مەكتەپتە ۇيالى تەلەفون قولدانۋعا شەكتەۋ ەنگىزگەن ەلدەر قاتارى ارتىپ كەلەدى

استانا. قازاقپارات - ۇيالى تەلەفون كەسىرىنەن بالالاردىڭ وقۋعا دەگەن ىنتاسى تومەندەپ كەتكەن، دەپ حابارلايدى 24kz.

ماماندار گادجەتتەردىڭ وقۋشىلاردىڭ دەنساۋلىعى، پسيحيكالىق جاعدايى مەن ۇيقىسىنا دا كەرى اسەرى بارىن ايتادى.

فرانسيادا مەكتەپ اۋماعىندا گادجەتتەر قولدانۋعا بولمايدى

فرانسيادا 2018 -جىلدان بەرى مەكتەپ اۋماعىندا گادجەتتەردى قولدانۋعا بولمايدى. ەندى بيىلعى جاڭا وقۋ جىلىنان باستاپ ولاردى ۇستاۋعا دا رۇقسات جوق. وقۋشىلار تەلەفون، «اقىلدى» ساعات پەن پلانشەتتەردى ءبىلىم بەرۋ مەكەمەسىنە كىرگەندە بىردەن شكافقا سالىپ كەتۋ كەرەك. بۇل - پيلوتتىق جوبا. ازىرگە 200 مەكتەپتە ەنگىزىلگەن. جوبا تيىمدىلىگىن كورسەتسە، كەلەر جىلدىڭ باسىنان بارلىعى دا ءتيىستى تالاپقا باعىناتىن بولادى.

گرەكيادا وقۋشىلار تەلەفونىن سومكەسىنەن شىعارماۋ كەرەك

ال گرەكيادا بيىلعى وقۋ جىلىنان باستاپ بالالار تەلەفوندارىن سومكەسىنەن شىعارماۋ كەرەك. ەرەجەگە باعىنباعاندار ءبىر كۇنگە ساباقتان شەتتەتىلەدى. بۇل جەرگىلىكتى ءبىلىم بەرۋ مينيسترلىگىنىڭ كيبەربۋللينگپەن كۇرەس ساياساتىنىڭ ءبىر بولىگى. بيىل كوكتەمدە مۇندا سىنىپتاستارىن سۋرەتكە نە ۆيدەوعا ءتۇسىرىپ، ونى مازاق ەتىپ ينتەرنەتكە سالعانى ءۇشىن وقۋشىنى مەكتەپتەن شىعارۋ تۋرالى ەرەجە كۇشىنە ەنگەن.

ا ق ش- تىڭ 14 شتاتىندا مەكتەپتە تەلەفون قولدانۋعا بولمايدى

ا ق ش- تىڭ 14 شتاتىندا مەكتەپتە تەلەفون قولدانۋعا قاتىستى شەكتەۋ بار. جاقىندا كاليفورنيا گۋبەرناتورى دا مەكتەپتەردە سمارتفونداردى قولدانۋعا تىيىم سالاتىن زاڭعا قول قويدى. وعان 6 ميلليون وقۋشى باعىنادى. كاليفورنيادان بولەك، ا ق ش- تىڭ تاعى 13 شتاتىندا گادجەتتەردى قولدانۋ بويىنشا شەكتەۋلەر بار. بيلىك: «دەگەنمەن، بۇل وقۋ پروتسەسىندە بالالار مۇلدە سيفرلىق قۇرىلعىلاردى قولدانبايدى دەگەن ءسوز ەمەس»، - دەيدى. شەكتەۋ تەك تەلەفوندارعا قاتىستى.