مەكسيكادا مايمىلدار قىرىلىپ جاتىر

استانا. KAZINFORM - مەكسيكانىڭ وڭتۇستىك- شىعىسىنداعى تروپيكالىق ورماندارداعى قۇرىپ كەتۋ قاۋپى تونگەن باقىراۋىق مايمىلدار سوڭعى اپتالاردا قۇرعاقشىلىق پەن قاتتى اپتاپ ىستىقتان قىرىلىپ جاتىر، دەپ حابارلايدى Reuters اقپارات اگەنتتىگى.

وسى اپتادا اۋانىڭ تەمپەراتۋراسى 45 گرادۋستان جوعارى كوتەرىلەدى دەپ بولجانعان تاباسكو شتاتىندا جەرگىلىكتى ب ا ق 85 مايمىلدىڭ قىرىلعانى تۋرالى حابارلادى. بيلىك بۇنى راستادى، ءبىراق قىرىلعان جانۋارلاردىڭ ناقتى سانىن ۇسىنعان جوق.

كامالكالكو قالاسىنىڭ ماڭىنداعى ورماندا، تاباسكودا ەرىكتىلەر ىستىقتان ولگەن كولۋمبيالىق وكىرەتىن مايمىلداردىڭ (alouatta palliata) ولەكسەلەرىن جيناپ، جانۋارلار ءولىمىنىڭ الدىن الۋ ءۇشىن سۋ مەن جەمىس-جيدەك قۇيىلعان شەلەكتەردى قويدى.

كولۋمبيالىق باقىراۋىق مايمىل حالىقارالىق تابيعاتتى قورعاۋ وداعىنىڭ قىزىل تىزىمىندە «وسال» ساناتقا ەنگىزىلگەن.

«بۇل سونداي قاتتى ىستىقتىڭ كەسىرىنەن بولىپ جاتقان جاعداي. مەن بۇل شتاتتاردا ۇزاق ۋاقىت بولدىم، ءبىراق بۇعان دەيىن وسىنشاما اپتاپ ىستىقتى سەزىنبەگەن ەدىم. سوندىقتان ءبىز جانۋارلارعا قامقورلىق تانىتۋىمىز كەرەك جانە ءبىز سونى ىستەيمىز»، - دەدى تاباسكودان كەلگەن مەكسيكا پرەزيدەنتى اندرەس مانۋەل لوپەس وبرادور.

مەكسيكانىڭ قورشاعان ورتانى قورعاۋ مينيسترلىگى كەيىنىرەك مايمىلدار ءولىمىن جويۋ بويىنشا كۇش-جىگەردى ۇيلەستىرەتىنىن مالىمدەپ، ولاردىڭ قىرىلۋىن بىرنەشە ىقتيمال سەبەپتەرمەن، سونىڭ ىشىندە ىستىق سوعۋ، سۋسىزدانۋ، دۇرىس تاماقتانباۋ نەمەسە اۋىلشارۋاشىلىق داقىلدارىن ۋلى اگروحيميكاتتارمەن بۇركۋمەن بايلانىستىرادى.

مەكسيكادا، سونىمەن قاتار، ورمانداردىڭ كەسىلۋىنە بايلانىستى قىزىل كىتاپتا «جويىلىپ كەتۋ قاۋپى ءتونىپ تۇرعاندار» تىزىمىنە ەنگەن ورتالىق امەريكالىق باقىراۋىق مايمىل مەكەندەيدى.

مەكسيكانىڭ دەنساۋلىق ساقتاۋ مينيسترلىگى 17-ناۋرىز بەن 11-مامىر ارالىعىندا اپتاپ ىستىقتان ەلدە شامامەن 26 ادام قايتىس بولعانىن حابارلادى.

اۆتور
زارينا تۋعانبايەۆا