ماسكەۋدە 28-ساۋىرگە دەيىن سارى قاۋىپ دەڭگەيى جاريالاندى

استانا. KAZINFORM - ماسكەۋ مەن ماسكەۋ وبلىسىندا 28-ءساۋىر كەشىنە دەيىن اۋا رايىنا بايلانىستى «سارى» قاۋىپ دەڭگەيى ەنگىزىلدى، دەپ حابارلايدى ت ا س س.

رەسەي گيدرومەتورتالىعىنىڭ مالىمەتىنشە، بۇل ەسكەرتۋ جاۋىن-شاشىننىڭ كۇشەيۋى، قار ارالاس جاڭبىردىڭ جاۋۋى، كوكتايعاقتىڭ پايدا بولۋى جانە جەلدىڭ كۇشەيۋىنە بايلانىستى جاريالانعان.

- سارى دەڭگەي 28-ءساۋىر كۇنى تاڭعى 09:00-گە دەيىن كۇشىندە بولادى. كەي جەرلەردە جاۋىن-شاشىن كۇشەيىپ، قار ارالاس جاۋىن ەلەكتر جەلىلەرى مەن اعاشتاردى زاقىمداپ، جولداردا كوكتايعاق قالىپتاسۋى مۇمكىن، - دەدى ۆەدومستۆو وكىلى.

سينوپتيكتەردىڭ بولجامىنشا، الداعى تاۋلىكتە ماسكەۋدە جاۋىن-شاشىن جالعاسىپ، جاڭبىر بىرتىندەپ قارعا ۇلاسادى. دۇيسەنبى كۇنى نەگىزىنەن قار ءتۇسۋى كۇتىلەدى. سونىمەن قاتار جەلدىڭ ەكپىنى 15-20 م/س-قا دەيىن كۇشەيەدى.

مەتەورولوگتاردىڭ دەرەگىنە سايكەس، الداعى كۇندەرى قار جامىلعىسى 2-7 سانتيمەترگە دەيىن ۇلعايۋى مۇمكىن.

اۋا رايىنىڭ كۇرت ناشارلاۋىنا بالتىق سيكلوندارىنىڭ اسەرى سەبەپ بولىپ وتىر. سونىڭ سالدارىنان اتموسفەرالىق قىسىمنىڭ تومەندەۋى دە ىقتيمال.

قالا بيلىگى تۇرعىندارعا قولايسىز اۋا رايى كەزىندە ساقتىق شارالارىن ساقتاۋعا شاقىردى. اتاپ ايتقاندا، اعاشتاردىڭ استىندا تۇرماۋ، كولىكتەردى ولاردىڭ ماڭىنا قويماۋ جانە جولدا جىلدامدىق رەجيمىن ساقتاۋ ۇسىنىلدى.