مەملەكەت باسشىلارى بەيرەسمي كەزدەسۋ وتكىزدى
استانا. KAZINFORM - قاسىم-جومارت توقايەۆ مارتەبەلى مەيماننىڭ الماتىعا ساپارمەن كەلگەنىنە ريزاشىلىق ءبىلدىرىپ، مۇنداي بەيرەسمي كەزدەسۋلەر جاقسى داستۇرگە اينالعانىن ايتتى. بۇل تۋرالى اقوردا ءمالىم ەتتى.
- بۇل - باۋىرلاس، دوستاس مەملەكەتتەر اراسىنداعى ىنتىماقتاستىقتى دامىتۋ ماقساتىندا اتقارىلىپ جاتقان جۇمىستى ىسكەرلىك سيپاتتا تاعى ءبىر تالقىلاۋعا ورايلى ءسات. ءبىز - وداقتاس ەلدەرمىز. ەكى ەل اراسىنداعى ىقپالداستىق تۇتاس ورتالىق ازيا وڭىرىندەگى جاعدايعا تىكەلەي اسەر ەتەدى، - دەدى قازاقستان پرەزيدەنتى.
مەملەكەت باسشىسى باۋىرلاس حالىقتاردى جاقىنداستىرۋعا، ايماقتىڭ ورنىقتى جانە ءقاۋىپسىز دامۋىنداعى ورتاق ماقساتتاردى ىلگەرىلەتۋگە شاۆكات ميرزيёيەۆتىڭ زور ۇلەس قوسقانىن اتاپ ءوتتى.
وزبەكستان پرەزيدەنتى ەكىجاقتى بايلانىستاردى نىعايتۋدى كوزدەيتىن بۇگىنگى كەزدەسۋدىڭ ماڭىزىنا توقتالدى.
- مەنى ءوزىڭىزدىڭ تۋعان جەرىڭىز، اتاپ ايتقاندا، الماتى قالاسىندا دوستىق پەيىلمەن، ەكى حالىقتىڭ داستۇرىنە ساي ىلتيپاتپەن قارسى الىپ جاتقانىڭىزعا راقمەت. ءوزىمنىڭ جانە حالقىمنىڭ اتىنان ريزاشىلىعىمدى بىلدىرەمىن. سوڭعى جىلدارى قارىم-قاتىناسىمىز مۇلدەم جاڭا دەڭگەيگە كوتەرىلدى. ءبىز - وداقتاسپىز. ءوزارا سىيلاستىعىمىزدىڭ ارقاسىندا كوپتەگەن ماسەلە شەشىمىن تاۋىپ كەلەدى، ەكەۋارا ۋاعدالاستىقتاردىڭ بارلىعى ىسكە اسىرىلىپ جاتىر. ناقتى ناتيجەلەر بار. ءسىزدى قازاقستاننىڭ زور تابىستارعا جەتۋىمەن قۇتتىقتايمىن. ەكونوميكالارىڭىز دامىپ كەلەدى، جەتىستىكتەرىڭىز جوعارى. ءبىرىنشى توقساندى 5,4 پايىزبەن قورىتىندىلاپ وتىرسىزدار. بۇگىنگى كەزدەسۋىمىزدىڭ سيپاتى رەسمي بولماسا دا، مەن ۇلكەن قۇراممەن كەلدىم. دەگەنمەن ءاربىر وسىنداي بەيرەسمي جۇزدەسۋلەر ءبىزدىڭ بايلانىستارىمىزعا، بارلىق كەلىسىمدەرىمىزدىڭ ورىندالۋىنا تىڭ سەرپىن بەرەدى، - دەدى شاۆكات ميرزيەيەۆ.
تاراپتار ساياسي، ساۋدا- ەكونوميكالىق، كولىك- لوگيستيكالىق، ينۆەستيتسيالىق، ەنەرگەتيكالىق، سۋ شارۋاشىلىعى، ونەركاسىپ كووپەراتسياسى جانە تۋريزم سالالارىنداعى ءوزارا ىقپالداستىقتىڭ پەرسپەكتيۆاسىن جان- جاقتى تالقىلادى. مادەني- گۋمانيتارلىق بايلانىستاردى دامىتۋعا ەرەكشە نازار اۋدارىلدى. سونىمەن قاتار وڭىرلىك جانە حالىقارالىق كۇن ءتارتىبىنىڭ وزەكتى ماسەلەلەرى قاراستىرىلدى. كەزدەسۋ سوڭىندا پرەزيدەنتتەر قازاق- وزبەك ستراتەگيالىق سەرىكتەستىگىن ودان ءارى تەرەڭدەتۋگە بەيىل ەكەنىن راستادى.
بۇعان دەيىن حابارلانعانداي، وزبەكستان پرەزيدەنتى شاۆكات ميرزيەيەۆ قازاقستانعا جۇمىس ساپارىمەن كەلدى.
پرەزيدەنت پەن شاۆكات ميرزيەيەۆ الماتى تاۋ شاڭعىسى كلاستەرىمەن تانىستى.
قازاقستان مەن وزبەكستان پرەزيدەنتتەرى «مەدەۋ» سپورت كەشەنىنە باردى.