ەمدەلۋ قۇنى وسە مە - دەنساۋلىق ساقتاۋ مينيسترلىگى جاۋاپ بەردى
استانا. KAZINFORM - دەنساۋلىق ساقتاۋ مينيسترلىگى ءبىرقاتار بۇقارالىق اقپارات قۇرالدارىندا حالىق ءۇشىن ەمدەۋ قۇنى وسەدى دەگەن مازمۇنداعى اقپاراتتىڭ تارالۋىنا بايلانىستى رەسمي تۇسىنىكتەمە بەردى.
- بۇل بۇرمالانعان اقپارات ەكەنىن ايتقىمىز كەلەدى. مەديتسينالىق قىزمەتتەر تاريفى - بۇل مەملەكەت بەكىتكەن سومالار. ەمحانالار مەن اۋرۋحانالار سياقتى مەديتسينالىق ۇيىمدارعا پاتسيەنتتەردى ەمدەگەنى ءۇشىن تولەنەتىن قاراجات. بۇل تولەمدەر مەديتسينالىق ساقتاندىرۋ قورى ارقىلى جۇزەگە اسىرىلادى.
ماسەلەن، ەگەر ازامات مەديتسينالىق كومەكتى مىندەتتى الەۋمەتتىك مەديتسينالىق ساقتاندىرۋ (م ءا م س) جۇيەسى ارقىلى نەمەسە مەملەكەت كەپىلدىك بەرگەن تەگىن مەديتسينالىق كومەك (ت م ك ك ك) اياسىندا السا، ول ەشقانداي تولەم جاسامايدى.
الايدا بۇل قىزمەت ءۇشىن مەديتسينالىق ساقتاندىرۋ قورى مەديتسينالىق ۇيىمعا بەكىتىلگەن تاريف بويىنشا اقى تولەيدى. ماسەلەن، وپەراتسيا ءۇشىن 50000 تەڭگە نەمەسە دارىگەر كەڭەسى ءۇشىن 5000 تەڭگە، - دەلىنگەن مينيسترلىك حابارلاماسىندا.
مينيسترلىك مەديتسينالىق قىزمەتتەر تاريفىنىڭ ارتۋى - حالىق ءۇشىن ەمدەلۋ باعاسىنىڭ ءوسۋى دەگەندى بىلدىرمەيتىنىن اتاپ ءوتتى.
- 2025 -جىلعى 22 -شىلدەدە جاريالانعان دەنساۋلىق ساقتاۋ مينيسترلىگىنىڭ باسپا ءسوز حابارلاماسىندا («قوعامدىق كەڭەستە مەديتسينالىق ساقتاندىرۋ جۇيەسىندەگى نەگىزگى وزگەرىستەر تالقىلاندى» ) 2026 -جىلدان باستاپ توعىز نەگىزگى باعىت بويىنشا تاريفتەردى كوتەرۋ جوسپارلانعانى ايتىلعان بولاتىن.
بۇل تاريفتەر 2020 -جىلدان بەرى قايتا قارالماعان جانە مەديتسينالىق قىزمەتتەردىڭ ناقتى وزىندىك قۇنىن تولىق جاپپايدى.
حابارلامادا تاريفتەردى وزەكتەندىرۋ ستاتسيونارلىق سەكتورداعى سوزىلمالى قارجىلاندىرۋ تاپشىلىعىن جويۋ جانە مەديتسينالىق قىزمەتتەردىڭ ناقتى قۇنىن وتەۋ ماقساتىندا جۇرگىزىلىپ جاتقانى اتاپ ءوتىلدى، - دەلىنگەن د س م حابارلاماسىندا.
دەنساۋلىق ساقتاۋ مينيسترلىگى بۇل مەديتسينالىق كومەكتىڭ ساپاسى مەن قولجەتىمدىلىگىن ارتتىرۋ، مەديتسينا قىزمەتكەرلەرىن ىنتالاندىرۋ ءۇشىن اتقارىلىپ جاتقان جۇيەلى جۇمىستىڭ ماڭىزدى بولىگى ەكەنىن اتاپ ءوتتى.
- ازاماتتار ءۇشىن مەملەكەت كەپىلدىك بەرگەن تەگىن مەديتسينالىق كومەك (ت م ك ك ك) پەن م ءا م س پاكەتتەرىنە كىرەتىن بارلىق قىزمەت بۇرىنعىشا تەگىن بولىپ قالا بەرەدى. ەگەر دەنساۋلىق ساقتاۋ مينيسترلىگىنىڭ رەسمي رەسۋرستارىندا جاريالانعان اقپارات تولىق تۇسىنىكتى بولماسا، ۆەدومستۆونىڭ باسپا ءسوز قىزمەتىنە جۇگىنۋدى ۇسىنامىز، - دەدى مينيسترلىكتە.