شىمكەنت قالالىق ءبىلىم باسقارماسىنىڭ ءبىزدىڭ رەداكسياعا بەرگەن انىقتاماسىندا ەمشى قامقورلىققا العان 6 بالانىڭ ۇشەۋى استانادان دەپ كورسەتىلگەن. ەكەۋى - 2021 -جىلدىڭ 26-مامىرىندا تۋعان ەگىز، ءۇشىنشىسى - 2021 -جىلدىڭ 17 -مامىرىندا تۋعان قىز بالا. بىزدەگى مالىمەت بويىنشا، ول 2021 -جىلدىڭ 7 -شىلدەسىندە استانا قالالىق ءبىلىم باسقارماسى باسشىسىنىڭ №336 بۇيرىعىمەن قامقورشىلىققا بەرىلگەن. ەمشى مەن ونىڭ جۇبايى ەكى جىلدان كەيىن، ناقتى ايتقاندا 2023 -جىلدىڭ 30-قازانىندا ءسابيدى سوت شەشىمىمەن اسىراپ العان. ءبىراق، استانا قالالىق ءبىلىم باسقارماسى باسشىسىنىڭ ورىنباسارى سەرىك ادىلبايەۆ مۇنداي بۇيرىقتىڭ شىعارىلماعانىن ايتادى.
«2021 -جىلى 17-مامىردا تۋعان قىزعا قورعانشىلىق بەلگىلەۋ تۋرالى 2021 -جىلعى 07-شىلدەدە №336 بۇيرىق شىعارىلعان جوق. دەمەك، استانا قالاسىنىڭ ءبىلىم باسقارماسى بۇل بالانى قورعانشىلىققا بەرمەگەن»، - دەدى ول اگەنتتىك ءتىلشىسىنىڭ ساۋالىنا جاۋاپ بەرە وتىرىپ.
بۇعان دەيىن حابارلاعانىمىزداي، شىمكەنت تۇرعىنى قامقورلىعىنا العان 6 بالانىڭ اراسىندا ەگىز دە بار. ۇل مەن قىز 2021 -جىلدىڭ 26-مامىردا ەلوردادا دۇنيەگە كەلگەن. ەمشى ولاردى ءۇش ايلىق كەزدەرىندە باۋىرىنا باسقان. قامقورلىققا بەرىلگەن ەگىز ءسابيدىڭ تاعدىرىنا قاتىستى ءىستىڭ ءمان- جايىن استانا قالالىق ءبىلىم باسقارماسىنان سۇراپ بىلگەن بولاتىنبىز.