مەكسيكاداعى تارتىپسىزدىك: ق ر س ءى م قازاقستاندىقتارعا ۇندەۋ جاسادى
استانا. KAZINFORM - ق ر سىرتقى ىستەر مينيسترلىگى جاپپاي تارتىپسىزدىكتەر ورىن العان مەكسيكاداعى جاعدايعا بايلانىستى سول ەلگە بارعان قازاقستاندىقتارعا ۇندەۋ جاسادى.
ۆەدومستۆو مالىمەتىنە قاراعاندا، قازىرگى ۋاقىتتا مەكسيكادا 35 قازاقستان ازاماتى كونسۋلدىق ەسەپتە تۇر.
- قازاقستاننىڭ مەكسيكاداعى ەلشىلىگى ەلدەگى احۋالعا مۇقيات قاراپ وتىر جانە وتانداستارمەن تۇراقتى بايلانىستا. قازاقستان ازاماتتارىنا سابىر ساقتاپ، قىراعىلىق تانىتۋعا جانە قاۋىپتى جەرلەرگە بارماۋعا كەڭەس بەرەمىز، - دەلىنگەن ق ر س ءى م اقپاراتىندا.
ەسكە سالايىق، جەكسەنبى كۇنى مەكسيكانىڭ باتىسىنداعى كەيبىر اۋدانداردا اسكەري وپەراتسيا كەزىندە قاقتىعىستار بولدى. مەكسيكا اسكەرى حاليسكو جاڭا ۇرپاق كارتەلىنىڭ جەتەكشىسى، ەل-مەنچو دەگەن اتپەن بەلگىلى نەمەسيو وسەگۋەرا سەرۆانتەستى ءولتىردى.
اۆتور
رۋسلان عابباسوۆ