مەدەۋ ارىنبايەۆ ورىندايتىن «داريعا جۇرەك» ءانى نازاربايەۆتىڭ قىزىنا ارنالعان

استانا. KAZINFORM - حالىق اراسىندا كەڭىنەن تانىلعان «داريعا جۇرەك» ءانى ارنايى تاپسىرىسپەن داريعا نازاربايەۆا ءۇشىن جازىلعان.

بۇل تۋرالى nur.kz سايتىنا بەرگەن سۇحباتىندا ءاننىڭ اۆتورى باۋىرجان ەسەبايەۆ ايتىپ بەردى.

وسىدان 20 جىل بۇرىن جارىققا شىققان «داريعا جۇرەك» ءانىنىڭ اۆتورى - باۋىرجان ەسەبايەۆ، ال حالىققا تانىتقان ورىنداۋشى - مەدەۋ ارىنبايەۆ.

سازگەردىڭ ايتۋىنشا، بۇل ءاندى 2003-جىلى بۇرىنعى پرەزيدەنتتىڭ ۇلكەن قىزى داريعا نازاربايەۆانىڭ ءتول مەرەكەسىنە وراي ارنايى تاپسىرىسپەن جازعان ەكەن.

«نەگىزى بۇل اقپاراتتى بۇرىن اشىق ايتقان ەمەسپىن. كۇندەردىڭ كۇنىندە ماعان سول كەزدەگى «حابار» تەلەارناسىنىڭ باس پروديۋسەرى سەرىك اباس-شاح حابارلاستى دا، تەلەارنا جاققا كەلۋىمدى ءوتىندى. «داريعا نازاربايەۆانىڭ تۋعان كۇنى كەلە جاتىر. سوعان ءبىر ءان جازىپ، كليپ ءتۇسىرۋىمىز كەرەك» دەدى. ءسويتىپ تاپسىرىس الدىم. ۋاقىت ءوتىپ جاتىر، سەرىك اباس-شاح تا مەنى اسىقتىردى. «ءان قايدا، ءان قايدا؟» دەپ كۇندە سۇرايدى. ءار ءاندى جازعان كەزدە ىزدەنەسىڭ عوي، سول كەزدە مەن مۇقاعالي ماقاتايەۆتىڭ «داريعا جۇرەك» دەگەن پوەماسىن كورىپ قالدىم. شىعارمادان قاتتى اسەر الدىم. سول كەزدە وسى «داريعا جۇرەك» دەگەن ءان جازسام دەگەن وي كەلدى. ءاننىڭ اتاۋىن سولاي تاپتىم. ال مۇقاعالي اتامىزدىڭ «داريعا جۇرەك» پوەماسى يدەيانىڭ كوزى بولدى. سودان كەيىن وسى «داريعا جۇرەك» دەگەن اتاۋدى الىپ، ءوزىم ءانى مەن ءسوزىن جازىپ، سەرىك اباس-شاحقا وتكىزىپ جىبەرسەم دەپ جوسپارلادىم. ايتەۋىر داريعا دەگەن اتى تۇر، ونى سەرىك اعا بىلە قويماس دەپ ويلادىم. ءسويتىپ سەرىك اباس-شاح ءاندى قۋانا-قۋانا الىپ، سول ساتتە-اق ءان وڭدەۋشى رينات گايسينگە بەردى»، - دەيدى باۋىرجان ەسەبايەۆ.

جازىلعان ءاندى العاشىندا مەدەۋ ارىنبايەۆ ورىنداپ، حالىققا تانىتقان ەدى. ال قازىر بۇل حيت ءاندى عازيزحان شەكەربەك، قازىبەك قۇرايىش، ايگەرىم وراز سياقتى تانىمال انشىلەر ورىنداپ ءجۇر.