مامىراجاي ەمەس مامىر: اقمولا وبلىسىندا قار جاۋىپ جاتىر

استانا. KAZINFORM - اقمولا وبلىسىندا قار جاۋدى. بۇعان دەيىن قازگيدرومەت اۋا تەمپەراتۋراسى نولدەن تومەن تۇسەتىنىن حابارلاعان.

اقكول مەن ەرەيمەنتاۋ قالالارىندا، سونداي- اق ەلورداعا جاقىن باسقا ەلدى مەكەندەردە قالىڭ قار جاۋدى.

تۇرعىندار تابيعاتتىڭ توسىن كورىنىسىن ۆيدەوعا ءتۇسىرىپ، الەۋمەتتىك جەلىلەردە بولىسۋدە.

«قازاۆتوجول» الماتى- ەكاتەرينبۋرگ جول ۋچاسكەسىنىڭ (كولۋتون ستانساسى - نوۆوچەركاسسكوە اۋىلى) اشىلعانىن حابارلادى.

«جول قاۋىپسىزدىگىن قامتاماسىز ەتۋ ءۇشىن «قازاۆتوجول» فيليالىنىڭ قىزمەتكەرلەرى جولدارداعى قاردى جەدەل تازارتىپ جاتىر»، - دەپ حابارلادى «قازاۆتوجول».

بۇعان دەيىن قازگيدرومەت جاۋىن- شاشىن جاۋىپ، اۋا رايىنىڭ قولايسىز بولاتىنىن ەسكەرتكەن.

ماسەلەن، استانادا 25-مامىردا كۇندىز قاتتى جاڭبىر جاۋىپ، ەكپىندى جەل سوعادى. سولتۇستىك- شىعىستان جەل سوعادى، ەكپىنى 15-20 م/س، كەي جەرلەردە 23 م/س كۇشەيەدى.

تۇندە اقمولا وبلىسىنىڭ وڭتۇستىك- شىعىسىندا كەي جەرلەردە قاتتى جاۋىن-شاشىن (جاڭبىر قارعا اينالادى) بولادى، كۇندىز وبلىستىڭ وڭتۇستىك- شىعىسىندا وتكىنشى جاڭبىر جاۋادى.

وبلىستىڭ باتىسىندا، وڭتۇستىگىندە جانە شىعىسىندا بۇرقاسىن بولادى. تۇندە جانە تاڭەرتەڭ وبلىستىڭ سولتۇستىك- باتىسىندا تۇمان كۇتىلەدى. سولتۇستىك- شىعىستان سوعاتىن جەل وبلىستىڭ باتىسىندا، وڭتۇستىگىندە، شىعىسىندا 15-20, ەكپىنى 23-28 م/س. تۇندە وبلىستىڭ سولتۇستىك- باتىسىندا -2°c ۇسكىرىك كۇتىلەدى.