مايقايىڭداعى ويىققا ءتۇسىپ كەتكەن اۆتوبۋس تابىلدى

پاۆلودار. KAZINFORM - مايقايىڭ-التىن كەنىشىندەگى شاحتا ويىعىنا ءتۇسىپ كەتكەن اۆتوبۋس تابىلدى. قۇتقارۋشىلار ونى كەشە كەشكىسىن بايقاپ، قازىرگى ۋاقىتتا ونى قازىپ شىعارۋعا ارەكەتتەنىپ جاتىر.

ىشىندە كولىك جۇرگىزۋشى ايىپ تىلەۋبەرگەنوۆتىڭ دەنەسى بولۋى مۇمكىن دەپ بولجانىپ وتىر. اۆتوبۋس ارادا 7 ايعا جۋىق ۋاقىت وتكەندە توپىراق اراسىنان تابىلدى.

«مايقايىڭ-التىن» ا ق تاۋ-كەن اۋدانىنداعى وپىرىلعان جەردە ىزدەستىرۋ جۇمىستارى جالعاسىپ جاتىر. تەحنيكا 24 -شىلدە كۇنى كەشكىلىك توپىراق اراسىنان بايقالا باستاعان. «قازۋ جۇمىستارى كەزىندە قۇتقارۋشىلاردىڭ اۆتوبۋسى تابىلدى. اۋا رايىنىڭ قولايسىزدىعىنا (جاڭبىر مەن جەل) جانە توپىراقتىڭ قۇلاۋ قاۋپىنىڭ ساقتالۋىنا بايلانىستى جۇمىستار اسا ساقتىقپەن جۇرگىزىلۋدە. بۇگىن تاڭعى ساعات 05.00-دەن باستاپ ىزدەستىرۋ جۇمىستارى قايتا جانداندى. قازىرگى ۋاقىتتا كولىكتىڭ الدىڭعى بولىگىنە دەيىن جەتۋ مۇمكىن بولىپ، بامپەرى مەن دوڭعالاعى كورىندى. 55 جاستاعى ءتورتىنشى قۇتقارۋشى، جۇرگىزۋشى ايىپ تىلەۋبەرگەنوۆتىڭ دەنەسى ءالى تابىلعان جوق. جاقىن ارادا ىزدەستىرۋ جۇمىستارى ناتيجە بەرەدى دەگەن ۇمىتتەمىز»، - دەپ حابارلادى پاۆلودار وبلىسى اكىمىنىڭ باسپا ءسوز قىزمەتىنەن.

ەسكە سالا كەتەيىك، بۇعان دەيىن مايقايىڭدا التى ايدان سوڭ ءۇشىنشى قۇتقارۋشىنىڭ مۇردەسى تابىلدى.

مارقۇم ايدوس شايمەردەننىڭ دەنەسى 70 مەتر تەرەڭدىكتەن قازىپ الىنعان.

اۆتور

مۇرات اياعان