مەككەدە قاجىلىققا بارعان التى ادام ىستىقتان كوز جۇمدى

استانا. قازاقپارات - مەككەگە قاجىلىققا بارعان 6 ادام كۇننىڭ ىستىعىنا شىداماي قايتىس بولدى، دەپ حابارلايدى 24kz.

ساۋد ارابياسىندا سىناپ باعاناسى 48 گرادۋسقا دەيىن كوتەرىلگەن. ەلدىڭ باس ستاتيستيكالىق باسقارماسىنىڭ مالىمەتى بويىنشا بيىل قاجىلىعىن وتەۋگە 1 ميلليون 800 مىڭ ادام تىركەلگەن. بيلىك قازىر قۇلشىلىققا كەلگەندەرگە اسا ساق بولۋدى ەسكەرتىپ جاتىر. ويتكەنى سينوپتيكتەردىڭ بولجامى بويىنشا اپتاپ اپتانىڭ سوڭىنا دەيىن سوزىلادى.

اپتاپتا قاجىلار ءۇشىن قۇلشىلىق ەتۋ قيىنعا سوعىپ وتىر. ەل بيلىگى ىستىقتان قورعانۋ ءۇشىن ارافات تاۋىنان مەككەگە دەيىن سۋ تۇماندارىن ورناتىپ جاتىر. 10 شاقىرىمدىق جاياۋ جۇرگىنشىلەر جولىنا 750 سۋ باعانى قويىلعان. كۇندىزگى عيبادات پەن قاجىلىق راسىمدەردى ورىنداۋ كەزىندە ولار جان-جاقتان سۋ شاشىپ، سالقىنداتىپ تۇرادى. بيىل ساۋد ارابياسىنا 2 ميلليون ادام قاجىلىققا كەلۋى مۇمكىن.