مارات ايتەنوۆتى تەلەفونمەن ۇرىپ، تىستەپ العان بۇرىنعى ايەلى ايىپپۇل تولەيدى

استانا. KAZINFORM - بۇگىن استانا قالاسىنىڭ قىلمىستىق ىستەر جونىندەگى اۋدانارالىق سوتى شىمكەنت قالاسى ەكس-اكىمىنىڭ اعاسى مارات ايتەنوۆتىڭ دەنساۋلىعىنا قاساقانا جەڭىل زيان كەلتىرگەنى ءۇشىن بۇرىنعى ايەلى دانا اتەشوۆاعا ۇكىم شىعاردى.

«د. اتەشوۆا ۇيدەن ماجبۇرلەپ شىعارۋ كەزىندە ءۇي يەسىنە قارسىلىق كورسەتىپ، م. ايتەنوۆتى ۇيگە كىرگىزبەي، جابىرلەنۋشىنى قاساقانا ۇيالى تەلەفونىمەن سوعىپ، ونى تىستەپ العان. سالدارىنان م. ايتەنوۆ جاراقات الدى. سوتتالۋشىنىڭ كىناسى جابىرلەنۋشىنىڭ، كۋاگەرلەردىڭ ايعاقتارىمەن، سوت-مەديتسينالىق ساراپتاما قورىتىندىسىمەن جانە ءىس ماتەريالدارىمەن دالەلدەندى»، - دەيدى ەلوردا سوتىنان.

ءوز كەزەگىندە پروكۋرور م. ايتەنوۆتىڭ بۇرىنعى ايەلىنە 30 ا ە ك مولشەرىندە ايىپپۇل سالۋدى سۇراعان.

ال قورعاۋشى تاراپ وقيعا مەن قىلمىس قۇرامىنىڭ بولماۋىنا بايلانىستى ءىستى توقتاتۋدى تالاپ ەتكەن.

قىلمىستىق كودەكستىڭ 108-1-بابى 1-بولىگىنىڭ سانكسياسى 200 ا ە ك (738400 تەڭگە) مولشەردە ايىپپۇل نەمەسە سول مولشەردە تۇزەۋ جۇمىسى نەمەسە 200 ساعاتقا دەيىنگى مەرزىمگە قوعامدىق جۇمىسقا تارتۋ، نە بولماسا 50 تاۋلىككە دەيىنگى مەرزىمگە قاماققا الۋ تۇرىندەگى جازانى كوزدەيدى.

الايدا سوت جازانى جەڭىلدەتەتىن ءمان-جاي رەتىندە جاس بالالاردىڭ بولۋىن جانە بۇرىن سوتتالماعانىن ەسەپكە العان.

«سوت ءىستىڭ ءمان-جايىن ەسكەرە وتىرىپ، سونداي-اق سوتتالۋشىنىڭ جەكە كاسىپكەر ەكەنىن، 3 جاس بالاسىنىڭ بارى جانە جازانىڭ وزگە ءتۇرىن تاعايىنداۋ ونىڭ بالالارىنىڭ ءومىرى مەن تاربيەسىنە اسەر ەتۋى مۇمكىن ەكەنىن ەسكەرە وتىرىپ، سوتتالۋشى د. اتەشوۆاعا 20 ا ە ك (73840 تەڭگە) مولشەرىندە ايىپپۇل تۇرىندەگى جازا تاعايىندادى»، - دەلىنگەن سوت ۇكىمىندە.

ۇكىم زاڭدى كۇشىنە ەنگەن جوق.

ەستەرىڭىزگە سالساق، ەلوردا تۇرعىنى دانا اتەشوۆا بۇرىنعى كۇيەۋى مارات ايتەنوۆتىڭ پوليتسەيلەرمەن جانە جەكە سوت ورىنداۋشىلارمەن بىرگە ۇيىنە كەلىپ، بالالاردى ءبىر-بىرلەپ ۇيدەن ماجبۇرلەپ شىعارعانىن، ءوزىن سوققىعا جىققانىن الەۋمەتتىك جەلىدە جاريالاعان بولاتىن.

كەيىنىرەك مارات ايتەنوۆ ا ق ب ت ك 73-بابىنىڭ 1-بولىگىمەن كىنالى دەپ تانىلىپ، 5 تاۋلىككە قاماۋعا الىندى.

سودان كەيىن مارات ايتەنوۆتىڭ بۇرىنعى ايەلىنە سوت شەشىمى شىقتى.

ايتا كەتەيىك، مارات ايتەنوۆ - شىمكەنتتىڭ بۇرىنعى اكىمى مۇرات ايتەنوۆتىڭ تۋعان باۋىرى. مۇرات ايتەنوۆ 2020-2023-جىلدارى شىمكەنتتى باسقارعان.

بىلتىر قىركۇيەكتە پرەزيدەنت جارلىعىمەن قىزمەتىنەن بوساتىلدى.