مەكتەپتەن مەملەكەتتىك ءتىلدى بىلمەي شىعادى: قازاق تىلىنەن وقۋشىلاردى جاپپاي ەمتيحان كۇتىپ تۇر

استانا. KAZINFORM - قازاقستاننىڭ وقۋ-اعارتۋ ءمينيسترى عاني بەيسەمبايەۆ بيىل وقۋشىلاردىڭ ءبارى قازاق تىلىنەن ەمتيحان تاپسىراتىنىن ايتتى. مينيستر 11 جىل بويى قازاق ءتىلىن وقىسا دا، ءتىل بىلمەي شىعاتىن وقۋشىلارعا بايلانىستى كوپ سۇراق تۋىندايتىنىن ايتادى، دەپ حابارلايدى Ulysmedia.kz.

ۇكىمەتتە وتكەن بريفينگ بارىسىندا عاني بەيسەمبايەۆتان 5-9-سىنىپ وقۋشىلارى تاپسىراتىن ەمتيحان جونىندە سۇراق قويىلدى. اتاپ ايتقاندا، مينيستر ەمتيحان تاپسىرا المايتىن وقۋشىلارعا قانداي شارا قابىلدانادى دەپ سۇرالدى.

بەيسەمبايەۆتىڭ ايتۋىنشا، ەمتيحاندار قازاق ءتىلىن وقىتۋ مەن ءبىلىمنىڭ ساپاسىن ارتتىرۋ ءۇشىن ەنگىزىلگەن. مينيستر حالىق تاراپىنان ۆەدومستۆو اتىنا كوپ سىن كەلىپ تۇسەتىنىن، ويتكەنى بالالار قازاق ءتىلىن 11 جىل بويى وقىعانىمەن، مەكتەپ تابالدىرىعىنان مەملەكەتتىك ءتىلدى بىلمەي كەتەتىنىن اتاپ ءوتتى.

- ەندى كورەيىك، نەگىزىنەن، مۇنى ءبىرىنشى رەت ەنگىزەمىز. قازىر ۇلكەن دايىندىق ءجۇرىپ جاتىر. ءبىز بالالارعا دا، مۇعالىمدەرگە دە ۇلكەن قىزىعۋشىلىق تانىتامىز. سوندىقتان وسى ەمتيحاندار اياقتالعاننان كەيىن عانا اقپارات بەرە الامىز، - دەدى مينيستر.

ەمتيحان تاپسىرا المايتىن وقۋشىلاردى قانداي دا ءبىر جازانى كۇتىپ تۇر ما دەگەن سۇراققا مينيستر تەست بالانى ءپاندى جاقسى وقىتۋعا ىنتالاندىرۋى كەرەك دەپ جاۋاپ بەردى. ياعني، ونداي بالالارعا ەش جازا قاراستىرىلماعان.

- مينيسترلىكتىڭ ۇستانىمى جازالاۋعا ەمەس، ءتىل ۇيرەنۋگە ىنتالاندىرۋعا كوبىرەك باعىتتالعان. جازا بولماۋى كەرەك، - دەپ قوستى ول.