مۇعالىمدەردى باسپانامەن قامتاماسىز ەتۋدىڭ قانداي تەتىكتەرى قاراستىرىلعان

استانا. KAZINFORM - وقۋ-اعارتۋ مينيسترلىگى پەداگوگتەردى تۇرعىن ۇيمەن قامتاماسىز ەتۋگە قاتىستى تۇسىنىك بەردى.

- ءبىلىم باسقارمالارىنىڭ اقپاراتى بويىنشا ەلىمىزدە 2025 -جىلى 277 پەداگوگ مەملەكەت تاراپىنان تەگىن تۇرعىن ۇيمەن (ونىڭ ىشىندە 185- ءى قالالىق، 92- ءى اۋىلدىق جەردە)، 184 پەداگوگ قىزمەتتىك تۇرعىن ۇيمەن قامتىلدى، ال 1025 پەداگوگ جاتاقحانالارعا ورنالاستىرىلدى، - دەلىنگەن مينيسترلىكتىڭ Kazinform اگەنتتىگىنە بەرگەن جاۋابىندا.

سونىمەن قاتار، 212 پەداگوگكە تۇرعىن ءۇي قۇرىلىسى ءۇشىن تەگىن جەر تەلىمدەرى ۇلەستىرىلگەن.

- تۇرعىن ءۇيدى جالعا الۋعا 501 پەداگوگكە جاعداي جاسالعان. كوممۋنالدىق قىزمەتتەرگە وتەماقىمەن قامتىلعان (اۋىلدىق جەرلەردە وتىنمەن، سۋمەن، كومىرمەن) پەداگوگتەر سانى - 138071 (ونىڭ ىشىندە 137773 پەداگوگ اۋىلدىق جەردە، 298- ءى قالالىق جەردە)،- دەپ ناقتىلادى ۆەدومستۆو.