مەكتەپ وقۋلىقتارىنىڭ مازمۇنىنا قاتىستى تالاپ كۇشەيدى

استانا. قازاقپارات - مەكتەپ وقۋلىقتارىن جازاتىن اۆتورلاردىڭ اراسىندا باسەكە جوعارى، دەپ حابارلايدى 24kz.

بۇل ساپانىڭ جاقسارۋىنا اكەلىپ وتىر. وقۋلىقتار شىعارۋدا 25 جىلدىق تاجىريبەسى بار باسپا مامانى وسىلاي دەيدى. 2015-2016 -جىلدارى ەلىمىز جاڭارتىلعان ءبىلىم بەرۋ مازمۇنىنا كوشتى. «اۋەلگى كەزدە كىتاپ جازۋ بارىسىندا اۆتورلاردىڭ جاڭا باعدارلامانىڭ ءادىسنامالىق نەگىزىنەن جەتكىلىكتى دەڭگەيدە تاجىريبەسى بولماعاندىقتان وقۋلىقتار مازمۇنىندا ولقىلىقتار بولعانى راس»، - دەيدى باسپاگەرلەر.

الايدا قازىر تالاپ كۇشەيدى. اۆتورلار قۇرامى مىقتى عالىمدار مەن تاجىريبەلى ادىسكەرلەردەن جانە مۇعالىمدەردەن تۇرۋى شارت. سونداي-اق وقۋلىق مىندەتتى تۇردە ءبىرىنشى قازاق تىلىندە جازىلادى، سودان كەيىن عانا وزگە تىلدەرگە اۋدارىلادى. ءارقايسىسىنىڭ ەلەكتروندى نۇسقاسى ازىرلەنەدى. ەلەكتروندى وقۋلىقتاردى ينتەرنەتسىز دە قولدانۋعا بولادى.

ءاسيما رىسقۇلبەكوۆا، باسپانىڭ ۆيتسە-پرەزيدەنتى:

- اۆتورلار ءوزىنىڭ ءبىرشاما تاجىريبەسىن ۇسىندى، جاڭارتىلعان ءبىلىم بەرۋ مازمۇنىنىڭ ەرەكشەلىكتەرىن ءتۇسىنىپ، ارتىقشىلىقتارىن وسى وقۋلىقتىڭ مازمۇنىنا جوعارى دەڭگەيدە بەرۋگە تىرىسىپ جاتىر. اۆتورلار قازىر ۇلكەن ىزدەنىستە. قازىر باسەكەلەستىك وتە جوعارى. سەبەبى، وقۋلىقتى ارنايى مەملەكەتتىك ساراپتاماعا ۇسىنباس بۇرىن ءبىز باسپاىشىلىك ساراپتاما جۇرگىزەمىز. ءاربىر وقۋلىق بويىنشا. ءۇش دەڭگەيلى ساراپتامادان وتەدى.