«ماسكەۋ بيرجاسىنا» سالىنعان سانكتسيا قازاقستاننىڭ ينۆەستيتسيالىق كليماتىنا قالاي اسەر ەتەدى –س ءى م جاۋابى
استانا. KAZINFORM - سىرتقى ىستەر مينيسترلىگىنىڭ رەسمي وكىلى ايبەك سمادياروۆ ۆەدومستۆونىڭ باسپا ءسوز ءماسليحاتىندا «ماسكەۋ بيرجاسىنا» سالىنعان سانكتسيانىڭ قازاقستانعا اسەرى تۋرالى پىكىر ءبىلدىردى.
«وتكەن اپتادا «ماسكەۋ بيرجاسى» ەۋرومەن، دوللارمەن ساۋدا-ساتتىق جاساۋدى توقتاتاتىنى بەلگىلى بولدى. ءقازىر رەسەي رەسمي تۇردە يۋانمەن ساۋدا- ساتتىق جاساۋعا كوشىپ جاتىر. بۇل قازاقستاننىڭ ينۆەستيتسيالىق كليماتىنا قالاي كورىنىس بەرەدى؟ بۇل بىزدەگى ساۋدا تىزبەكتەرىنىڭ ۇزىلۋىنە اكەلمەي مە؟» - دەپ سۇرادى جۋرناليست.
ايبەك سمادياروۆ «ماسكەۋ بيرجاسىنا» سالىنعان سانكتسيانىڭ قازاقستانعا تارتىلىپ جاتقان ينۆەستيتسيالارعا اسەرى جوق ەكەنىن ايتتى.
«ازىرشە بۇل ەشقانداي كورىنىس بەرىپ جاتقان جوق. ءبىزدىڭ ءوز بيرجامىز بار. بارىمەن ەمىن-ەركىن ساۋدا جاساپ وتىرمىز. قازاقستانعا سانكتسيا تيگەن جوق. ينۆەستيتسيالار رەسەيلىك بيرجاداعى جاعدايعا تاۋەلدى ەمەس»، - دەدى س ءى م رەسمي وكىلى.
ەسكە سالساق، وتكەن اپتادا ا ق ش قارجى مينيسترلىگىنىڭ شەتەلدىك اكتيۆتەردى باقىلاۋ جونىندەگى باسقارماسى (OFAC) «موسكوۆسكايا بيرجا» جاريا اكسيونەرلىك قوعامىنا (MOEX) سانكسيا سالعانىن جاريالاعان بولاتىن.