مۇگەدەكتىكتى راسىمدەۋ ۋاقىتى قىسقارادى

استانا. KAZINFORM - قازاقستاندا مۇگەدەكتىكتى بەلگىلەۋ كەزىندە قىزمەت كورسەتۋ مەرزىمىن قىسقارتۋ ءۇشىن جاڭا سيفرلىق شەشىمدەر ەنگىزىلىپ جاتىر. بۇل تۋرالى ەڭبەك جانە حالىقتى الەۋمەتتىك قورعاۋ ۆيتسە- ءمينيسترى باحتيار جازىقپايەۆ مالىمدەدى.

ونىڭ ايتۋىنشا، بۇل باعىتتا مەديتسينالىق دەرەكتەر نەگىزىندە ساراپشىلارعا ۇسىنىمدار قالىپتاستىراتىن جاساندى ينتەللەكت مودەلى ىسكە قوسىلعان.

- مەديتسينالىق دەرەكتەر مەن قۇجاتتار نەگىزىندە ساراپشىلارعا ۇسىنىمدار بەرەتىن جۇيە ەنگىزىلدى. بۇل رەتتە تۇپكىلىكتى شەشىمدى مامان قابىلدايدى. جۇيە ىسكە قوسىلعان ساتتەن باستاپ 24 مىڭنان استام ءوتىنىم وڭدەلدى، - دەدى ول.

سونىمەن قاتار قىزمەت الۋ پروتسەسىن جەڭىلدەتۋ ءۇشىن ەلەكتروندىق كەزەك جۇيەسى ەنگىزىلىپ جاتىر.

- اقمولا وبلىسىندا پيلوتتىق جوبا اياسىندا 1,6 مىڭعا جۋىق ءوتىنىم بەرىلدى. ونىڭ ىشىندە 1,1 مىڭنان استام ازامات كۋالاندىرۋ راسىمىنەن وتۋگە جازىلدى. بۇل كۇتۋ ۋاقىتىن قىسقارتىپ، قىزمەت الۋ ۇدەرىسىن جەڭىلدەتتى، - دەدى باحتيار جازىقپايەۆ.

ۆيتسە-ءمينيستردىڭ سوزىنشە، الداعى ۋاقىتتا بۇل باعىتتاعى جۇمىستار جالعاسادى.

- ەلەكتروندىق كەزەكتى كەڭەيتۋ، جاساندى ينتەللەكت مودەلدەرىن دامىتۋ جانە ولاردى دەنساۋلىق ساقتاۋ جۇيەلەرىمەن بىرىكتىرۋ جوسپارلانىپ وتىر، — دەدى ول.

بۇدان بولەك، الەۋمەتتىك قىزمەتتەر پورتالىن دامىتۋ جۇمىستارى دا قاتار جۇرگىزىلىپ جاتىر.

پورتال ارقىلى ازاماتتار وڭالتۋ قۇرالدارىنا، شيپاجايدا ەم الۋعا جانە جەكە كومەكشى قىزمەتتەرىنە قول جەتكىزە الادى.