مەكتەپتى اياقتاماعان ميللياردەرلەر

استانا. قازاقپارات - بيلل گەيتس، ستيۆ دجوبس، مارك سۋكەربەرگ - الەمدەگى ەڭ مىقتى ۋنيۆەرسيتەتتىڭ ستۋدەنتتەرى بولا تۇرا، بيزنەس ءۇشىن ونى تاستاپ كەتكەن ميللياردەرلەر. ءتىپتى بۇگىنگى ميللياردەرلەردىڭ ىشىندە مەكتەپ باعدارلاماسىن بىتىرمەگەندەر دە بار ەكەن.

ءبىرى وتباسىن اسىراۋ ءۇشىن، ەندى ءبىرى سپورتپەن باسىبايلى شۇعىلدانۋ ءۇشىن جانە تولىپ جاتقان سەبەپتەرمەن مەكتەپتى تاستاۋعا ءماجبۇر بولعان. ءبىراق بۇل ولاردىڭ ميللياردەر بولۋىنا كەدەرگى كەلتىرمەگەن.

جاقىندا فوربەس جۋرنالى مەكتەپتى اياقتاماعان ون ميللياردەردىڭ ءتىزىمىن جاريالادى. سولاردىڭ ءبىرى - «Inditex» كومپانياسىنىڭ يەسى يسپاندىق امانسيو ورتەگا. ونىڭ بايلىعى - 57 ميلليارد دوللاردى قۇرايدى. Zara, Massimo Dutti, Oysho برەندتەرىنىڭ يەسى امانسيو 13 جاسىندا مەكتەپتى تاستاپ كەتكەن. ونىڭ اكەسى تەمىر جولدا ىستەگەن، ال اناسى قىزمەتشى بولعان. سونىڭ وزىندە ءۇي ءىشى كەدەيشىلىكتەن ارىلماي-اق قويادى. سوندىقتان ول كىشكەنە بولسا دا اتا-اناسىنا كومەكتەسۋ ءۇشىن مەكتەپتى تاستايدى.

باسىندا ول كيىم تىگۋشىنىڭ «الىپ كەل، بارىپ كەلىنە» جاراعان. ارتىنان گالانتەريالىق دۇكەنگە ورنالاسادى. ورتەگا بىرتە-بىرتە ءسان الەمىنىڭ ىشىنە ەنىپ كەتەدى. ول قانداي ماتا ساتىپ الۋ كەرەگىن، قانداي كيىم تىگۋ جاعىن زەرتتەي باستايدى. 1975 - جىلى ورتەگا ايەلىمەن بىرىگىپ Zara دۇكەنىن اشادى. از ۋاقىت وتپەي ەڭبەكقورلىعىنىڭ ارقاسىندا امانسيو ورتەگانىڭ قارجىسى كوبەيگەننىڭ ۇستىنە كوبەيە بەرەدى...

تەك قانا جۇرگىزۋشىلىك كۋالىگى بار تاعى ءبىر ميللياردەردىڭ اتى-ءجونى - فرانسۋا پينو. ونىڭ قارجىسى 15 ميلليارد دوللاردى قۇرايدى. فرانسيالىق ميللياردەر مەكتەپتى 16 جاسىندا تاستاعان. اكەسى بورەنە ساتاتىن. فرانسۋانىڭ اكەسى بالاسىنىڭ ديپلوم الۋى ءۇشىن سوڭعى فرانكىسىنەن دە ايىرىلۋعا دايىن ەدى. ءبىراق ۇلى اكەسىنىڭ مۇنىسىن باعالامادى. بىرىنشىدەن، وعان وقۋ ۇنامادى. ەكىنشىدەن، ول سىنىپتاستارىنىڭ بۇنىڭ تومەنگى ساتىدان ەكەنىن كەلەمەجدەپ، بەتىنە باساتىنىنا ىشتەي قايعىراتىن. ەڭبەكقورلىعىنىڭ ارقاسىندا ول قازىرگى كەزدە فرانسيانىڭ ەڭ باي ادامى.

بايلىعى 4،6 ميللياردتى قۇرايتىن تاعى ءبىر ميللياردەر - ريچارد برەندون. ونى 16 جاسىندا ساباقتى وقىماعانى ءۇشىن مەكتەپتەن قۋادى. ديرەكتور بۇعان: «سەنىڭ بار ءومىرىڭ تۇرمەدە وتەدى، نەمەسە عايىپتان بايىپ كەتەسىڭ...» دەگەن ەكەن. سىنىپتاستارى تەر توگىپ وقىپ جاتقاندا، ول شىرشا ءوسىرىپ ساتاتىن. سوڭىنان «ستۋدەنت» دەگەن جۋرنال شىعارا باستادى.

ءيا، كارل ليندەر جانە وزگە دە مەكتەپ باعدارلاماسىن اياقتاماعان 7 ميللياردەر ەرەسەن ەڭبەگىنىڭ ارقاسىندا بايىعان ەدى.