مۇحتار اۋەزوۆ امەريكانىڭ مادەنيەتى تۋرالى: جاس بۋىندى جابايىلىق باعىتتا باۋلىعانداي
استانا. قازاقپارات - مۇحتار اۋەزوۆ كوزى تىرىسىندە ءبىر ايعا جۋىق امەريكاعا ىسساپارمەن بارعان. جازۋشى «امەريكا اسەرلەرى» وچەركىندە نيۋ-يورك تەاترلارى، كينوسى جانە تاعى باسقا مادەنيەتى تۋرالى جازعان.
جازۋشى امەريكاداعى ءبىر ايعا جۋىق ساپارىنىڭ توعىز كۇنىن نيۋ-يوركتە وتكىزگەن. بۇل قالادا كورگەنى مەن بىلگەنى، تۇيگەنىن «امەريكا اسەرلەرى» وچەركىندە بايانداعان.
«مول جانە وتە ءبىر زالالدى ىقپالى كوپ امەريكاداعى جاس بۋىن اتاۋلىنى انىق، ايقىن جامان ازدىراتىن مول ءبىر سۋرەتتەر تاعى بار. ولار بۇزىقتىققا، قان توگۋگە، ادامدى ادام يتتەي تالاۋعا ارنالعان جانە سول جايلار وزىنشە كورەر كوزگە قىزىق، قىزدىرمالى وقيعا بولىپ قالىپتاناتىنىن كورەسىز. بۇلار ناعىز امەريكانىڭ كوپ ايتىلاتىن «كوميكسى» دەيتىن كينو سۋرەتتەرىنىڭ، تەلەفيلمدەرىنىڭ (تەلەۆيزور) مول-مول توبىنا جاتادى» دەپ جازدى جازۋشى وچەركىندە.
مۇحتار اۋەزوۆ امەريكا جاستارىنىڭ ەرەكشەلىگىنە تاڭعالىپ، ولاردى دا سۋرەتتەگەن.
«ساحنادا ءبىر سۇمدىق بولىپ جاتسا، زالدا وتىرعان بالالار مىنەزدەرى مەن قىلىقتارى ودان دا وتكەن سۇمدىق تارىزدەندى. بۇل بالالار تولعان زال ءاربىر ءولىم تۇسىندا شۋلاپ، ءماز بولا كۇلىسىپ، قول سوعىپ، اياقتارىمەن تاقتاي تەپكىلەپ، ءولتىرۋشىنىڭ ىسىنە قىزىعىپ، كادىمگى قويانعا تازى ءيتىن قوسىپ ايتاقتاتقان اڭشىلارداي بولىستى. بارلىق ءولىم ولارعا كينوسۋرەتتىڭ تاپقىزباس قىزىعىنداي قىزۋ اسەر ەتتى. ىركۋ، ىركىلۋ، قورقۋ-جيرەنۋ جوق، قىزىعۋ دا قىزىقتاۋ - جاس بالالارعا بۇگىنگى امەريكانىڭ كوپ كينو سۋرەتتەرىنىڭ بەرىپ جاتقان جان جەمى وسىنداي بولدى دا، ونى قابىلداۋ دا جاڭاعىداي. جانە بالالارعا سول كينوداعى جاڭاعى سۋرەتكە بيلەت ارزانداعان باعامەن ساتىلادى»، دەلىنگەن قولجازبادا.
ايتا كەتەيىك، 1960 -جىلى قازاق جازۋشىسى مۇحتار اۋەزوۆ ك س ر و-داعى بىرنەشە ارىپتەسىمەن ا ق ش مەملەكەتتىك دەپارتامەنتىنىڭ شاقىرۋىمەن امەريكاعا ساپارلاعان. اۋەزوۆ نيۋ-يورك، ۆاشينگتون، اريزونا مەن كاليفورنيا شتاتتارىن ءبىر اي بويى ارالاپ، كورگەن-بىلگەندەرىن وسى «امەريكا اسەرلەرى» دەپ اتاعان جولجازبا جيناعىنا تۇسىرگەن.
«بۇل كورگەنىمىز، مۇنداعى ەرىكسىز سەزگەنىمىز بۇگىنگى امەريكانىڭ بۇگىنگى بار مادەنيەتىنىڭ سىرتقى كوركى، تەحنيكاسى، بارلىعى، بايلىعى قاتارىندا مىناداي جاس بۋىندى جابايىلىق، قانقورلىق، جىرتقىشتىق باعىتتا باۋلىعانداي سۇمدىق اڭعارىلادى. سولاي بولماسقا، ويلاماسقا شارا دا جوق. ويتكەنى بۇل ءبىزدىڭ كورگەنىمىز ءبىر سۋرەتتىڭ تۇسىندا، بىرەر كينوتەاتردا عانا ەمەس، ول نيۋ-يورك، ۆاشينگتون، لوس-انجەلوس، بوستون سياقتى ۇلكەندى-كىشىلى قالالاردىڭ بارىندە، بارلىق كينو مەن تەلەەكراننىڭ ءبار-بارىندە ءجۇرىپ جاتقان كۇندەگى كوپتەن-كوپ شىعارمالار. ولاردى جاساۋشىلار اراسىندا ۇلكەن كونكۋرەنسيا - باسەكە دە بار. سونداي سۋرەتتەردى تۋعىزۋمەن ۇلكەن كاپيتالدار قۇراپ جاتقان كومپانيالار دا بار. ولار امەريكادا نە جازسا دا بولادى، نە تۋعىزسا دا بولادى، قانداي كينو جاساسا دا بوگەت جوق، سەنزۋرا جوق دەگەن سىماقتاردى سىلتاۋ، ارقا تىرەۋ ەتەدى. ءسويتىپ، جاس بۋىندى جامان، سۇمدىق، بۇزىقتىق، جىرتقىشتىققا كوزىن ۇيرەتىپ، كوڭىلىن كوندىرىپ، ادەيىلەپ باستاي باۋليدى. مىنە، امەريكا كوركەمونەرى اتالاتىن الەمنىڭ ىشىنەن وسىنداي دا ونەر بولمىستىڭ ءپىشىنىن كوردىك» دەپ جازدى ول ەڭبەگىندە.