مەكتەپ تۇلەكتەرى باكالاۆردى «بولاشاقپەن» شەتەلدە وقي الادى

استانا. KAZINFORM - عىلىم جانە جوعارى ءبىلىم ءمينيسترى ساياسات نۇربەك باكالاۆر دەڭگەيىندە ءبىلىم العىسى كەلەتىن تالاپكەرلەر دە «بولاشاق» باعدارلاماسىنا قاتىساتىنىن ايتتى.

باسپاءسوز ءماسليحاتىندا ب ا ق وكىلىنىڭ سۇراعىنا بەرگەن جاۋابىندا ۆەدومستۆو باسشىسى مۇنداي شەشىم بىلتىر قابىلدانعانىن ايتتى.

رەسپۋبليكالىق كوميسسيانىڭ سول شەشىمىن ىسكە اسىرۋ ءۇشىن ءبىلىم تۋرالى زاڭناماعا وزگەرىس ەنگىزۋ قاجەت كورىنەدى.

«بىلتىر جىل اياعىنا قاراي پارلامەنتكە ءتيىستى زاڭ جوباسىن ەنگىزگەنبىز. دەپۋتاتتار قولداپ، ءوز تۇزەتۋلەرىن قوسىپ، ءبىز كەلىسكەنبىز. ۇكىمەتتىڭ قورىتىندىسى پارلامەنتتە جاتىر. پارلامەنتتىڭ جاڭا سەسسياسى باستالعاننان كەيىن بۇل ىسكە قايتا كىرىسەمىز. بيىل زاڭ قابىلدانۋى كەرەك. وسىلايشا «بولاشاق» باعدارلاماسىنا «باكالاۆريات» ساناتىن قايتا قوسامىز»، - دەدى ساياسات نۇربەك.

ءبىراق «بولاشاقتان» ۇمىتكەر باكالاۆر تالاپكەرى حالىقارالىق وليمپيادالاردا جۇلدە العان، عىلىمي كونكۋرستاردا جەڭىمپاز اتانعان بولۋى شارت.

ونداي سايىستاردىڭ ءتىزىمىن رەسپۋبليكالىق كوميسسيا بەكىتەدى.

سونداي-اق، ءوز كۇشىمەن الەمنىڭ جەتەكشى وقۋ ورىندارىنان شاقىرتۋ العان مەكتەپ وقۋشىلارى دا «بولاشاق» باعدارلاماسىنا قاتىسا الادى.

اۆتور

ەسىمجان ناقتىباي