مۇحتار اۋەزوۆپەن كەزدەسكەن ساتتەن ءبىر ۇزىك سىر

استانا. قازاقپارات - بۇل كۇندەرى مۇحاڭدى سىرتىنان ءبىر كورگەندەردىڭ ءوزى ەستەلىك ايتاتىن بولدى...ءبىز وتكەن عاسىردىڭ ەلۋىنشى جىلدارىندا قازاق مەملەكەتتىك ۋنيۆەرسيتەتىندە ابايتانۋدان ءدارىس وقىعان مۇحتار اۋەزوۆتى كورىپ، الدىنان ساباق العان ەدىك.

ساباقحاناعا سىيماي، ستۋدەنت-جاستار ەسىك الدىندا تۇرىپ تىڭداۋشى ەدى. ادەبيەتكە قۇمار باسقا وقۋ ورىندارىنان دا جاس تۇلەكتەر كەلەتىن.

ونان بەرگى جاعىندا قاز م ۋ-دەگى دراما ۇيىرمەسى م.اۋەزوۆتىڭ «ايمان-شولپان» پەساسى بويىنشا سپەكتاكل قويماق بولىپ، ساپارعالي ءشارىپوۆ دەگەن رەجيسسەر مۇحاڭمەن كەلىسىپ، ۇيىرمە باستىعى مەنى ول كىسىدەن قولجازبا شىعارمانى الىپ كەلۋگە جۇمسادى.

ەسىكتىڭ قوڭىراۋىن جاسقانا تۇرىپ قاققان كەزدە ەرتەڭگىلىك كيەتىن اق جولاق پيجاماسىمەن ۇلكەن ەمەن تۇتقانى ءوزى اشىپ، پەسانىڭ ەكىنشى داناسىن قولىما ۇستاتا بەرىپ:

- ويىندارىڭىزدى كورسەتىپ بولعان سوڭ، قايىرىپ بەرىڭىزدەر، - دەپ سالالى ساۋساقتارىمەن ۇسىنىپ، اي ماڭدايىن ءسال عانا ءيىپ، شىعارىپ سالعان-دى.

ءبىز ءسويتىپ، ستۋدەنتتەر ساحناسىنا مۇحتار اۋەزوۆ قايتا جازعان «ايمان-شولپاننىڭ» جاڭا نۇسقاسىن قويعان ەدىك. بۇل - 1957 - جىلدىڭ مامىر ايى بولاتىن.

وكىنىشكە قاراي، مۇقاڭ شەتەلگە - ءۇندىستانعا دەلەگاسيامەن جول ءجۇرىپ كەتىپ، ءبىزدىڭ ويىنىمىزدى كورە العان جوق.

جازعا تاياۋ وقۋ جىلى اياقتالار كەزدە قولجازبانى ۇمىتتىرىپ، اياقسىتىپ جىبەرمەي، قايتا ءبىر سوعىپ، قولىنا ءوز قولىممەن ۇستاتىپ، راحمەتىن العانىمدى ءالى ۇمىتپايمىن.

جاستىق شاق، ستۋدەنتتىك اساۋ، ەسەر شاق. ءبىرتۇرلى ءبارى ماقتانىش ءۇشىن جاسالاتىنداي.

ەكىنشى رەت كورىپ، قولىن الۋىمىز - قازىرگى پانفيلوۆ كوشەسىندەگى كىتاپ دۇكەننىڭ الدى - ماي ايلارىندا بولاتىن. التى تومدىق كىتاپتارىنا وقىرماندار ءۇشىن قولتاڭبا جازىپ بەرىپ وتىرعان ءساتى ەدى. 6-تومىنا اتى-ءجونىمدى سۇراپ، «ءىنىم ەركىمبايعا!» دەپ كۇلىمدەپ قول قويعان بولاتىن. تاۋعا شىققانداي ءماز بولىپ قۋانعانىم بار.

سول تومدى بىلتىر - 2012 - جىلى مۋزەي ۇيىندە ۇلى مۇراتقا كورسەتىپ، ماقتانىش كوڭىلمەن تارتۋ ەتتىم.

...1960 - جىلدىڭ جەلتوقسان ايى بولاتىن. ۇلى جازۋشى قازاق مەملەكەتتىك ۋنيۆەرسيتەتىنىڭ اكت زالىندا جاس قالامگەرلەر، جاڭا تالاپ ستۋدەنتتەرمەن كەزدەسۋ وتكىزگەن ەدى. كەيىن ماڭگى ەستە قالارلىقتاي بولىپ، «جىل كەلگەندەي جاڭالىق سەزىنەمىز» دەگەن ءوزىنىڭ اڭگىمە سۇحباتىن (سوڭعى سۇحبات) تىڭداپ، «لەنينشىل جاس» گازەتىندە جاريالانعانى ەستە.

امال نە، سودان داريا دارىن، ۇلى جازۋشى ماسكەۋدەن وپەراسيادان ويانباي، 19 - ماۋسىمدا كۇمىس تابىتتا ورالدى. قازاقتىڭ الىس-جاقىن اعايىندار كوزى ەل-سەل بوپ جاسقا تولىپ، ماڭگىلىككە شىعارىپ سالدىق... اقيىق اق سۇڭقاردىڭ قاناتى سىندى. ەڭىرەپ جىلاپ ەل-جۇرتى قالدى... الەمگە تارايتىن مول مۇراسى قالدى.

قازىر مەن سول مۋزەي-ءۇيدىڭ جانىندا تۇرامىن.

قاسيەتتى شاڭىراققا كىرىپ، قۇران باعىشتايتىن سالتىم، اللا ءوزى رازى بولسىن دەيمىن.

ءار ادام ەركىنەن تىس تابىناتىن زاڭعار اكادەميك-جازۋشى ەدى عوي!

ەركىنباي اكىمقۇلوۆ، جازۋشى الماتى قالاسى

«تۇركىستان». 2013