ەممانۋەل ماكرون فرانسيادا فۋتبولشىلار قالاي دايىندالاتىنىن ايتىپ بەردى

فرانسيا پرەزيدەنتى ەممانيۋەل ماكرون Maqsut Narikbayev University ستۋدەنتتەرىمەن كەزدەسۋدە ءوز ەلىندەگى فۋتبولدى دامىتۋ تاجىريبەسى تۋرالى ايتىپ بەردى، دەپ حابارلايدى Kazinform.

فرانسيا باسشىسى ءوز ەلىندە فۋتبولدىڭ وتە تانىمال سپورت ەكەنىن اتاپ ءوتتى.

«بىزدە ميلليونداعان ليتسەنزيالانعان ويىنشىلار بار، ولاردىڭ اراسىنان تاڭداۋ مۇمكىندىگى بار. بىزدە ەميگرانتتار اراسىندا دا جاستار وتە كوپ، ولاردىڭ اراسىندا فۋتبول - تانىمال سپورت ءتۇرى. ەڭ الدىمەن، فۋتبول باسقا سپورت تۇرلەرىمەن سالىستىرعاندا ەڭ كوپ جاستاردى تارتاتىنىن ايتقىم كەلەدى. ەڭ باستىسى - جاقسى بازانىڭ بولۋى. ەكىنشىدەن، ءبىزدىڭ كلۋبتار وتە بەلسەندى جۇمىس ىستەدى، جاس ويىنشىلاردى ىرىكتەپ الدى»، - دەدى ەممانۋەل ماكرون.

ە. ماكرون سپورتشىلاردىڭ العاشقى دايارلىعىنىڭ وتە ماڭىزدى ەكەنىن، مەكتەپتەردە ولاردىڭ بەلسەندىلىگىن قولداۋ كەرەگىن جەتكىزدى.

«ءبىز قازىردىڭ وزىندە باستاۋىش مەكتەپتە جارتى ساعاتتىق سپورتتى، سودان كەيىن ورتا مەكتەپتە اپتاسىنا 2 ساعاتتىق سپورتتى ەنگىزدىك. ەڭ الدىمەن، ويىنشىلاردى ەرتە جاستان دايىنداۋ كەرەك. سونداي-اق سپورتتا قۇندىلىقتار وتە ماڭىزدى. مەنىڭ ويىمشا، بۇل - ءبارىنىڭ الدىندا تۇرعان ماڭىزدى سىن-قاتەردىڭ ءبىرى. ءبىزدىڭ سپورتشىلارىمىز جاقسى ادامدار بولۋى كەرەك جانە باسقالاردى ءوز ۇلگىسىمەن شابىتتاندىرۋى كەرەك»، - دەپ ەسەپتەيدى فرانسيا پرەزيدەنتى.