مۇگەدەك جاندارعا زەينەتاقى مەن جاردەماقىنى بىردەي الۋ قۇقىعى بەرىلە مە

استانا. KAZINFORM - پرەمەر- ءمينيستردىڭ ورىنباسارى تامارا دۇيسەنوۆا ءماجىلىس دەپۋتاتتارىنىڭ مۇگەدەك جاندارعا ءبىر مەزگىلدە زەينەتاقى مەن مۇگەدەكتىگى بويىنشا جاردەماقىنى الۋ قۇقىعىن بەرۋگە قاتىستى ساۋالىنا جاۋاپ بەردى.

«مەملەكەت تاراپىنان بەرىلەتىن مۇگەدەكتىگى ءۇشىن جاردەماقى جانە جاسىنا بايلانىستى زەينەتاقى الەۋمەتتىك تولەمدەردىڭ تۇرلەرى سانالادى جانە ولار ءارتۇرلى ومىرلىك تاۋەكەلدەرگە نەگىزدەلگەن. الەۋمەتتىك كودەكسكە سايكەس مۇگەدەكتىگى بار ادام زەينەتكەرلىك جاسقا جەتكەن كەزدە وعان جاردەماقىنى تولەۋ توقتاتىلىپ، زەينەتاقى تاعايىندالادى (ەڭبەك وتىلىنە، العان جالاقىنىڭ مولشەرىنە قاراي). ەگەر دە تاعايىندالاتىن زەينەتاقى بۇرىن العان جاردەماقىدان (ءتيىستى ساناتتارى ءۇشىن) از بولسا، وندا جاردەماقىنىڭ مولشەرىنە دەيىن جەتكىزىلەدى (قوسىمشا اقىلار ارقىلى). ال ەگەر مۇگەدەكتىگى بار ادامدار زەينەتكەرلىك جاسقا تولعاندا، زەينەتاقى الۋعا نەگىز بولماسا (قۇقىعى جوق، وبەكتيۆتى جاعدايعا بايلانىستى جيناقتاۋشى زەينەتاقى قورىندا جارنالارى جوق، مۇلدەم جۇمىس ىستەمەگەن) مۇگەدەكتىگى بويىنشا الىپ وتىرعان جاردەماقىنىڭ مولشەرى ساقتالادى»، - دەدى ۆيتسە- پرەمەر.

سونىمەن قاتار، تامارا دۇيسەنوۆا ولارعا وڭالتۋدىڭ جەكە باعدارلاماسى بويىنشا قاراستىرىلعان تەحنيكالىق قۇرالدارى (كرەسلو- اربا، پروتەزدىك بۇيىمدار، نوۋتبۋكتار، ەستۋ اپپاراتتارى، ۇيالى تەلەفوندار جانە ت. ب. ) مەملەكەتتىك بيۋدجەت قاراجاتى ەسەبىنەن تەگىن جانە وتەۋسىز نەگىزدە تۇراقتى پايدالانۋعا بەرىلەتىندىگىن ايتادى.

«بۇل نورمالار حالىقارالىق تاجىريبەگە سايكەس كەلەدى. وسىعان وراي، ءبىر مەزگىلدە زەينەتاقى مەن جاردەماقىنى الۋ بيۋدجەتكە ايتارلىقتاي اۋىرتپاشىلىق تۇسىرەتىنىن ەسكەرە وتىرىپ، قازىرگى ۋاقىتتا اتالعان ماسەلەنى قاراستىرۋ جوسپاردا جوق ەكەنىن حابارلايمىز»، - دەدى ول.

ۇكىمەت باسشىسىنىڭ جاۋابىنا قوسىمشا بەرىلگەن انىقتاماعا سايكەس، 2025 -جىلى جاردەماقى مولشەرى جالپى اۋرۋى بويىنشا I توپ ءۇشىن 101702 تەڭگە، II توپ - 81362 تەڭگە، III توپ - 55474 تەڭگە، مۇگەدەكتىگى بالا كەزىنەن بولسا I توپ ءۇشىن 101702 تەڭگە، II توپ - 84598 تەڭگە، III توپ - 74428 تەڭگەنى قۇرايتىن بولادى.