ماۋلەن اشىمبايەۆ ۋتيلالىم تۋرالى پىكىر ءبىلدىردى

استانا. KAZINFORM - سەنات ءتوراعاسى ماۋلەن اشىمبايەۆ ۋتيلالىمعا قارسى پەتيتسيا تۋرالى پىكىر ءبىلدىردى.

«مەنىڭ بىلۋىمشە، پەتيتسياعا 50 مىڭ ادام قول قويعان. سوندىقتان ەلىمىزدىڭ زاڭدارى بويىنشا ۋاكىلەتتى ورگان قاراپ جاتىر. بۇل جاعدايدا ونەركاسىپ جانە قۇرىلىس مينيسترلىگى پەتيتسيانى قاراۋعا العانىن بىلەمىن. جۇمىس توبى قۇرىلىپ، وعان قوعام وكىلدەرى دە، مۇددەلى توپتار دا كىردى. وسى جۇمىس توبى پەتيتسيادا ايتىلعان تالاپتار مەن ۇسىنىستاردى قاراستىرادى. وسىدان كەيىن مينيسترلىك قانداي دا ءبىر ۇستانىمىن ازىرلەپ، قوعام مەن دەپۋتاتتارعا جەتكىزەدى»، - دەدى سپيكەر.

ماۋلەن اشىمبايەۆ حالىقتىڭ ۋتيلالىمعا قارسى پەتيتسيا باستاۋىنا ونداعى اقشانىڭ اشىق يگەرىلمەۋى سەبەپكەر بولدى دەپ ەسەپتەيتىنىن ايتتى.

«بۇل جەردەگى نەگىزگى قورىتىندى وتاندىق وندىرۋشىلەردى قولداۋ بولۋى كەرەك شىعار. ءبىراق سونىمەن بىرگە حالىق ونداعى اقشا قالاي يگەرىلىپ جاتقانىن سۇراپ وتىر. ءبىر نارسە ايقىن. قوعام ونداعى اقشانىڭ قالاي جۇمسالىپ جاتقانى تۋرالى اقپارات تىم از ەكەنىن، قانداي كومپانيالار قالاي يگەرىپ جاتقانىن ايتىپ وتىر. وسى تۇستا ماسەلەلەر بار سياقتى. ۇلكەن اشىقتىق كەرەك. ۋتيلالىم قالاي يگەرىلىپ جاتقانى تۋرالى حالىققا اقپارات كەرەك. مەنىڭشە، ماسەلە وسى جەردەن تۋىنداپ تۇرعان سياقتى»، - دەدى ماۋلەن اشىمبايەۆ.

اۆتور
ەسىمجان ناقتىباي