مايلىقوجا سۇلتانقوجا ۇلى ولەڭدەرى
مايلىقوجانىڭ «دۇنيەگە مەيمان كوڭىلىم»، «ولمەك پارىز، - دەپ ايتار، - تۋماق سۇندەت»، «جاقسى بولسىن جۇبايىڭ» سەكىلدى تۋىندىلارى بەرىلدى.
دۇنيەگە مەيمان كوڭىلىم
دۇنيەگە مەيمان كوڭىلىم،
ماقتانسام داۋا تىلەرسىڭ.
ولشەنىپ بەرگەن ءومىر بار،
ۋاقىتىڭمەن جۇرەرسىڭ.
كەيبىر كۇندە قاپا بوپ،
كەيبىر كۇندە كەلەرسىڭ.
ءبىر قالىپپەن ەش بەندە
بىتىرە الماس ۇلەسىن.
كولەڭكەلى بۇلىتتاي
كوشپەلى بولعان دۇنيەسىڭ.
اجال كەلسە جاتقىزار،
ماڭدايدان باسقان ۇيقىداي.
بەندەنى داۋلەت ماس قىلار،
قىراۋدى كەشكەن جىلقىداي.
باۋىرى ءبۇتىن، باسى ەسەن،
ساعىنار اۋىق - كۇلكىنى - اي.
قىزىقتىرعان تۇلكىدەي،
دۇنيە وتەر ءبىر كۇنى - اي.
ولمەك پارىز، - دەپ ايتار، - تۋماق سۇندەت
«ولمەك پارىز، - دەپ ايتار، - تۋماق سۇندەت»،
«مويىنعا ورازا، ناماز، - دەيدى، - مىندەت».
الىمدار ورىنداۋدى ءماجبۇر ەتەر،
ادامعا مۇحامبەتكە بولعان ۇمبەت.
ەگەر دە ناماز پالۋان پاسىق شىقسا،
ولاردان ىبىرات الىپ جۇرت نە بىلمەك ؟
مىڭ ىراكات نامازدان ارتىق دەگەن،
كىسىگە ىستەگەن ءبىر ىزەت - ۇرمەت.
كورسەتىلگەن نۇسقادا ءار ءتۇرلى ءىس،
بىلمەگىڭ ءوز شاماندى ابدەن دۇرىس.
جاماندارعا پارقى بىلىنبەيدى،
ارزان، قىمبات باعاسى، التىن مەن مىس.
الىمداردىڭ ۋاعىز كىتابىندا،
تاعدىرعا جازىلعان ءىس بولادى - مىس.
دەپ ايتقان مىڭ رەتتىك اجىلىكتەن،
ارتىق دەپ حالىققا قىلعان ءبىر ءادىل ءىس.
جاقسى بولسىن جۇبايىڭ
كوشتىڭ كوركى تۇيە ەدى،
شىڭىراۋعا قاۋعا بايلاپ باق.
جەتەكشى كەلەر جىلقى مال،
سەمىزىن ءمىنىپ ايداپ باق.
قوي دەگەن مال بەرەكە،
قولايلى قونىس جايلاتپاق.
سيىر، وگىز توق قىلار،
تۇنەگەن جەرى ايباتپاق.
شارۋا بولساڭ، ءمانىسىن
ءار قايسىسىنىڭ ويلاپ تاپ.
ەسەكتىڭ جولى قاتقالاق،
كەتىرەر ەسىن باتقالاق.
ەسى جارىم بالانى
جاراماس ءسىرا ماقتاماق.
شالا جۇيرىك ات بىتسە،
باسىڭا بەينەت تاپتاماق.
جاقسى اسىڭدى جات جەسىن،
جۇرتىڭ مەرەي اپ قالماق.
جامان قوڭسىڭ قوناقپەن
قوسىلا جاۋلار قاپتالداپ.
قاراۋىل قويساڭ قورقاقتى،
جاۋ كورمەي قاشار اتتانداپ.
ازىعىڭدى ازايتساڭ،
اپتادا ۇن قىل باتپانداپ.
اۋىزىڭ اسقا تەز تيەر،
اسىعىس بولىپ جاتقاندا - اق.
ديحان اقىلىن تانىساڭ،
كوپ ايدالعان تاپقا باق.
اتىڭا باتسا التىن ەر،
اتىپ ۇر دا، وتقا جاق.
ىنتىماق، ۇلگى ىزدەسەڭ،
كارياسى باسشى توپقا باق.
جاسانعان جاۋدى كورسەڭ دە،
ارۋاققا تەرىس بوقتاماق.
بوقتاعانىڭ بەي پايدا،
اجەت - تى مىلتىق وقتاماق.
جارامدى ۇلدىڭ بەلگىسى،
جاستىقتىڭ تۇزىن اقتاماق.
وزىڭە سىيماي شىققان سىر،
بىرەۋگە قيىن توقتاماق.
تاس اتقانعا اس بەرمەك،
جاراماس كىنا ساقتاماق.
جابىسار يتكە ات قويار،
بورباسارلاپ، سىرتتانداپ.
جامان ادام زورلىقشىل،
جاقىن جەرگە تىرتاڭداپ.
اجارسىز جىگىت قاتىنعا
الدىرار سىرىن جىرتاڭداپ.
باق قونادى ۇن تاڭداپ،
قوناق قونار ءۇي تاڭداپ.
ءبولىمى جوق بوزبالا،
بەينەتتەن قاشار بۇلتاڭداپ.
قاس جۇيرىككە جولىقساڭ،
جولدا قالماس كۇي تاڭداپ.
قازان اتتىڭ وسالى،
تاتى بولار قيقاڭداپ.
قاس تاتىنىڭ جامانى
قاراكەش بولار سيپاڭداپ.
قالباعايلى تۇيەلەر
جۇك كوتەرمەس سالتاڭداپ.
ارۋانادان تۋعان نار،
كوپ كوتەرەر تالتاڭداپ.
تۇيىلسە جامان وكپەشىل،
تۇيەدەن بەتەر قاڭقاڭداپ،
سيىردان بەتەر تاڭقاڭداپ،
جاماننىڭ ءسوزىن كوتەرسەڭ
ءبىر قورقىتىپ الدىم دەپ،
سوڭىڭنان قالماس جالپاڭداپ.
ات قادىرىن بىلمەگەن
باتباقتا قالار سالپاڭداپ.
اس قادىرىن بىلمەگەن
اشىقپاي قالماس اڭقاڭداپ.
سىپايىنىڭ بالاسى،
تالقانعا زارلى، بال تاڭداپ،
ىرىسى قالىڭ جىگىتتىڭ
قاتىنى شارۋا تومپاڭداپ.
جامان قاتىن كوپ ۇيىقتار،
وياتساڭ اراز قوڭقاڭداپ...
كورگەندى جەردەن قىز الساڭ،
اتىڭدى ەرتتەر جۇگەندەپ.
دالاعا جۇرەر ۋاقتا
كەرەكتىڭدى تۇگەندەپ.
تۇندە كورسەڭ كۇندىزدەي،
كوڭىلىڭ قۇش - اق سۇيمەڭدەپ.
كورسەتەدى كوزىڭە،
«بىلتىرعى بەرگەن ينەڭ » دەپ،
قۇرالا بەرەر دۇنيەڭ كوپ.
بيلىكتى سالساڭ سوعان سال،
ءبىر ءسوز ايتپا «بۇل نەڭ؟ » دەپ.
جامان قاتىن قاپتاعى،
ءجۇنىڭدى تاۋىسار كۇيبەڭدەپ.
اتتەرشىدەن العانى،
اينا، تاراق، ىرەڭ بوپ.
«الگىڭ قايدا؟» دەر ايتساڭ،
بالەگە قويار سۇيرەڭدەپ.
بەلگە سوققان جىلانداي
امالىڭ قۇرىر كۇيرەڭدەپ،
ماڭلايىڭا سالعان سوڭ،
سوعان كۇنىڭ قالعان سوڭ،
اركىممەنەن بىردەي دەپ،
جاسىراسىن كۇرگەيلەپ.
قىلا عوي دەگەن جۇمىسىڭ،
قيلاعا كەتەر سۇردەي بوپ.
اۋىل كوشسە «ال، الداپ»،
ارتاسىڭ جۇگىن امالداپ
وزىڭە جۇكتى جيدىرار
ول قوزعالماس تابانداپ.
ەل جاتاردا اس جەيسىڭ،
شيكى قىلسا شابانداپ.
«سەن قۇرىتتىڭ مەنى» دەر،
تاعى ءوزىڭدى جامانداپ.
دەمىڭدى زورعا الارسىڭ،
ءولىپ تالىپ شامالداپ.
جاقسى بولسا قاتىنىڭ،
ەر ەگىزىڭ - جاقىنىڭ ...
جان - دەنەڭ دە جاي تاۋىپ،
تولا دا بولار اقىلىڭ.
وزىڭە كەرەك جۇمىستان،
كورمەيسىڭ ءىستىڭ قاپىلىن.
سول سەكىلدى ايەلدىڭ
التىنعا بەرىپ بولمايدى
شاشتارىنىڭ ءار قىلىن.
جامان بولسا قاتىنىڭ،
ۇقسايدى ءتىلى شەشەككە،
ىزاعا تولار قوس وكپە.
ار جۇمىستى قىلعاندا،
جولىقتىرار كەسەتكە.
جامباسىڭ ءۇيىر بوپ كەتەر
جاستاعى قاتتى توسەككە.
قانشاما جاقسى ءسوز ايتساڭ،
المايدى ونى ەسەپكە،
ارماندا وتەر ءومىرىڭ-
ارتىلعانداي ەسەككە.
جاقسى قاتىن جىگىتتىڭ،
كەسەكتەن سوققان كەنتىڭدەي،
دۇنيەنىڭ تۇيىق مەنتىندەي.
سارى مايعا بىلعاعان
الۋا، شەكەر، جەنتىندەي.
شوقتىعى بيىك ات مىنسەڭ،
كوكپاردا كوڭىلىڭ ەركىڭدەي.
شولپان جۇلدىز جار الساڭ،
كىرگىزەدى كوركىڭدى - ەي.
قىزىقتىقپەن وتكەن كۇن
بولماي كەتەر ءبىر كۇندەي.
العانىڭ جامان جولىقسا،
نەتەسىڭ دۇنيە شىركىندى - ەي؟!
قاتىنىڭ جامان جولىقسا
حالىق ىشىندە قاتتى داق،
قىز المانققا ساعان باق.
سونداي جامان بوپ تۇرىپ،
سويلەۋىن قويماس شالىقتاپ.
قامشىڭدى بەرسەڭ قولىنا،
تاپسىرماس قايتىپ انىقتاپ.
تاپسىرا المايسىڭ ەشنارسە
بۇرىننان سىرىن الىپ قاپ.
ءوز وتانىن بولعان سوڭ،
كەتە المايسىڭ قالىقتاپ.
سوداي ءسىرا كۇن بولسا،
مىڭ قوي قىرقىپ ءجۇن بولسا،
ارقان، تۇساۋ، قاپ، جازى-
بازاردان ساتىپ الىپ باق
ونىڭدى دا توزدىرار،
ساندىققا قۇلىپتاپ سالىپ باق.
جۇمساۋدان جاعىڭ تالاسىن،
سىنىڭ كورىپ شالاسىن.
ءبىر جەلەۋدى ايتادى،
كورە تۇرا ناناسىن.
تاعى دا ءوزى سىر بەرەر،
انىعىنا قاناسىڭ...
اقىرىن قۇداي وڭدا دە
بار ءۇزىرى سول - داعى،
تاۋىپ بەرسە بالاسىن.
العانىڭ جامان جولىقسا،
ءۇيىڭنىڭ ءىشى شاڭ بولار،
ءىسىڭنىڭ ءبارى قان بولار.
سول الىمەن تۇرمايدى،
كيىم تاڭداپ تاڭ بولار.
اڭگىمە - جاڭجال توزدىرار،
وزگەدەن ءوزىن وزدىرار
جيىنعا كيەر جىبەكتى،
تەزەك تەرىپ توزدىرار.
«قاي جەرىڭنەن تويدىم؟» دەپ،
«نە كورسەتىپ قويدىڭ؟» دەپ،
تاعى ءوزىڭدى جازعىرار.
ايتقانىنا قوعام بوپ،
دۇنيەم بولسىن سوعان دەپ،
ۇستىندە بولار جان - ءتانىڭ...
قاتىنى جاقسى ادامدار،
تەز قارتايىپ قارىماس،
وتەتۇعىن ومىرگە،
قاتىننان جاقىن تابىلماس.
ءىشى - سىرتى تەڭ سۇلۋ،
ايەل ەمەس، ءۇر دەڭىز،
ونداي ۇرگە جولىققان،
ول ۇزىردە ءجۇر دەڭىز.
باس، بادەنى جاراسقان،
ايەلدىڭ اتى ءبىر دەڭىز.
سول سەكىلدى جار بار
ۇر قۇشقانمەن تۇر دەڭىز.
ءىشى - تىسى تەڭ جامان،
قاپ - قارا باتپاق لاي - دى،
وعان دۋشار بولعاندار
وكىنىشپەن جىلايدى.
تىلەۋ تىلە، جىگىتتەر،
جاقسى قىلسىن جۇبايدى.
العانىڭ جامان جولىقسا،
نەتەسىڭ دۇنيە شۇرايدى؟
العان جارى جىگىتتىڭ
قاپ - قارا بولسا كەسكىنى،
ايدان اپ - پاق سۇلۋدىڭ،
تەڭ كەلمەس وعان ەشبىرى.
قارا قويدان وزا ما،
ماقتاساڭ اق ەشكىنى؟
الدىمداعى جاقسىلار،
جامان قاتىن جىگىتتىڭ
تايدىرادى تابانىن،
تار قىلادى زامانىن.
جاقسى قاتىن جىگىتتىڭ
ادام قىلار جامانىن،
ۇشقىر قىلار شابانىن.