقتاۋ جانە كولىك سالالارىندا ءوسىم بار. جىل سوڭىنا دەيىن 2 تريلليون تەڭگە ينۆەستيتسيا تارتىلادى دەپ جوسپارلانىپ وتىر. 2024 -جىلدىڭ باسىنان بەرى 32,7 مىڭ جۇمىس ورنى اشىلدى. ونىڭ 75 پايىزى تۇراقتى جۇمىس ورنى»، - دەپ باياندادى ەربولات دوسايەۆ.

اكىم سونداي-اق قاسىم-جومارت توقايەۆقا قوعامدىق كولىكتى جاڭارتۋ مەن ەكولوگيالىق تالاپتارعا سايكەستەندىرۋ بويىنشا قابىلدانىپ جاتقان شارالار تۋرالى مالىمەت بەردى.

«بيىل ەكولوگيالىق تازا قوعامدىق كولىكتىڭ ۇلەسى 70 پايىزعا دەيىن ارتادى. بىلتىر بۇل كورسەتكىش 53,7 پايىزدى قۇراعان. جەرگىلىكتى بيۋدجەت ەسەبىنەن جىل سوڭىنا دەيىن گازبەن جۇرەتىن 600 اۆتوبۋس، 100 ەلەكترلى اۆتوبۋس، 112 تروللەيبۋس ساتىپ الىنادى. سونداي-اق قالانىڭ تروللەيبۋس پاركى تولىعىمەن جاڭارتىلادى»، - دەپ حابارلادى الماتى اكىمى.

پرەزيدەنتكە قالانىڭ جوعارعى بولىگىن سۋمەن قامتۋدىڭ رەزەرۆتىك سحەماسىن جاساۋ جونىندەگى تاپسىرماسىنىڭ ورىندالۋى تۋرالى باياندالدى.

«بۇل باعىتتاعى قۇرىلىس جۇمىستارى بيىلعى شىلدە ايىندا اياقتالىپ، 6 جاڭا ۇڭعىما جانە 1,5 شاقىرىم ماگيسترالدىق قۇبىر پايدالانۋعا بەرىلدى. ناتيجەسىندە قوسىمشا سحەمانىڭ قۋاتى 60 پايىزعا ارتتى. بۇل مەدەۋ اۋدانىنىڭ 50 مىڭ تۇرعىنىن سۋمەن ۇزدىكسىز قامتاماسىز ەتۋگە مۇمكىندىك بەرەدى»، - دەدى ەربولات دوسايەۆ.

ەربولات دوسايەۆتىڭ ايتۋىنشا، الەۋمەتتىك ينفراقۇرىلىمدى دامىتۋعا ەرەكشە كوڭىل بولىنەدى. بيىل 4 مەديتسينالىق-سانيتارلىق العاشقى كومەك ورتالىعىنىڭ قۇرىلىسى جانە 12 ەمحانانىڭ كۇردەلى جوندەۋ جۇمىستارى اياقتالادى. بۇعان قوسا، جىل سوڭىنا دەيىن 11 جاڭا مەديتسينالىق-سانيتارلىق العاشقى كومەك ورتالىعى مەن ەمحانا قۇرىلىسىنىڭ جوباسى جاسالادى. وسى جىلى ماۋسىم ايىندا الماتى قالاسىنىڭ پەريناتولوگيا جانە بالالار كارديوحيرۋرگياسى ورتالىعىندا «فەتالدى حيرۋرگيا» پيلوتتىق جوباسى جۇزەگە استى. بۇل جوبا ەلىمىزدە العاش رەت قولعا الىنىپ وتىر.

مەملەكەت باسشىسىنا مەكتەپتەردەگى ورىن تاپشىلىعىن ازايتۋ باعىتىندا جۇرگىزىلىپ جاتقان جۇمىستار جونىندە ايتىلدى. جىل سوڭىنا دەيىن جەرگىلىكتى بيۋدجەت ەسەبىنەن 3,7 مىڭ ورىندىق 8 نىسان پايدالانۋعا بەرىلەدى. سونىمەن قاتار 6,4 مىڭ ورىندىق 10 جەكەمەنشىك مەكتەپ اشىلادى.

پرەزيدەنت قاسىم-جومارت توقايەۆ وڭدەۋ ونەركاسىبىن دامىتۋعا، سونداي-اق الماتى ەكونوميكاسىن ءارتاراپتاندىرۋ اياسىندا شاعىن جانە ورتا بيزنەس ۇلەسىنىڭ ءوسۋى ەسەبىنەن كىرىستى ودان ءارى ارتتىرۋعا باسا نازار اۋدارۋدى تاپسىردى.

اۆتور
باقىتگۇل اباي قىزى