مارقۇم ايدوس شايمەردەننىڭ دەنەسى 70 مەتر تەرەڭدىكتەن قازىپ الىنعان
پاۆلودار. KAZINFORM - مايقايىڭ التىن كەنىشىندەگى ويىقتان قازىپ الىنعان ءۇشىنشى قۇتقارۋشىنىڭ مۇردەسى 70 مەتر تەرەڭدىكتەن تابىلعان. قازىرگى ۋاقىتتا مارقۇمنىڭ دەنەسىنە قۇقىق قورعاۋ ورگاندارى ساراپتاما جۇرگىزىپ جاتىر. بۇل تۋرالى ق ر توتەنشە جاعدايلار مينيسترلىگىنەن حابارلاندى.
«2024 -جىلعى 19-شىلدەدە «مايقايىڭ التىن» ا ق كۇشىمەن جەر قازۋ جۇمىستارىن جۇرگىزۋ كەزىندە 70 مەتر تەرەڭدىكتە ءبىر قۇتقارۋشىنىڭ دەنەسى تابىلدى. ول 4-قاڭتاردا «ك ءا ا ق ق ر و ش» ج ش س-نىڭ وزگە ءۇش قۇتقارۋشىسىمەن بىرگە اۆتوبۋس ىشىندە كەلە جاتىپ، جۇمىس ىستەمەيتىن شاحتانىڭ تازارتۋ كەڭىستىگىنە قۇلاعان. بۇدان بۇرىن 2 قۇتقارۋشىنى ىزدەۋ جۇمىستارى قايتا جاندانعان. سكانەرلەۋ جانە اۆتوبۋستىڭ ناقتى ورنالاسقان جەرىن انىقتاۋ ءۇشىن سكانەرى بار «التىنالماس» ا ق ماماندارى تارتىلدى. سكانەرلەۋ ناتيجەلەرى بويىنشا اۆتوبۋستىڭ 12 مەتر تەرەڭدىكتە ورنالاسقاندىعى انىقتالدى. اۆاريالىق-قۇتقارۋ جۇمىستارىن جۇرگىزۋ ورنىنا پاۆلودار وبلىسى ت ج د قۇتقارۋشىلارى كەلدى، ولار «ك ءا ا ق ق ر و ش» ج ش س-مەن بىرلەسىپ دەنەنى جەر بەتىنە كوتەرىپ، جەدەل-تەرگەۋ توبىنا تاپسىردى. قايتىس بولعان ادامنىڭ تۋىستارىنا پسيحولوگيالىق كومەك كورسەتۋ ءۇشىن ت ج د پسيحولوگى دا كەلدى»، - دەپ مالىمدەدى مينيسترلىكتەن.
ەسكە سالا كەتەيىك، تابىلعان مۇردە مارقۇم ايدوس شايمەردەندىكى ەكەنىن تۋىستارى راستاعانى تۋرالى جازعانبىز.
اۆتور
مۇرات اياعان