مايقايىڭدا التى اي بۇرىن جەردىڭ استىنا ءتۇسىپ كەتكەن سوڭعى ادامنىڭ دەنەسى تابىلدى

پاۆلودار. قازاقپارات - 25-شىلدەدە قۇتقارۋشىلار مايقايىڭ كەنىشىندە جەردىڭ استىنا ءتۇسىپ كەتكەن ءتورتىنشى ادامدى تاپتى.

اۆتوبۋستىڭ بولشەكتەرىن شىعارۋ ءۇشىن ت ج د قۇتقارۋشىلارى جانە شاحتا قىزمەتكەرلەرى وپىرىلعان توپىراق پەن تاستىڭ قۇلاۋ قاۋپىنە قاراماستان جۇمىس ىستەدى.

ونىڭ بارىسىندا ساعات 16:05-تە ەكسكاۆاتور ارقىلى توپىراقتى بوگەۋ كەزىندە 75 مەتر تەرەڭدىكتەن ماشينيستىڭ دەنەسى تابىلىپ، ساراپتاماعا جىبەرىلدى.

ىزدەۋ-قۇتقارۋ جۇمىستارى تاۋلىك بويى جانە ايتارلىقتاي ۇلكەن قاۋىپپەن جۇرگىزىلگەنىن اتاپ وتكەن ءجون.

تاۋ جىنىستارى مەن توپىراق ۇنەمى سىرعىپ ءتۇسىپ جاتتى. جۇمىسقا ءارتۇرلى قىزمەتتەردىڭ 200-دەن استام قىزمەتكەرى تارتىلدى.

فوتو: ت ج م

180 مىڭنان استام توننا تاۋ ماسساسى شىعارىلدى.

«بۇل شاعىن ەكسكاۆاتورعا اۆتوبۋستىڭ ورنالاسقان جەرىنە ءتۇسىپ، جۇمىستى باستاۋعا مۇمكىندىك بەردى. شۇڭقىردىڭ شەتىنەن توپىراق پەن تاۋ جىنىستارىنىڭ قوزعالىسى مەن قۇلاۋىن باقىلاۋ جۇرگىزىلدى. قۇتقارۋشىلار شۇڭقىردىڭ تۇبىندەگى ەكسكاۆاتورلار مەن باسقا مامانداردىڭ جۇمىسىن ساقتاندىرۋ مەن قاۋىپسىزدىكتى ۇنەمى قامتاماسىز ەتىپ وتىردى. اۆاريالىق- قۇتقارۋ ەرەجەسى مەن قاۋىپسىزدىك شارالارىن ساقتاي وتىرىپ، جانارماي، تاماق، ماركشەيدەر - مامانداردى ءتۇسىرۋ، سونداي-اق تابىلعان زاتتار كوتەرىلدى» دەيدى ت ج م باسپا ءسوز قىزمەتىنەن.

ماماندار توپىراقتى مەتال دەتەكتورىمەن، گەوسكانەرمەن جانە ماگنيتومەترمەن ۇنەمى سكانەرلەپ وتىردى.

سونىمەن قاتار وقيعا ورنىندا كينولوگتار جۇمىس ىستەدى.

ەسكە سالا كەتەيىك، 4-قاڭتاردا پاۆلودار وبلىسىنداعى مايقايىڭ التىن كەنىشىندە ىشىندە ادامدار بار اۆتوبۋس جەر استىنا ءتۇسىپ كەتتى.

وقيعا ورنىنان ەكى ادامنىڭ دەنەسى تابىلدى.

كەيىن قۇتقارۋشىلار توپىراقتىڭ ءجيى قوزعالۋىنا بايلانىستى جەر قازۋ جۇمىستارىن توقتاتتى.

ال مامىر ايىندا مايقايىڭ التىن كەنىشىندە قوس قۇتقارۋشىنى ىزدەۋ جۇمىستارى قايتا جانداندى.

19-شىلدەدە مايقايىڭدا التى ايدان سوڭ ءۇشىنشى قۇتقارۋشىنىڭ مۇردەسى تابىلعان ەدى. مارقۇم ايدوس شايمەردەننىڭ دەنەسى 70 مەتر تەرەڭدىكتەن قازىپ الىنعان.

ال بۇگىن ويىققا ءتۇسىپ كەتكەن اۆتوبۋس جوعارى شىعارىلدى.