مۇلىكتەرى بۇلىنسە دە ۇمىتتەرى ۇزىلمەگەن قوستانايلىقتار

ناۋرىز ايىنىڭ سوڭىنان بەرى قوستاناي وبلىسى جويقىن سۋ تاسقىنىنان زارداپ شەكتى. تابيعات اپاتى ەڭ اۋەلى وبلىستىڭ وڭتۇستىگىندەگى امانگەلدى، جانگەلدى اۋداندارى جانە ارقالىق قالاسى تۇرعىندارىن ابىگەرگە سالدى. ال 5-ساۋىردە سۋ تاسقىنى وبلىس ورتالىعىنا، جاقىن ماڭداعى اۋداندار مەن ەلدى مەكەندەردە «مىنەز تانىتتى». Kazinform ءتىلشىسى سۋ تاسقىنىنان زارداپ شەگىپ، مۇلىكتەرى بۇلىنسە دە ۇمىتتەرى ۇزىلمەگەن توبىل قالاسىنىڭ تۇرعىندارىمەن كەزدەستى.

ەۆاكۋاتسيالىق پۋنكتتەردىڭ ءبىرى ن. ناۋشابايەۆا اتىنداعى مەكتەپ-گيمنازياسىندا ورنالاسقان. مۇندا 113 ادامعا ورىن بار. قازىرگى ۋاقىتتا 30 عا جۋىق ەر، ايەل مەن بالا ۋاقىتشا ورنالاستىرىلعان. ولار - بوگەتكە ىرگەلەس كوشەلەردىڭ تۇرعىندارى.

زەينەتكەر نادەجدا كراسيكوۆا سۋ تاسقىنى قىر كورسەتپەي تۇرىپ مەكتەپكە جايعاسىپ العان. ول سۋدىڭ ۇيگە جاقىنداماعانىنا شۇكىر ەتىپ وتىر.

«ەۆاكۋاتسيا جاريالانعان ۋاقىتتا مەكتەپكە كەلدىك. بوگەتتى دەر كەزىندە نىعايتقاندىقتان ءۇيىمدى سۋ باسقان جوق. وسى رەتتە، اكىمدىككە، جەرگىلىكتى تۇرعىندارعا العىسىمدى بىلدىرەمىن»، - دەيدى زەينەتكەر.

قالا تۇرعىنىنىڭ ايتۋىنشا، مۇنداي سۋ تاسقىنى بۇعان دەيىن 1994 -جىلى بولعان. ول كەزدە بوگەت بولماپتى. سول ۋاقىتتا جەكە ۇيلەر عانا ەمەس، ەكى قاباتتى ۇيلەردىڭ ءبىرىنشى قاباتى دا سۋ استىندا قالعان. قازىر زەينەتكەر ءۇيى مەن ءيتىنىڭ قامىن ويلاپ وتىر.

«يتىمە تاماق بەرۋگە بارىپ ەدىم، ايانىشتى كۇيدە ەكەن. ءوز ۇيىمىزگە ورالۋىمىزدى تاعاتسىزدانا كۇتىپ ءجۇرمىز»، - دەدى ول.

قوستاناي اۋدانىندا بارلىعى 7 ەۆاكۋاتسيالىق پۋنكت بار. ونداعى توسەك- ورىن سانى 1000 عا جۋىقتايدى. قازىرگى ۋاقىتتا شامامەن 134 ادام ەۆاكۋاتسيالانعان. ال، جالپى قوستاناي وبلىسىندا مۇنداي 20 ورتالىق تىركەلگەن.

تۇرعىندارعا كۇنىنە 4 رەت تاماق بەرىلەدى. ولار تاعامنىڭ وتە ءدامدى ەكەنىن اتاپ ءوتتى. مىسالى، تۇسكى اسقا سورپا، ەت قوسىلعان بۇقتىرىلعان كوكونىستەر، كومپوت بەرىلەدى ەكەن. ايتپاقشى، تاماقتى جەرگىلىكتى مەكتەپ جەتكىزۋشىسى تەگىن ۇلەستىرىلەتىنىن اتاپ وتكەن ءجون. ەۆاكۋاتسيالىق پۋنكتتەردە ايەلدەر مەن ەرلەرگە ارنالعان توسەك- ورىندارى بولەك، ءتىپتى، سابيگە ارنالعان بەسىك تە بار ەكەن.

وكىنىشكە قاراي، بىزگە تاسقىننان بارىنان ايىرىلعاندار دا كەزدەستى. ۆالەنتينا مەن اناتولي زينوۆيەۆتەر باسپاناسىنىڭ جارامسىز كۇيگە تۇسكەنىن ايتادى. ولار سوناۋ 90-جىلداردىڭ سوڭىنان باستاپ جايلى ۇيگە اينالعان ساياجايدا تۇرىپ كەلگەن. بۇگىندە ولاردىڭ ءۇيى سۋ تاسقىنىنان زارداپ شەككەن نىسانداردىڭ قاتارىنا ەنگەن. بارلىق مۇلىك سۋ استىندا قالعان...

«ءبىز كەڭەس وداعى كەزىندە رەسەيدەن كوشىپ كەلگەنبىز. 1999 -جىلى ءبىر جەردە زاتوبولوۆكانىڭ (قازىرگى توبىل قالاسى - اۆتور) تۇبىندەگى ساياجايلارعا قونىستاندىق. مۇنداي سۋ تاسقىنىن العاش رەت باستان كەشىپ وتىرمىز. وكىنىشتى جاعداي. بار مۇلىك سۋ استىندا قالدى. قۇجاتتاردى عانا الىپ ۇلگەردىك»، - دەدى ۆالەنتينا.

ايتپاقشى، ول اڭگىمەلەسۋگە دەيىن دارىگەرگە كورىنىپ كەلىپتى. ۋايىمنان بولار، دەنساۋلىعى سىر بەرە باستاعان.

«ولار بىزگە «بارىنە كومەكتەسەمىز» دەپ ۋادە بەردى. ساياجايدا تۇرىپ جاتقاندارعا باسپانا بەرەتىنىن ايتتى»، - دەيدى ەرلى-زايىپتىلار.

ايتا كەتسەك، قوستانايدا تاسقىننان زارداپ شەككەندەرگە 114 ميلليون تەڭگە ءبىرجولعى تولەم بەرىلدى.

اۆتور

ورالحان قوجانوۆ