مايمىل شەشەگى قالاي جۇعادى - دارىگەر جاۋابى

الماتى. KAZINFORM - الماتى قالاسىنىڭ سانيتاريالىق- ەپيدەميولوگيالىق باقىلاۋ دەپارتامەنتى شەتەلگە ساياحاتتاۋدى جوسپارلاپ وتىرعان جەرلەستەرىمىزگە مايمىل شەشەگىنەن ساقتانۋدىڭ نۇسقاۋلىعىن ۇسىندى.

- مايمىل شەشەگى دەنەگە زاقىمدالعان تەرى، شىرىشتى قاباتتار (اۋىز قۋىسى، جۇتقىنشاق، كوز، جىنىس مۇشەلەرى) نەمەسە تىنىس الۋ جولدارى ارقىلى ەنەدى. بۇل ۆيرۋس ادامعا اۋرۋ جانۋارلاردىڭ تىستەپ نەمەسە تىرناپ الۋى ارقىلى، سونىمەن قاتار اڭ اۋلاۋ، تاماق دايىنداۋ، تەرىسىمەن جۇمىس ىستەۋ نەمەسە مۇقيات وڭدەۋدەن وتپەگەن جانۋارلاردىڭ ەتىن جەگەن كەزدە جۇعادى. سونداي- اق مايمىل شەشەگى كيىم- كەشەك نەمەسە توسەك- ورىن سياقتى لاستانعان زاتتاردان، دەنساۋلىق ساقتاۋ مەكەمەلەرىندە نەمەسە تاتۋ سالوندارى سياقتى قوعامدىق ورىنداردا وتكىر قۇرالداردان جاراقات الۋ كەزىندە جۇعۋى مۇمكىن،- دەدى الماتى قالاسىنىڭ سانيتاريالىق- ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى اسەل قالىقوۆا.

سونداي-اق ول مايمىل شەشەگىنىڭ ينكۋباتسيالىق كەزەڭى 6 دان 13 كۇنگە دەيىن سوزىلاتىنىن جانە ودان كەيىن قىزبا، باس اۋرۋى، جالپى ادام بويىنداعى السىزدىك پايدا بولىپ، بەت، اياق، الاقانداردا، اۋىز قۋىسى مەن جىنىس ايماعىندا بورتپە شىعاتىنىن اتاپ ءوتتى. اسەل قالىقوۆانىڭ ايتۋىنشا، مايمىل شەشەگى ادەتتە وزدىگىنەن قايتادى. ءبىراق بالالارعا، جۇكتى ايەلدەرگە جانە يممۋنيتەتى تومەن ادامدارعا اۋىردان جازىلۋ وڭاي بولماۋى مۇمكىن.

سانيتاريالىق-ەپيدەميولوگيالىق باقىلاۋ دەپارتامەنتى شەتەلگە شىعۋدى جوسپارلاعان جەرلەستەرىمىزگە مايمىل شەشەگى جۇقپاس ءۇشىن ءبىرقاتار ەرەجەنى ۇستانۋعا كەڭەس بەرەدى:

1. باسقا ەلگە بارار الدىندا وسى ايماقتاعى ەپيدەميولوگيالىق جاعداي تۋرالى اقپاراتتى تەكسەرىڭىز. بۇل سىزگە قاۋىپتەن حاباردار بولۋعا جانە قاجەتتى ساقتىق شارالارىن قابىلداۋعا كومەكتەسەدى.

2. تەرى بورتپەلەرى نەمەسە اۋرۋدىڭ باسقا بەلگىلەرى بار ادامدارمەن جاقىن قارىم- قاتىناستى ازايتۋعا تىرىسىڭىز.

3. ەگەر سىزدە بەلگىلەر پايدا بولسا، ينفەكتسيانىڭ ىقتيمال تارالۋىن بولدىرماۋ ءۇشىن باسقا ادامدارمەن بايلانىستا بولۋدان اۋلاق بولىڭىز.

4. ماسكانى قولدانىڭىز، تەرىڭىزگە جانە بورتپەلەرگە قول تيگىزبەڭىز. قولىڭىزدى جۇيەلى تۇردە جۋىڭىز جانە جاناسقان زاتتاردى زارارسىزداندىرىڭىز.

5. ەگەر ۇيگە ورالعاننان كەيىن 21 كۇن ىشىندە بورتپە بەزگەگى، باس اۋرۋى نەمەسە ليمفا تۇيىندەرىنىڭ ءىسىنۋى سياقتى بەلگىلەر پايدا بولسا، دەرەۋ دارىگەرگە قارالىڭىز.

6. مەديتسينالىق مەكەمەگە بارعان كەزدە دارىگەرگە ءتيىستى تاعايىنداۋى ءۇشىن قايدا بولعانىڭىزدى جانە كىممەن بايلانىستا بولعانىڭىزدى حابارلاۋدى ۇمىتپاڭىز.

ەسكە سالايىق، استانا مەن الماتى اۋەجايلارىندا مايمىل شەشەگى ينفەكتسياسىنا قارسى وقۋ- جاتتىعۋ وتكەن بولاتىن.

سونداي-اق تايلاندتا مايمىل شەشەگىنىڭ العاشقى جاعدايى انىقتالعانىن جازعانبىز.