مەكسيكانىڭ تۇڭعىش ايەل پرەزيدەنتى كلاۋديا شەينباۋم انت قابىلدادى

استانا. قازاقپارات - 62 جاستاعى كلاۋديا شەينباۋم رەسمي تۇردە مەكسيكا پرەزيدەنتى قىزمەتىنە كىرىستى.

ۇلىقتاۋ ءراسىمى رەسپۋبليكا كونگرەسىنىڭ (ەكى پالاتالى پارلامەنت) وتىرىستارى ءوتىپ جاتقان مەحيكوداعى سان- لازارو زاڭ شىعارۋ سارايىندا ءوتتى، دەپ حابارلايدى ت ا س س اقپارات اگەنتتىگى.

«مەن مەكسيكا قۇراما شتاتتارىنىڭ ساياسي كونستيتۋتسياسىن جانە ودان تۋىندايتىن زاڭداردى ساقتاۋعا جانە ورىنداۋعا، سونداي-اق وداقتىڭ يگىلىگى مەن گۇلدەنۋى ءۇشىن حالىق ماعان سەنىپ تاپسىرعان رەسپۋبليكا پرەزيدەنتىنىڭ مىندەتتەرىن ادال جانە پاتريوتتىقپەن ورىنداۋعا سالتاناتتى تۇردە انت ەتەمىن. ەگەر مەن مۇنى ىستەمەسەم، ۇلت مەنى جازالاسىن»، - دەدى شەينباۋم پرەزيدەنتتىك انت ءماتىنىن وقۋ كەزىندە.

وسىدان كەيىن وكىلەتتىگىن اياقتاپ جاتقان مەملەكەت باسشىسى اندرەس مانۋەل لوپەس وبرادوردىڭ قاتىسۋىمەن دەپۋتاتتار پالاتاسى (تومەنگى پالاتا) پرەزيديۋمىنىڭ ءتوراعاسى يفيگەنيا مارتينەس ەرناندەس وعان پرەزيدەنتتىك بيلىك نىشاندارىنىڭ ءبىرى - مەكسيكا تۋىنىڭ تۇستەرىندەگى پرەزيدەنتتىك لەنتانى تابىس ەتتى.

كلاۋديا شەينباۋم (تولىق اتى- ءجونى كلاۋديا شەينباۋم پاردو) 1962 -جىلى 24 ماۋسىمدا مەحيكو قالاسىندا دۇنيەگە كەلگەن. ونىڭ اكەسى جاعىنان دا، اناسى جاعىنان دا اتا- بابالارى - شىعىس ەۋروپادان كەلگەن يەۆرەي يمميگرانتتارى. اكەسى بيزنەسمەن جانە عىلىمي ورتادا تانىمال ينجەنەر- حيميك بولعان. اناسى بيولوگ. 1960 -جىلدارى ولار ەلدەگى ستۋدەنتتىك قوزعالىستار مەن نارازىلىق اكسيالارىنا بەلسەندى قاتىسقان.

شەينباۋم مەكسيكانىڭ ۇلتتىق اۆتونوميالىق ۋنيۆەرسيتەتىن (NAUM) فيزيكا ماماندىعى بويىنشا ءبىتىردى، وندا ەنەرگەتيكا سالاسىنداعى ماگيستر جانە دوكتورلىق دارەجەلەرىن الدى. ول كاليفورنيا ۋنيۆەرسيتەتىنىڭ بەركلي زەرتحاناسىندا مەكسيكاداعى ەنەرگەتيكالىق تەندەنتسيالار بويىنشا دوكتورلىق زەرتتەۋلەرىن جۇرگىزدى.