ماسكەۋدەگى جەڭىس شەرۋىنە قاي ەلدەردىڭ كوشباسشىلارى بارادى

استانا. KAZINFORM - بيىل ۇلى جەڭىستىڭ 80 جىلدىعى تويلانادى. سالتاناتتى شاراعا قاتىسۋ ءۇشىن ماسكەۋگە 20 دان استام ەلدىڭ باسشىلارى كەلەدى، دەپ حابارلايدى Kazinform ءتىلشىسى.

شاقىرىلعانداردىڭ قاتارىندا قازاقستان، وزبەكستان، بەلارۋس، ارمەنيا، تاجىكستان، قىرعىزستان، كۋبا، سلوۆاكيا، سەربيا، قىتاي، ءۇندىستان، برازيليا، ۆەتنام، بۋركينا-فاسو جانە باسقا ەلدەردىڭ باسشىلارى بار. ازەربايجان پرەزيدەنتى يلحام اليەۆ تە شاقىرتۋ الدى.

ە و وكىلدەرى شارادان باس تارتۋعا شاقىرعانىنا قاراماستان، سەربيا پرەزيدەنتى الەكساندر ۆۋچيچ ماسكەۋدەگى پارادقا قاتىسۋ نيەتىن ءبىلدىردى.

رەسەي پرەزيدەنتىنىڭ باسپا ءسوز حاتشىسى دميتري پەسكوۆ بۇعان دەيىن رەسەيگە 20 دان استام مەملەكەت پەن ۇكىمەت باسشىلارىنىڭ كەلۋى جوسپارلانعانىن حابارلادى. ال 17-ساۋىردە ت م د باس حاتشىسى سەرگەي لەبەديەۆ ت م د ەلدەرىنىڭ بارلىق باسشىلارى ماسكەۋدە 9-مامىردى مەرەكەلەۋگە قاتىساتىندارىن راستاعانىن حابارلادى.

جەڭىس شەرۋىنە رەسەيلىك اسكەري بولىمدەردەن بولەك 19 شەت مەملەكەتتىڭ قارۋلى كۇشتەرىنىڭ وكىلدەرى قاتىسادى. ولاردىڭ اراسىندا قازاقستان، ارمەنيا، بەلارۋس، قىرعىزستان، تاجىكستان جانە باسقا دا ەلدەردىڭ اسكەري قىزمەتكەرلەرى بار.

ماجارستان ەكىنشى دۇنيەجۇزىلىك سوعىستىڭ اياقتالۋىنىڭ ماجارلار ءۇشىن باسقا تاريحي ماڭىزى بار ەكەنىن ءتۇسىندىرىپ، شەرۋگە قاتىسۋدان باس تارتتى. سوعىس كەزىندە ماجارستان فاشيستىك گەرمانيانى قولداپ، انتيگيتلەرلىك كواليتسيا ەلدەرىنە قارسى سوعىستى. ماجارستان ۇكىمەتى كەيىن ءفاشيزمدى ايىپتاعانىمەن، ەلدە قازا تاپقان ماجارلىق ساربازداردى ەسكە الۋ ءالى كۇنگە دەيىن ساقتالعان.

گەرمانيا وكىلدەرى دە شەرۋگە قاتىسۋدان باس تارتتى.

ال ا ق ش پرەزيدەنتى دونالد ترامپ يناۋگۋراتسيادان كەيىن 9-مامىر رەسەيگە بارۋ ءۇشىن «تىم ەرتە» ەكەنىن ايتتى.

مەرەكەگە ەۋروپالىق وداقتىڭ كەلەسى ەلدەرى شاقىرىلمايدى: اۋستريا، بەلگيا، دانيا، يرلانديا، يتاليا، لاتۆيا، ليتۆا، پولشا، رۋمىنيا، فرانسيا، چەحيا، ەستونيا جانە ت. ب.، سونداي-اق اۋستراليا، اندوررا، ۇلى بريتانيا، سان-مارينو، موناكو، كانادا، يسلانديا، نورۆەگيا، جاپونيا.

وسىعان دەيىن ق ر قورعانىس ءمينيسترى رۋسلان جاقسىلىقوۆ ۇلى وتان سوعىسىنداعى جەڭىستىڭ 80 جىلدىعىنا ارنالعان اسكەري شەرۋگە دايىندىق ءجۇرىپ جاتقان يندۋستريالدى قالاشىق پەن دالالىق لاگەرگە بارعانى حابارلاندى.