ماگيستراتۋراعا ءتۇسۋ كەزىندە باكالاۆريات بەيىنىنە قاراي شەكتەۋ ەنگىزىلە مە - عىلىم مينيسترلىگى جاۋابى

استانا. KAZINFORM - عىلىم جانە جوعارى ءبىلىم مينيسترلىگى ءماجىلىس دەپۋتاتتارىنىڭ ماگيستراتۋراعا ءتۇسۋ كەزىندە باكالاۆريات بەيىنىنە قاراي شەكتەۋ ەنگىزۋگە قاتىستى ساۋالىنا جاۋاپ بەردى.

- «ءبىلىم تۋرالى» قازاقستان رەسپۋبليكاسىنىڭ زاڭىنا سايكەس جوعارى وقۋ ورنىنان كەيىنگى ءبىلىم بەرۋدىڭ ءبىلىم بەرۋ باعدارلامالارى جوعارى بىلىكتى پەداگوگتاردى، عىلىمي قىزمەتكەرلەر مەن باسقارۋشى كادرلاردى دايارلاۋعا، ولاردىڭ عىلىمي، پەداگوگيكالىق جانە كاسىپتىك دايارلىق دەڭگەيىن دايەكتى ارتتىرۋعا باعىتتالعان. بۇگىنگى تاڭدا ماگيستراتۋرا باعدارلامالارى ساباقتاس ءپاندى تەرەڭدەتۋگە نەمەسە بۇرىن العان بىلىمدەرىن جاڭا قۇزىرەتتەرمەن تولىقتىرۋعا مۇمكىندىك بەرەدى. ءبىر سالادا بازالىق ءبىلىم العان جوعارى وقۋ ورىندارىنىڭ تۇلەكتەرى وقۋ نەمەسە پراكتيكالىق قىزمەت بارىسىندا كوبىنەسە كاسىبي باعىتتى وزگەرتۋ نەمەسە كەڭەيتۋ قاجەتتىلىگىن تۇسىنەدى جانە قولدانىستاعى قابىلداۋ مەحانيزمى ولارعا مانساپتىق نەمەسە ءبىلىم بەرۋ جوسپارلارىن تۇزەتۋگە مۇمكىندىك بەرەدى، - دەدى عىلىم ءمينيسترىنىڭ مىندەتىن اتقارۋشى دينارا شەگلوۆا جاۋابىندا.

ونىڭ اتاپ وتۋىنشە، باكالاۆريات بەيىنىنە قاتاڭ بايلانىستىرماي ماگيستراتۋراعا تۇسۋگە جىبەرۋ حالىقارالىق تاجىريبەگە سايكەس كەلەدى. الەمنىڭ جەتەكشى ۋنيۆەرسيتەتتەرىندە تەك بەيىن عانا ەمەس، سونىمەن بىرگە اكادەميالىق جەتىستىكتەر، ءبىلىمدى جوعارى اكادەميالىق دەڭگەيدە مەڭگەرۋ جانە قولدانۋ قابىلەتى، ۇسىنىستار مەن پراكتيكالىق تاجىريبەنىڭ بولۋى باعالانادى. بولون پروتسەسىنە قاتىساتىن ەلدەردە ماگيستراتۋرا باعدارلامالارىنا جەتكىلىكتى دايىندىق پەن قىزىعۋشىلىق بولعان جاعدايدا تۇسۋگە بولادى.

- بۇل تانىلعان تاسىلدەن باس تارتۋ قازاقستاندىق جوعارى وقۋ ورىندارىنىڭ باسەكەگە قابىلەتتىلىگىن تومەندەتۋى، حالىقارالىق باعدارلامالارعا (Erasmus+، DAAD، Fulbright) قاتىسۋ مۇمكىندىگىن شەكتەۋى ىقتيمال. سونىمەن قاتار، جوعارى وقۋ ورنىنان كەيىنگى ءبىلىم بەرۋدىڭ مەملەكەتتىك جالپىعا مىندەتتى ستاندارتىنا سايكەس ماگيستراتۋرانىڭ ءبىلىم بەرۋ باعدارلاماسىنىڭ بەيىنى جوعارى ءبىلىمنىڭ ءبىلىم بەرۋ باعدارلاماسىمەن سايكەس كەلمەگەن جاعدايدا ماگيسترانتقا يگەرۋ ءۇشىن پرەرەكۆيزيتتەر بەلگىلەنەدى. قاجەتتى پرەرەكۆيزيتتەردىڭ تىزبەسىن جانە ولاردى يگەرۋ مەرزىمدەرىن ج ج و ك ب ۇ دەربەس ايقىندايدى. سوندىقتان ماگيستراتۋراعا ءتۇسۋ كەزىندە ءبىلىم بەرۋ باعدارلاماسىنىڭ بەيىنى سايكەس كەلمەگەن جاعدايدا مىندەتتى تۇردە قاجەتتى پرەرەكۆيزيت تاپسىرىلادى. بۇل ءتاسىل وقۋ باعىتىن تاڭداۋدا يكەمدىلىك پەن زەيىن اراسىنداعى تەپە-تەڭدىكتى قامتاماسىز ەتەدى، - دەدى دينارا شەگلوۆا.

ۆيتسە-ءمينيستردىڭ اتاپ وتۋىنشە، 2018 -جىلدان باستاپ جوعارى جانە جوعارى وقۋ ورنىنان كەيىنگى ءبىلىم بەرۋدىڭ مەملەكەتتىك ستاندارتتارى وقۋ ناتيجەلەرىنە باعدارلانا وتىرىپ نەعۇرلىم يكەمدى ازىرلەندى. وسى ستاندارتتاردا باكالاۆرياتتاعى بارلىق جوعارى وقۋ ورىنىنىڭ اكادەميالىق دەربەستىگى - 80، ماگيستراتۋرادا - 85، دوكتورانتۋرادا 90 پايىزعا دەيىن كەڭەيتىلدى.

- بۇگىندە ج و و- لار جۇمىس بەرۋشىلەرمەن تىعىز ءوزارا ءىس- قيمىلدا ەكونوميكا سالالارىنىڭ قاجەتتىلىگىن ەسكەرە وتىرىپ، ءبىلىم بەرۋ باعدارلامالارىن دەربەس ازىرلەيدى. بۇل ءبىلىم بەرۋ قىزمەتتەرىن ۇسىنۋ ساپاسىنىڭ كورسەتكىشى بولىپ تابىلاتىن سۇرانىستى بەلگىلەيتىن نارىق. ءوز كەزەگىندە، بۇل باسەكەلەستىكتى كۇشەيتەدى، ساپانى جاقسارتادى، يكەمدى بولۋعا جانە كەز كەلگەن وزگەرىستەرگە تەزىرەك جاۋاپ بەرۋگە مۇمكىندىك بەرەدى. ايتا كەتۋ كەرەك، جىل سايىنعى باكالاۆريات بىتىرەتىن 150 مىڭ ادام، ونىڭ ىشىندە 16 مىڭ ادام عانا ماگيستراتۋراعا تۇسەدى، ياعني 11 پايىزى عانا. ماگيستراتۋراعا ءتۇسۋ كەزىندە شەكتەۋ ەنگىزۋ قابىلداۋ كورسەتكىشىن ەداۋىر تومەندەتىپ، تالانتتى جاستاردىڭ شەتەلگە كەتۋىنە اكەلۋى مۇمكىن. وسىعان بايلانىستى، بۇگىنگى تاڭدا باكالاۆريات بەيىنى بويىنشا شەكتەۋ جاعىنا قاراي قايتا قاراۋدى ورىنسىز دەپ سانايمىز. بۇل رەتتە قابىلداۋ راسىمدەرىن جەتىلدىرۋ جانە ىرىكتەۋ كريتەرييلەرىنىڭ اشىقتىعىن كۇشەيتۋ جونىندەگى جۇمىس جالعاستىرىلاتىن بولادى، - دەدى ول.

بۇعان دەيىن قىركۇيەك ايىندا ستۋدەنتتەردىڭ ستيپەندياسى قانشاعا وسەتىنىن جازعان ەدىك.

اۆتور

مارلان جيەمباي