مەكتەپ ديرەكتورى مەن ەسەپشى مۇعالىمدەردىڭ جالاقىسىنان 71 ميلليون تەڭگە جىمقىرىپ قالعان
شىمكەنت. KAZINFORM - شىمكەنتتەگى ءبىر مەكتەپتىڭ ديرەكتورى مەن باس ەسەپشىسى 8 جىلعا باس بوستاندىقتارىنان ايىرىلدى. بۇل تۋرالى شىمكەنت قالالىق سوتتىڭ باسپا ءسوز قىزمەتى مالىمدەدى.
سوتتىڭ انىقتاۋىنشا، شىمكەنتتەگى مەكتەپ ديرەكتورى 2022 -جىلدىڭ اقپان ايىنان 2024 -جىلدىڭ تامىزىنا دەيىن باس ەسەپشىسىمەن الدىن الا كەلىسىپ، مۇعالىمدەرگە ەڭبەكاقى ەسەپتەۋ بارىسىندا ارتىق سوما اۋدارىپ وتىرعان.
- بۇل قاراجاتتى ەسەپشى ءوز شوتىنا جانە جاقىن تۋىستارىنىڭ شوتتارىنا اۋدارىپ، كەيىن قولما-قول اقشاعا اينالدىرىپ، يەمدەنىپ وتىرعان. مەملەكەتكە كەلتىرىلگەن جالپى زالال 71 ميلليون تەڭگەدەن استى، - دەلىنگەن سوتتىڭ حابارلاماسىندا.
بۇعان قوسا، 2022 -جىلى مەكتەپ ديرەكتورى ءوزىنىڭ وقۋ ءىسى جونىندەگى ورىنباسارى ارقىلى ءبىر مۇعالىمدى دەكرەتتىك دەمالىستان مەرزىمىنەن بۇرىن شىعارۋ ءۇشىن 150 مىڭ تەڭگە كولەمىندە پارا العان.
ناتيجەسىندە، سوت ۇكىمى بويىنشا ديرەكتور مەن ەسەپشى كىنالى دەپ تانىلىپ، ءارقايسىسى 8 جىلعا باس بوستاندىعىنان ايىرىلدى. سونداي-اق ولارعا ءومىر بويىنا مەملەكەتتىك قىزمەتتە جانە مەملەكەتتىك مەكەمەلەردە لاۋازىم اتقارۋعا تىيىم سالىندى.
ۇكىم زاڭدى كۇشىنە ەنگەن جوق.