ەممانيۋەل ماكرون پاراقشاسىندا قازاقشا پوست جازدى

 كەشە 1-قاراشادا قازاقستانعا رەسمي ساپارمەن كەلگەن فرانسيا پرەزيدەنتى ەممانيۋەل ماكرون X (بۇرىنعى Twitter) جەلىسىندە قازاقشا پوست جازدى، دەپ حابارلايدى Kazinform. 

«ءىرى دەرجاۆالار ۇستەمدىككە قايتا ۇمتىلعان، ال كەيبىرىنەن بولجاۋعا بولمايتىن ارەكەت كۇتكەن الەمدە جاڭا پەرسپەكتيۆالاردى ورتاق ەتۋگە جانە بىرگە قۇرۋعا بولاتىن سەرىكتەستەر مەن دوستارعا سەنە الۋ وتە باعالى. قازاقستان مەن فرانسيا سولاردىڭ قاتارىنا كىرەدى»، - دەلىنگەن فرانسيا پرەزيدەنتىنىڭ جازباسىندا.

ەسكە سالايىق، 1-قاراشادا فرانسيا پرەزيدەنتى ەممانيۋەل ماكرون رەسمي ساپارمەن قازاقستانعا كەلدى. قاسىم-جومارت توقايەۆ اقوردادا فرانسيا پرەزيدەنتى ەممانيۋەل ماكروندى قارسى الدى.

قازاقستان مەن فرانسيا پرەزيدەنتتەرى شاعىن قۇرامدا كەلىسسوز جۇرگىزدى.

ماكرون بۇل ساپار ەكىجاقتى سەرىكتەستىك ءۇشىن ماڭىزدى جىلمەن تۇسپا- تۇس كەلىپ وتىرعانىن ايتتى. قازاقستان پرەزيدەنتى فرانسيا - قازاقستاننىڭ ەۋروپاداعى وتە ماڭىزدى سەرىكتەسى ەكەنىن اتاپ ءوتتى.

سونداي-اق، پرەزيدەنت كەزدەسۋ كەزىندە ءبىلىم جانە عىلىم سالاسىنداعى جوبالاردى قولعا الۋعا ەرەكشە كوڭىل بولىنگەنىن جەتكىزدى.

ەممانيۋەل ماكروننىڭ ايتۋىنشا، قازاق مەكتەپتەرىنە فرانسۋز ءتىلىن وقىتۋ تاجىريبەسى قايتا ورالعانى ماڭىزدى.

مەملەكەت باسشىسى قاسىم-جومارت توقايەۆ الەمدەگى ءتۇرلى ساياسي شيەلەنىستەر مەن ەكونوميكالىق داعدارىستار ەلدى الاڭداتىپ وتىرعانىنا توقتالدى.